Yohani 8 - ULufingwi uLupwa

Umwantanda we vhámulemile mu vhuvhembu

¹ Ileelo uYeesu aheepa pa Nyumba iMfinjile nu kusogola pi igamba ilya Mazayituuni.

² Inzanshi lwe kwasha, uYeesu ahasogola havhili nu kwinjila pa Nyumba iMfinjile. Avhantu vhonti vhahasogola ku kwakwe, pe ahatendama nu kwanda kuvhasambiilizya.

³ Lwe uYeesu akusambiilizya, avhasambiilizi avha ndajizyo izya Moose na Vhafalisaayi vhahamuleeta umwantanda wumo we vhámulemile akuvhembuha, pe vhahamwimiilisya pahati iya vhantu.

⁴ Vhahamuvhuuzya uYeesu vhahati, “We Musambiilizi, umwantanda uno alemwilwe akuvhembuha.

⁵ UMoose kulandatana ni ndajizyo zyakwe, átulajiziizye kumugoga umwantanda inza uno kwi idala ilya kumuhoma na mavhwe. Vhuli, iwe ukuti vhuli?”

⁶ Avheene vhámuvhuziliziizye uYeesu vhwevhulo, inga vhamuteje nu kulyaga idala ilya kumulonjeelela. Ileelo uYeesu ahiinama, ahanda kusimba pansi ni nyoovhe yaakwe.

⁷ Lwe vhakujendeelela kumuvhuziilizya, uYeesu ahagoloha, ahavhaamula ahati, “Inga aliipo wumo pahati yiinyu we atahavhomba naalumo uvhutalamalandu, avhe wa kwanda kumuhoma ni ivhwe umwantanda uno.”

⁸ Pe uYeesu ahiinama havhili ahajendeelela kusimba pansi.

⁹ Lwe vhiivwa izyo, vhahanda kwepa wooka wooka, kufuma avhasongo kufishila avhajaaha. Pisinda, uYeesu ahasyala weeka nu mwantanda ula we áyimiliiye pilongolela lyakwe.

¹⁰ Pe uYeesu ahimiilila nu kumuvhuziilizya umwantanda uyo ahati, “We maayi, vhali kwoshi avhantu vhe vhakulonjelelaga? Vhuli, ataliipo inga wooka we asyaye kuuti akulonjeelele?”

¹¹ Umwantanda uyo ahamwamula ahati, “We mwene, ataliipo naawumo.” Pe uYeesu ahamuvhuuzya ahati, “Niine ntakukulonga. Sogolaaga, kufuma ileelo, utahasheele havhili kuvhomba uvhutalamalandu.”

UYeesu vhuzelu ku vhantu avha mu nsi

¹² Pe uYeesu ahajendeelela kuyanga havhili ni mpuga yiila ahati, “Ine ne vhuzelu ku vhantu vhonti. Umuntu wonti we akundandata ine, te ahajende mu shiisi naalumo, ileelo aliivha nu vhuzelu vhwe vhulimulongolaga mu vhulanzi uvhwa shiima.”

¹³ AVhafalisaayi vhahamuvhuuzya uYeesu vhahati, “Iwe ukuhomeshezya weneewe inongwa zyaho. Uvhuhomeshezi vhwaho te vhwa nalyoli.”

¹⁴ UYeesu ahavhaamula ahati, “Poosye inga nkuhomeshezya neene inongwa zyane, zye nkuhomeshezya zya nalyoli, mwe pe imanyile kwe mfumile, havhili imanyile kwe nkusogola. Ileelo imwe mutamanyile kwe mfumile, poosye kwe nkusogola.

¹⁵ Imwe mukundonga kulandatana na ziila zye mukuzilola, ileelo ine ntakumulonga umuntu.

¹⁶ Ileelo poosye ine inga nkumulonga umuntu, nkumulonga ku vhwanalyoli, mwe pe ntakuvha neeka, nkuvha nu Taata we ansonteleziizye.

¹⁷ Mu ndajizyo zyinyu izya Moose yisimviilwe kuuti, ‘Uvhuhomeshezi uvhwa vhantu vhavhili vhukwitishilwa kuuti vhwa nalyoli.’

¹⁸ Kwi idala ili ine nkuyihomeshezya neene nu Taata we ansonteleziizye wu hoome waane.”

¹⁹ Pe aVhafalisaayi vhahamuvhuziilizya uYeesu vhahati, “Vhuli, uTaata waaho ali kwoshi?” Uweene ahati, “Mutamanyile ine, poosye uTaata waane mutamumanyile. Inga mwaamanyile ine, nu Taata waane, nkandi mumumanyile.”

²⁰ UYeesu áyanzile zyonti izyo, lwe ali kusambiilizya pa Nyumba iMfinjile pe vhahasengulaga imbogooso iya mpiiya. Ileelo atáliipo umuntu we ámulemile, mwe pe ahavhaliilizyo haakwe háshiili kufiha.

