Yohani 5 - ULufingwi uLupwa

UYeesu akumuponia untendya

¹ Lwe izyo zyatuuha, uYeesu ahasogola mu nkaaya iya Yelusaleemu ku shikulukuulu shimo isha Vhayuuda.

² Mu nkaaya iyo, mwámile ishikwilo she izina lyakwe vhahatinji, “IShikwilo isha Ngʼonzi.” Papiipi ni shikwilo isho páali idiimi ipiti lye izina lyakwe mu Shiyalaamu vhahatinji idiimi ilya Betizaata. Havhili páali inyumba impiti zisaano zye zyáli ni mpanda. Inyumba izyo zyálizyunguluuye idiimi ilyo.

³ Mu nyumba izyo, vhahakaataga avhavhinu avhinji. Mu vhavhinu ivho vháliipo avhantonko na vhantendya na vhe vháhataliiye. Avhavhinu ivho vhahagulililaga kuuti aminzi gavundunkane,

⁴ mwe pe ahavhaliilizyo hamo uhavhizya uwa Mulungu ahinzaga nu kuvundulanya aminzi aga mwi idiimi ilyo. Umuvhinu we ataliha kwinjila mwi idiimi ilyo lwe aminzi gavundunkana, ahaponaga uvhuvhinu vhwe áali navhwo.

⁵ Pi idiimi ipo páali umuntu wumo we áali muvhinu amaaha 38.

⁶ Pe uYeesu ahamulola akaasite paala. She amanyile kuuti umuntu ula muvhinu ahavhaliilizyo ahatali, ahamuvhuziilizya ahati, “Vhuli, ukwanza kupona?”

⁷ Umuvhinu uyo ahamwamula uYeesu ahati, “We mwene, ataliipo umuntu uwa kunaavwa kumbiiha mwi idiimi lwe aminzi gavundunkana. Lwe nkwanza kwinjila mwi idiimi, umuntu uwunji akulongolela pilongolela lyane.”

⁸ Pe uYeesu ahamuvhuuzya umuvhinu uyo ahati, “Yimiliila! Nyatuula izagala lyaho, sogolaaga.”

⁹ Naluvhiilo, umuntu uyo ahapona uvhuvhinu vhwakwe, ahanyatula izagala lyakwe, ahanda kwepa. Ileelo uYeesu ámuponiizye umuntu uyo pi isiku ilya Sabaato.

¹⁰ Pe avhalongozi avha Vhayuuda vhahamuvhuuzya umuntu uyo we uYeesu ámuponiizye vhahati, “Ileelo lisiku ilya Sabaato. Indajizyo izya Moose zitakwitishila umuntu kuvhuusya izagala.”

¹¹ Ileelo umuntu uyo ahavhaamula ahati, “Umuntu we amponiizye we ambuziizye kuuti mbuusye izagala, injendaje.”

¹² Pe avhalongozi vhaala vhahamuvhuziilizya vhahati, “Vhuli, wu naanu we akuvhuziizye kuuti uvhombe vhwevhulo?”

¹³ Ileelo umuntu uyo atámanyile kuuti wu naanu we ámuponiizye, mwe pe lwe amuponia, uYeesu áyeefile pi ivhungaana ilya vhantu vhe vháali paala.

¹⁴ Isiku lyeliila lwe ahavhaliilizyo hatuuha hansi, uYeesu ahamwaga umuntu uyo pa Nyumba iMfinjile, ahamusoha ahati, “Tejeelezya, ishi waapona. Utahajendeelele kuvhomba uvhutalamalandu havhili, mwe pe inga ukujendeelela kuvhomba uvhutalamalandu, uliyimba nkaani kuluusya vwe wayimbaga ku vhwandilo.”

¹⁵ Umuntu uyo aheepa paala, ahagaluha kuvhavhuuzya avhalongozi avha Vhayuuda kuuti, izina ilya muntu we aamuponiizye wu Yeesu.

Avhantu vhakuvhwaga uvhulanzi kutuushila kwa Mwana wa Mulungu

¹⁶ Pe avhalongozi avha Vhayuuda vhahanda kumuyimvwa uYeesu, mwe pe ahavhaponiaga avhantu isiku ilya Sabaato.

¹⁷ Ileelo uYeesu ahavhavhuuzya ahati, “UTaata waane akuvhomba imbombo insiku zyonti. Niine nkuvhomba vhwevhulo.”

¹⁸ Kufumiilana niizyo, avhalongozi avha Vhayuuda vhahanda kulondola idala ilya kumugoga uYeesu. Vhahanzaga kumugoga, te kuuti, mwe pe atahashindihaga isiku ilya Sabaato vhweleele, nkandi, mwe pe ahayangaga ahatinji, uMulungu wu Yise waakwe. Kwi idala ilyo, álolesile akuyivhiiha kuuti ali inza uMulungu.

¹⁹ UYeesu ahavhavhuuzya avhalongozi ivho ahati, “Nalyoli nkuvhavhuuzya kuuti, ine ne Mwana waakwe, ntangavhomba naalimo ku maha gaane. Nkuvhomba zyeziila zye nkumulola uTaata waane akuvhomba, mwe pe zye uTaata akuvhomba zye niine ne Mwana waakwe nkuvhomba.

