Yohani 9 - ULufingwi uLupwa

UYeesu akumuponia untonko

¹ Yeenya, isiku limo lwe uYeesu akujenda mwi idala, ahamulola umuntu wumo we áamile wu ntonko kufuma kupaapwa.

² Avhasundikwa vhaakwe vhahamuvhuziilizya vhahati, “We Musambiilizi, vhutalamalandu vhwa naanu vhwe vhwámupeleeye umuntu uno kuuti apaapwe wu ntonko? Vhuli, ávhomvile wuuyo, pamo vhapaafi vhaakwe vhe vhávhomvile?”

³ UYeesu ahavhaamula ahati, “Uvhwantonko vhwakwe vhutakufumiilana nu kuuti uweene ávhomvile uvhutalamalandu, poosye avhapaafi vhaakwe. Ápafwilwe wu ntonko, inga amaha aga Mulungu galoleshe ku vhantu kutuushila ku kwakwe.

⁴ Tukwanzilwa kuvhomba imbombo iya Mulungu we ansonteleziizye she musanya. Uvhusiku vhukwinza vhwe umuntu nuumo atangavhomba imbombo izi.

⁵ Lwe indi mu nsi umu, ine ne vhuzelu ku vhantu vhonti.”

⁶ Lwe uYeesu ayanga izyo, ahaswila amati pansi, ahahanya intope, ahamupaha mu minso untonko uyo.

⁷ Pe ahamuvhuuzya untonko uyo ahati, “Sogoola ugeeze ku minso mwi idiimi ilya Silowaamu.” Izwi ilya Silowaamu kwe kuuti we atumiilwe. Pe untonko ahasogola, ahageeza ku minso, ahavhwela mu nkaaya yaakwe akulola.

⁸ Pe avhapalamani vhaakwe na vhanji vhe kwisinda vhahamulolaga lwe akulaavha, vhahavhuzilizanya vhahati, “Vhuli, umuntu uno te we wula we atendamaga nu kulaavha ivintu?”

⁹ Vhamo vhahati, “Umuntu uno we wuuyo.” Avhamwavho vhahati, “Umuntu uno te wuuyo, ileelo aholiine nawo nkaani.” Ileelo uweene ahavhavhuuzya ahati, “Vwe zili, ine ne naamile ne ntonko.”

¹⁰ Pe vhahamuvhuziilizya vhahati, “Inga nalyoli weewe, ishi aminso gaaho ganzite vhuli kulola?”

¹¹ Uweene ahavhaamula ahati, “Umuntu wumo we izina lyakwe wu Yeesu, aaswiliiye amati gaakwe pansi, aahanya intope, nu kumpaha mu minso gaane. Pe ambuuzya ati, ‘Sogoola ugeeze ku minso mwi idiimi ilya Silowaamu.’ Pe nasogola, nageeza, nanda kulola.”

¹² Pe vhahamuvhuziilizya vhahati, “Vhuli, umuntu uyo ali kwoshi?” Uweene ahavhaamula ahati, “Ine ntamanyile kwe ali.”

AVhafalisaayi vhakumuvhuziilizya we áamile wu ntonko

¹³ Pe avhantu vhaala vhahasogola nu muntu ula we áamile wu ntonko ku Vhafalisaayi.

¹⁴ Isiku lye uYeesu áhanyile intope na mati nu kumuponia untonko uyo lyáli lisiku lya Sabaato.

¹⁵ Pe aVhafalisaayi vhoope vhahamuvhuziilizya umuntu uyo vhahati, “Vhuli, aminso gaaho gaanzite vhuli kulola?” Ahavhaamula ahati, “Umuntu wumo aampasile intope mu minso, nageeza nu kwanda kulola.”

¹⁶ Pe aVhafalisaayi vhamo vhahati, “Umuntu uyo atafumile kwa Mulungu, mwe pe atakulandata indajizyo izya Sabaato.” Ileelo vhamo vhahati, “Vhuli, yingavha inza vhuli kwa muntu we mutalamalandu kuvhomba ivilolesyo ivwo?” Pe vhahasugaana vhuuvho vheeka.

¹⁷ Pe aVhafalisaayi vhahamuvhuziilizya havhili vhahati, “Vhuli, ukuti vhuli umuntu uyo we akuponia aminso?” Uweene ahavhaamula ahati, “Ine nkulola kuuti, umuntu uyo mukuvhwi uwa Mulungu.”

¹⁸ Ileelo avhalongozi avha Vhayuuda ivho vhatahiitiha kuuti umuntu uyo we ishi akulola, ku vhwandilo ápafwilwe wu ntonko. Pe vhahavhiita avhapaafi vhaakwe.

¹⁹ Lwe avhapaafi vhaakwe vhaafiha, avhalongozi ivho vhahavhavhuziilizya vhahati, “Vhuli, umuntu uno mwana wiinyu? Inga ndinga mwana wiinyu, nalyoli ápafwilwe wu ntonko? Inga vwe zili, ishi atalisile inza vhuli kulola?”

