Yohani 7 - ULufingwi uLupwa

UYeesu na vhanine vhaakwe

¹ Lwe izyo zyatuuha, uYeesu ahanda kuzyunguula mu shigavho isha nsi isha Galilaaya. Atahanzaga kuzyunguula mu shigavho isha nsi isha Yudeeya, mwe pe avhalongozi avha Vhayuuda vhahanzaga kumugoga.

² Ahavhaliilizyo aha shikulukuulu isha Vhayuuda isha vwegwi, hápalamiiye.

³ Pe avhanine avha shanaavuli avha Yeesu vhahamuvhuuzya vhahati, “Uyeepe ipa, usogole mu Yudeeya, inga avhalandati vhaaho vhoope vhasogole vhazilole imbombo zye ukuvhomba.

⁴ Inga umuntu akwanza kukumuha, atakuvhomba imbombo zyakwe kukwilu. Mwe pe ukuvhomba zyonti izi, uyilolesye apazelu ku vhantu vhonti avha mu nsi, inga vhakumanye.”

⁵ Avhanine vhaakwe vháyanzile vhwevhulo, mwe pe vhoope vhatámwitisile uYeesu kuuti wu Chilisiti.

⁶ Pe uYeesu ahavhaamula ahati, “Ahavhaliilizyo haane hashiili, ileelo imwe mungasogola ahavhaliilizyo honti.

⁷ Nkuyanga vhwevhulo, mwe pe avhantu avha mu nsi umu vhatangavhaviitilwa imwe, nkandi vhakumviitilwa ine, mwe pe nkuvhavhuuzya kuuti, zye vhakuvhomba mbiivhi.

⁸ Imwe sogolaaji ku Yelusaleemu ku shikulukuulu isho. Ine ntakusogola, mwe pe ahavhaliilizyo haane hashiili kufiha.”

⁹ Lwe uYeesu ayanga izyo, ahasyala mu shigavho isha nsi isha Galilaaya.

¹⁰ Ileelo lwe avhanine vhaakwe avhanaavuli ivho vhasogola ku Yelusaleemu ku shikulukuulu, uYeesu woope ahasogola ku Yelusaleemu, ileelo ishisita kuyilolesya apazelu.

¹¹ Lwe avhalongozi avha Vhayuuda vhali pa shikulukuulu, vhahanda kumulondola uYeesu. Vhahavhavhuziilizya avhantu kuuti, “Vhuli, ali kwoshi umuntu ula?”

¹² Avhantu avhinji kufuma mwi ivhungaana ilyo, vhahadalinkanaga inongwa izya Yeesu. Vhamo vhahatinji uYeesu muntu mwinza, ileelo avhamwavho vhahatinji muntu we akuvhahopenkanya avhantu.

¹³ Ileelo atáliipo umuntu we ahamuyangaga uYeesu apazelu, mwe pe vhahavhogopaga avhalongozi avha Vhayuuda.

UYeesu akuvhasambiilizya avhantu pa Nyumba iMfinjile

¹⁴ Lwe insiku izya shikulukuulu zyafiha pahati, uYeesu ahasogola, ahinjila pa Nyumba iMfinjile nu kwanda kuvhasambiilizya avhantu.

¹⁵ Pe avhalongozi avha Vhayuuda vhahasukumila nu kwanda kuvhuzilizanya kuuti, “Vhuli, umuntu uno angaamanya vhuli zyonti izyo ishisita kusambiilila?”

¹⁶ Pe uYeesu ahavhaamula ahati, “Insambiilizyo zye nkusambiilizya te zyane, zikufuma kwa Mulungu we ansonteleziizye kuli imwe.

¹⁷ Umuntu wonti we akwanza kuvhomba zye uMulungu akasiime, akumanya kuuti insambiilizyo izi zifumile kwa Mulungu, havhili akumanya kuuti ntakuyanga ku maha gaane.

¹⁸ Umuntu wonti we akuyanga ku maha gaakwe, akulondola uvhushindamu vhwakwe wuuyo. Ileelo we akulondola kuumupa uvhushindamu ula we amusonteleziizye, akuyanga uvhwanalyoli, atakuyanga izya ilenga.”