UYeesu akuyanga izya kufwa kwakwe

²¹ Pe uYeesu ahavhavhuuzya havhili aVhafalisaayi vhaala ahati, “Ine nkwepa. Yeenya, inga neepa imwe kwe mundondole, ileelo kwe mufwe mu vhutalamalandu vhwinyu. Imwe mutanginza kwe nkusogola.”

²² Pe avheene vhahanda kuvhuzilizanya kuuti, “Shooni she akuyanga akuti, tutangamulandata kwe akusogola? Vhuli, akusogola kuyigoga?”

²³ UYeesu ahajendeelela kuvhavhuuzya kuuti, “Imwe mwe vha mu nsi umu, ileelo ine ne wa ku mwanya. Imwe mwe vha mu nsi ino, ileelo ine te ne wa mu nsi ino.

²⁴ Ye nongwa navhavhuuzya kuuti, kwe mufwe mu vhutalamalandu vhwinyu. Ishi inga mutakwitiha kuuti ine ne neene, kwe mufwe mu vhutalamalandu vhwinyu.”

²⁵ Pe vhahamuvhuziilizya uYeesu vhahati, “Tuvhuuzye, iwe we naanu?” UYeesu ahavhaamula ahati, “Kufuma ku vhwandilo naavhavhuziizye kuuti ine ne naanu.

²⁶ Indi nazyo inyinji izya kuyanga ku zyinyu ni zya kuvhalonga imwe, ileelo ntakuvhomba vhwevhulo. Ine nkuvhavhuuzya avhantu vhonti zye nkwivwa kufuma kwa Taata waane. Uweene we ansonteleziizye, havhili akuyanga izya nalyoli.”

²⁷ Avheene vhatámanyile kuuti uYeesu ahayangaga navho izya Taata uwa ku mwanya.

²⁸ Pe uYeesu ahavhavhuuzya ahati, “Lwe mwafishila kunzuvwa pa shihovhenkanyo ne Mwana wa Aadamu, pe muliimanya kuuti ine ne uMulungu ansonteleziizye. Havhili muliimanya kuuti zyonti zye nkuvhomba, ntakuvhomba ku maha gaane, ileelo nkuziyanga zyeziila zye uTaata ansambiliziizye.

²⁹ UMulungu we ansonteleziizye ali pooka niine. Atandesiile neeka, mwe pe ahavhaliilizyo honti nkuvhomba zye zikumuhondezya.”

³⁰ Lwe uYeesu ayanga izyo, avhantu avhinji vhahamwitiha.

UMulungu akuvhavhiiha avhantu kuvha vhasatushe

³¹ Pe uYeesu ahavhavhuuzya aVhayuuda vhe vhámwitisile ahati, “Inga mukugalandata amazwi gaane ge nkuvhasambiilizya, pe nalyoli kwe muvhe mwe vhasundikwa vhaane.

³² Havhili kwe muvhumanye uvhwanalyoli. Kwi idala ilya vhwanalyoli uvhwo, uMulungu kwe avhavhiishe kuvha mwe vhasatushe.”

³³ Avheene vhahamuvhuuzya vhahati, “Iswe swe vha luho ulwa Aabulahamu. Umuntu nuumo atahatuvhiiha naalumo kuvha swe vhazya. Shooni she ukuti iswe kwe tuvhe swe vhasatushe?”

³⁴ UYeesu ahavhaamula ahati, “Nalyoli nkuvhavhuuzya kuuti, umuntu wonti we akujendeelela kuvhomba uvhutalamalandu, akuvha muzya uwa vhutalamalandu.

³⁵ Umuzya atakutendama mu nyumba iya mwene waakwe insiku zyonti, nkandi umwana wa mwene we akutendama insiku zyonti.

³⁶ Ishi inga ine ne Mwana wa Mulungu navhavhiiha kuvha mwe vhasatushe ku vhutalamalandu vhwinyu, te muvhe mwe vhazya havhili, nkandi nalyoli kwe muvhe mwe vhasatushe.

³⁷ Imanyile kuuti imwe mwe vha mu luho ulwa Aabulahamu, ileelo mukulondola idala ilya kungoga, mwe pe mukuhaana kuzyitiha zye nkuvhasambiilizya.

³⁸ Ine nkuvhavhuuzya zye nkuzilola kufuma kwa Taata waane, niimwe mukuzivhomba zye utaata wiinyu akuvhasambiilizya.”

³⁹ Avheene vhahamwamula uYeesu vhahati, “Iswe utaata wiitu wu Aabulahamu.” UYeesu ahavhaamula ahati, “Inga nalyoli mwe vhaana vha Aabulahamu, nkandi mukuvhomba zye uAabulahamu ahavhombaga.