²⁰ Pe avhapaafi vhaakwe vhahavhaamula vhahati, “Iswe tumanyile kuuti, uno nalyoli mwana wiitu, havhili tukuhomeshezya kuuti ápafwilwe wu ntonko.

²¹ Ileelo tutamanyile vwe aatalisile kulola, havhili tutamumanyile umuntu we aamuponiizye aminso gaakwe. Muvhuziilizyi wuuyo, mwe pe muntu wu songo, kuuti ayanje wuuyo.”

²² Avhapaafi vhaakwe vháyanzile vhwevhulo, mwe pe vhávhogofile avhalongozi avha Vhayuuda, mwe pe avheene vhítinkiine kuuti, umuntu wonti we akwitiha kuuti uYeesu wu Chilisiti, vhakumushimbizya mwi isinagoogi.

²³ Ye nongwa avhapaafi vhaakwe vhátili, “Muvhuziilizyi wuuyo, mwe pe muntu wu songo.”

²⁴ Pe avhalongozi avha Vhayuuda vhahamwita havhili ulwa vhuvhili umuntu we áamile wu ntonko, vhahamuvhuuzya vhahati, “Lapa kwa Mulungu, kuuti ukuyanga uvhwanalyoli! Iswe tumanyile kuuti umuntu uyo we aakuponiizye, mutalamalandu.”

²⁵ Pe ahavhaamula ahati, “Ine ntamanyile kuuti umuntu uyo mutalamalandu, nkandi imanyile lyoka vhweleele, kuuti naamile ne ntonko, ileelo ishi nkulola.”

²⁶ Pe vhahamuvhuziilizya vhahati, “Vhuli, umuntu uyo aakuvhombeeye ishooni? Aakuponiizye vhuli aminso gaaho?”

²⁷ Uweene ahavhaamula ahati, “Ine naavhavhuziizye vwe aambombeeye, ileelo mutaatejeliziizye. Shooni she mukwanza imbavhuuzye havhili? Vhuli, niimwe mukwanza kuvha mwe vhasundikwa vhaakwe?”

²⁸ Avheene vhahamusuufwa vhahati, “Iwe we we musundikwa waakwe! Ileelo iswe swe vhasundikwa vha Moose.

²⁹ Tumanyile kuuti uMulungu áyanzile nu Moose, ileelo umuntu uyo tutamanyile kwe afumile.”

³⁰ Umuntu uyo ahavhaamula ahati, “Ine nkusukumila nkaani! Imwe mutamanyile kwe afumile, ileelo uweene amponiizye aminso gaane!

³¹ Tumanyile kuuti uMulungu atakutejeelezya impuuto izya vhatalamalandu, ileelo akumutejeelezya umuntu wonti we akumushindiha nu kuvhomba kulandatana nu lukasamo lwakwe.

³² Kufuma pe uMulungu ápezile insi, tutahiivwa naalumo kuuti aliipo umuntu we ahamuponia aminso we apafwilwe wu ntonko.

³³ Inga umuntu uyo atafumile kwa Mulungu, atangavhomba izyo.”

³⁴ Avheene vhahamwamula vhahati, “Iwe uhapaapwa mu vhutalamalandu. Pe ungatusambiilizya vhuli iswe?” Pe vhahamushimbizya mwi isinagoogi.

Uvhwantonko uvhwa mu mooyo

³⁵ Lwe uYeesu ayiivwa kuuti avhalongozi avha Vhayuuda vhamushimbizya umuntu ula, ahasogola kumulondola. Lwe amwaga, ahamuvhuziilizya ahati, “Vhuli, ukumwitiha uMwana wa Aadamu?”

³⁶ Umuntu uyo ahamwamula ahati, “We mwene, uMwana wa Aadamu wu naanu, inga imwitishe?”

³⁷ UYeesu ahamwamula ahati, “Iwe umuvhwenyi, havhili we akuyanga niiwe.”

³⁸ Umuntu uyo ahayanga ahati, “Nkwitisile Mwene.” Pe ahasugamila pilongolela ilya Yeesu nu kumupuuta.

³⁹ Pe uYeesu ahayanga ahati, “Ine nínzile mu nsi umu kulonga, inga avhantonko vhalolaje, havhili vhe vhakulola, vhavhe vhe vhantonko.”

⁴⁰ AVhafalisaayi vhamo vhe vháliipo paala, lwe vhamwivwa uYeesu akuyanga izyo, vhahamuvhuziilizya vhahati, “Vhuli, niiswe swe vhantonko?”

⁴¹ UYeesu ahavhaamula ahati, “Inga mwaamile mwe vhantonko, nkandi mutali nu vhutalamalandu. Ileelo ishi muli nu vhutalamalandu, mwe pe mukuti mukulola.”