¹⁹ UYeesu ahajendeelela kuyanga kuuti, “Mumanyile kuuti uMoose ávhapiiye avhataata vhiinyu indajizyo zyakwe, inga muzilandate. Ileelo ataliipo umuntu pahati yiinyu we akulandata indajizyo izyo. Pe shooni she mukwanza kungoga?”

²⁰ Ivhungaana ilya vhantu lihamwamula lihati, “Iwe uli ni mpepo inkandamanu! Vhuli, wu naanu we akwanza kukugoga?”

²¹ UYeesu ahavhaamula ahati, “Naavhomvile imbombo zimo isiku ilya Sabaato, ileelo imwe mwenti mwaagandusile.

²² Yeenya, uMoose ávhalajiziizye imwe kuvhatahiili avhaana vhiinyu avhanaavuli. Ileelo te wu Moose we átalisile amaata aga kutahiili, vhe vhataata vhiinyu. Ishi imwe mukuvhatahiili avhaana vhiinyu avhanaavuli poosye isiku ilya Sabaato.

²³ Inga muli nu mute uwa kulandata indajizyo izya Moose kuvhatahiili avhaana vhiinyu avhanaavuli poosye isiku ilya Sabaato, pe shooni she mukumviitilwa ine lwe nkumuponia umuntu isiku ilya Sabaato?

²⁴ Mutamulongaje umuntu ku ziila zye zikuloleha kunzi, nkandi mumulongaje ku vhugolosu.”

Avhantu vhakuvhuzilizanya inga uYeesu wu Chilisiti

²⁵ Pe avhantu vhamo vhe vhahatendamaga mu nkaaya iya Yelusaleemu, vhahanda kuvhuzilizanya kuuti, “Vhuli, uno te wu Yeesu we avhalongozi vhakwanza kumugoga?

²⁶ Yeenya, ishi akuyanga apazelu, ileelo avheene vhatakuyanga naashimo! Vhuli, nalyoli avhapiti vhiitu vhamanyile kuuti uno we wu Chilisiti?

²⁷ Umuntu uno tumumanyile kwe afumile. Ileelo uChilisiti lwe akwinza, ataliipo umuntu we aliimanya kwe akufuma.”

²⁸ Lwe uYeesu akusambiilizya pa Nyumba iMfinjile, ahayanga kwi izwi ipiti ahati, “Nalyoli mumanyile ine, havhili mumanyile kwe mfumile. Ileelo ine ntinzile ku maha gaane, uMulungu we ansonteleziizye wa nalyoli, niimwe mutamumanyile.

²⁹ Ileelo ine imumanyile, mwe pe mfumile ku kwakwe, havhili uweene we ansonteleziizye kuli imwe.”

³⁰ Lwe avhantu ivho vhiivwa izyo, vhahalinga kumulema, ileelo atáliipo umuntu we ásheleeye kumulema, mwe pe ahavhaliilizyo haakwe háshiili kufiha.

³¹ Ileelo avhantu avhinji mwi ivhungaana lye lyáli paala, vhahamwitiha uYeesu, vhahayangaga vhahatinji, “Inga uChilisiti ayinza, vhuli, alivhomba ivilolesyo ivwinji kuluusya vwe umuntu uno avhomvile?”

Vhakuvhasonteelezya avhasikaali kumulema uYeesu

³² AVhafalisaayi vhahiivwa ivhungaana ilya vhantu vhakunongʼona izyo. Pe avheene na vhapiti avha vhapuuti vhahavhasonteelezya avhasikaali, inga vhamuleme uYeesu.

³³ Pe uYeesu ahavhavhuuzya avhantu ivho ahati, “Kwe mbe niimwe ahavhaliilizyo hansi vhweleele lwe nshiili kugaluha ku kwakwe we ansonteleziizye.

³⁴ Kwe mundondole, ileelo te mundole, havhili imwe mutanginza kwe nkusogola.”

³⁵ Pe avhalongozi avha Vhayuuda vhahapanzanya vhahati, “Vhuli, umuntu uno akwanza kusogola kwoshi kwe akuti iswe tutangamwaga? Vhuli, akwanza kusogola ku Vhayuuda vhe vhasaasite mu nkaaya izya vhe te Vhayuuda kuvhasambiilizya?