⁴⁰ Ileelo ishi mukulondola idala ilya kungoga, pooka nu kuuti navhavhuuzya uvhwanalyoli vhwe návhwivuuye kufuma kwa Mulungu. UAabulahamu atávhomvile inza vwe imwe mukwanza kumbombela.

⁴¹ Imbombo zye mukuvhomba zikufuma kwa taata wiinyu uwunji.” AVhayuuda ivho vhahamwamula uYeesu vhahati, “Iswe tutapafwilwe kufumiilana nu vhulugusu, uMulungu weeka we wu Taata wiitu.”

⁴² UYeesu ahavhavhuuzya ahati, “Inga uMulungu wu Taata wiinyu, nkandi munkunzite. Ine ntinzile ku maha gaane, uMulungu we ansonteleziizye.

⁴³ Shooni she mutakuzimanyinsanya zye nkuyanga? Mutakuzimanyinsanya, mwe pe mutakwitiha zye nkuvhasambiilizya.

⁴⁴ Imwe utaata wiinyu wu Mukwalanzi. Havhili mukwanza kuvhomba zye utaata wiinyu uyo akwanza. USeetano mugozi kufuma hali, havhili atakwanza kuvhulandata uvhwanalyoli, mwe pe uvhwanalyoli vhutali mu mwoyo waakwe. Uweene kuluma ilenga, we mwata waakwe, mwe pe uweene ali ni ilenga, havhili wu taata uwa vhe vhakuluma ilenga vhonti.

⁴⁵ Ileelo, mwe pe nkuvhavhuuzya izya nalyoli, mutakuniitiha.

⁴⁶ “Ishi pahati yiinyu wu naanu we angahomeshezya kuuti ine ne mutalamalandu? Inga nkuvhavhuuzya izya nalyoli, pe shooni she mutakuniitiha?

⁴⁷ Umuntu uwa Mulungu, akulandata amazwi aga Mulungu. Imwe mutakulandata zye uMulungu akuyanga, mwe pe te mwe vhantu vhaakwe.”

UYeesu mupiti kuluusya uAabulahamu

⁴⁸ AVhayuuda vhaala vhahamuvhuziilizya uYeesu vhahati, “Vhuli, tutakuyanga uvhwanalyoli lwe tukuti iwe we Musamaliya nu kuuti uli ni mpepo inkandamanu?”

⁴⁹ UYeesu ahavhaamula ahati, “Ine ntali ni mpepo inkandamanu. Ine nkumushindiha uTaata waane, ileelo imwe mutakunshindiha ine.

⁵⁰ Ntakwanza kuuti imwe munshindishe. UMulungu we akwanza kunshindiha, havhili uweene we Mulonzi uwa Nalyoli.

⁵¹ Nalyoli kuvhavhuuzya kuuti, umuntu wonti we akuzilandata zye nkusambiilizya, te ahaafwe naalumo.”

⁵² Pe aVhayuuda vhaala vhahamuvhuuzya uYeesu vhahati, “Ishi twamanya kuuti iwe uli ni mpepo inkandamanu! UAabulahamu na vhakuvhwi vhahafwa, ileelo iwe ukuti, ‘Umuntu wonti we akulandata zye nkusambiilizya, te ahaafwe naalumo.’

⁵³ Vhuli, iwe ukuyivhiiha kuuti we mupiti kuluusya utaata wiitu uAabulahamu? Uweene ahafwa. Avhakuvhwi vhoope vhahafwa. Vhuli, iwe ukuyivhiiha kuuti we naanu?”

⁵⁴ UYeesu ahavhaamula ahati, “Inga nkuyishindiha neene neeka, uvhushindamu vhwane vhutali ni mbombo naayimo. Ileelo uTaata waane we imwe mukuti wu Mulungu wiinyu, we akunshindiha.

⁵⁵ Niishi vhweleele, mushiili mutamumanyile uMulungu, ileelo ine imumanyile. Inga nkuti ntamumanyile uMulungu, pe nkuvha ni ilenga inza imwe. Ileelo ine imumanyile uMulungu havhili nkuzilandata zye akuyanga.

⁵⁶ Utaata wiitu uAabulahamu ásesheeye nkaani, lwe aamanya kuuti kwe ninze. Áamile fwe andola, ahaseshela nkaani.”

⁵⁷ Pe aVhayuuda vhaala vhahamuvhuziilizya uYeesu vhahati, “Iwe ushiili kufisya poosye amaaha 50, pe wámuvhwenyi inza vhuli uAabulahamu?”

⁵⁸ UYeesu ahavhaamula ahati, “Nalyoli nkuvhavhuuzya kuuti, lwe uAabulahamu ashiili kupaapwa, ine indiipo.”

⁵⁹ Lwe aVhayuuda vhiivwa izyo, vhahasevha amavhwe inga vhamuhome nu kumugoga, ileelo uYeesu ahazyihama nu kufuma pa Nyumba iMfinjile.