³⁶ Vhuli, akwanza atuvhuuzye ishooni ku mazwi gaakwe ge akuti, ‘Kwe mundondole, ileelo te mundole, havhili imwe mutanginza kwe nkusogola’?”

UYeesu akuyanga izya Mupepo uMufinjile

³⁷ Isiku ilya vhusililishilo ilya shikulukuulu isha vwegwi, lyáli lisiku ipiti nkaani. Pe uYeesu ahimiilila pa Nyumba iMfinjile, ahayanga kwi izwi ipiti ahati, “Umuntu wonti we ali ni shinyooto, ayinze ku kwane amwele.

³⁸ Umuntu we akuniitiha ine, aliivha inza vwe vhukuyanga uVhusimbe uVhufinjile kuuti, ‘Aliivha ni shiduda isha minzi aminji muhati yaakwe.’”

³⁹ UYeesu ahayangaga inongwa izya Mupepo uMufinjile we pisinda, avhiitisi vhonti avha Yeesu vhámuposheleeye. Ahavhaliilizyo iho, uMulungu ápezile ashiili kuvhatumila uMupepo uMufinjile, mwe pe uMulungu ápezile ashiili kulolesya apazelu uvhushindamu uvhwa Yeesu.

Avhantu vhakusugaana kuzya Yeesu

⁴⁰ Avhantu vhamo mwi ivhungaana liila lwe vhiivwa amazwi igo, vhahanda kuyanga kuuti, “Nalyoli umuntu uno we mukuvhwi we tukumuguliilila kufuma kwa Mulungu.”

⁴¹ Vhamo vhahati, “Umuntu uno wu Chilisiti.” Ileelo avhamwavho vhahati, “Ndaali, uChilisiti atangaafuma mu shigavho isha nsi isha Galilaaya.

⁴² Vhuli, uVhusimbe uVhufinjile vhutakuyanga kuuti, uChilisiti akufuma mu luho ulwa mwene Daavhudi? Havhili kuuti alipaapwa mu Betelehemu, inkaaya ye woope umwene uDaavhudi ápafwilwe?”

⁴³ Pe avhantu vhahasugaana kuzya Yeesu.

⁴⁴ Vhamo vhahanzaga kumulema, ileelo atáliipo umuntu we álinzile kumulema.

Avhalongozi avha Vhayuuda vhatakumwitiha uYeesu

⁴⁵ Pe avhasikaali vhahagaluha ku vhapiti avha vhapuuti na Vhafalisaayi vhaala, ishisita kumulema uYeesu. Lwe vhagaluha, avhalongozi ivho vhahavhavhuziilizya vhahati, “Shooni she mutamulema uYeesu nu kumuleeta ipa?”

⁴⁶ Avhasikaali ivho vhahavhaamula vhahati, “Ataliipo umuntu uwunji we akuyanga inza vwe uweene akuyanga.”

⁴⁷ AVhafalisaayi vhahavhavhuziilizya vhahati, “Vhuli, niimwe avhahopenkanya?

⁴⁸ Vhuli, aliipo umupiti wumo, poosye uMufalisaayi we amwitisile uYeesu?

⁴⁹ Ivhungaana ilya vhantu vhe vhamwitisile uYeesu vhatazimanyile indajizyo izya Moose. Avhantu ivho vhatifiilwe.”

⁵⁰ Pe uNikodeemo, we áali wooka mu vhalongozi avha Vhafalisaayi, we ahavhaliilizyo aha kwisinda ásogooye kwa Yeesu uvhusiku, ahavhavhuziilizya avhamwavho ahati,

⁵¹ “Vhuli, indajizyo izya Moose zikutwitishila kumulonga umuntu inga tutamutejeleziizye suuti, nu kumanya zye akuvhomba?”

⁵² Avheene vhahamwamula uNikodeemo vhahati, “Vhuli, niiwe ufumile mu Galilaaya? Sogoola uvhaazye havhili ahinza uVhusimbe uVhufinjile, pe niiwe kuuti umanye kuuti ataliipo umukuvhwi we angaafuma mu Galilaaya.”

⁵³ Pe avhantu vhonti vhahavhwela mu nkaaya zyavho.