²⁰ UTaata waane ankunzite ine ne Mwana waakwe, havhili akundolesya imbombo zyonti zye akuzivhomba. Ahavhaliilizyo he hakwinza, alindolesya imbombo impiti kuluusya izi, pe imwe mulisukumila.

²¹ Inza vwe uTaata waane akuvhazyusya avhantu, nu kuuvhapa uvhulanzi uvhwa shiima, niine nkuuvhapa uvhulanzi avhantu vhe nkwanza kuuvhapa.

²² UTaata waane atakumulonga umuntu wonti, ileelo ampiiye amaha ine aga kuvhalonga avhantu vhonti.

²³ Kwi idala ilyo, avhantu vhonti vhalinshindihaga ine inza vwe vhakumushindiha uTaata. Umuntu wonti we atakunshindiha ine, akuvha atakumushindiha uTaata waane we ansonteleziizye.

²⁴ “Nalyoli nkuvhavhuuzya kuuti, avhantu vhonti vhe vhakwivwa amazwi gaane nu kumwitiha uMulungu we ansonteleziizye ine, vhali nu vhulanzi uvhwa shiima. Te vhahalongwe ku vhutalamalandu vhwavho. Avheene vhatuusile kufuma mu vhufwe nu kwinjila mu vhulanzi uvhwa shiima.

²⁵ Nalyoli nkuvhavhuuzya kuuti, ahavhaliilizyo hakwinza, havhili hafisile, he avhafwe vhaliyiivwa zye ine ne Mwana wa Mulungu nkuyanga. Pe vhonti vhe vhaliyiivwa nu kwitiha, vhaliivha nu vhulanzi uvhwa shiima.

²⁶ Inza vwe uTaata waane ali na maha aga kuumupa umuntu uvhulanzi uvhwa shiima, niine ne Mwana waakwe ampiiye amaha aga kuuvhapa avhantu uvhulanzi uvhwa shiima.

²⁷ Havhili, ampiiye amaha aga kuvhalonga avhantu, mwe pe ne Mwana wa Aadamu.

²⁸ Mutasukumilaje amazwi iga! Haliyinza ahavhaliilizyo he avhafwe vhonti vhaliyiivwa lwe nkuvhiita,

²⁹ vhoope vhalizyuha nu kufuma mu mbiipa zyavho. Vhonti vhe vhahavhombaga inyinza, vhalipeelwa uvhulanzi uvhwa shiima. Ileelo vhonti vhe vhahavhombaga uvhutalamalandu, vhalipeelwa isunde.”

Avhahoome avha Yeesu

³⁰ UYeesu ahajendeelela kuyanga ahati, “Naashimo she ingavhomba ku maha gaane. Nkuvhalonga avhantu kulandatana na vwe uTaata waane akumbuuzya. Kuli izyo, uvhulonzi vhwane vhugolosu, mwe pe ntakuvhomba zye nkasiime, nkandi zye akasiime uTaata waane we ansonteleziizye.

³¹ Inga nkuyihomeshezya neneene, imwe mutangiitiha kuuti zye nkuhomeshezya zya nalyoli.

³² Ileelo uTaata waane woope akuhomeshezya inongwa zyane kuli imwe, niine imanyile kuuti zyonti zye akuhomeshezya zya nalyoli.

³³ Imwe mwaavhasonteleziizye avhantu kwa Yoohani uMwozyi, woope ahomesheziizye izya nalyoli ku zyane.

³⁴ Ine ntakusuuvhila zye avhantu vhakuhomeshezya, ileelo nkuvhavhuuzya zyonti izyo, inga mupokwe.

³⁵ UYoohani uMwozyi aalolesiizye uvhwanalyoli kuli imwe inza vwe inyaale yikuhozya mu shiisi, niimwe mwaasesheeye uvhuzelu uvhwo ku havhaliilizyo hansi.

³⁶ “Ileelo imbombo zye nkuvhomba zikuhomeshezya ahinza vwe ne wa nalyoli, havhili zilusiizye nkaani zye uYoohani aayanzile. Nkuyanga vhwevhulo, mwe pe imbombo zye uTaata waane ampiiye kuuti mbombaje zye zikulolesya kuuti uTaata uMulungu we ansonteleziizye.

³⁷ Woope uTaata waane we ansonteleziizye ine, ahomesheziizye inongwa zyane kuli imwe. Imwe mutahiivwa naalumo izwi lyakwe, havhili mutahamulola naalumo vwe ali.

³⁸ Mukuhaana kugavhiiha amazwi aga Mulungu mu mooyo giinyu, mwe pe mutakuniitiha ine, ne uMulungu ansonteleziizye kuli imwe.

³⁹ Mukuvhaazya ku mute uVhusimbe uVhufinjile, mwe pe mukusiivha kuuti, umwo mungavhwaga uvhulanzi uvhwa shiima. Nalyoli uVhusimbe uvhwo vhukuhomeshezya inongwa zyane.

⁴⁰ Ileelo mukuhaana kwinza ku kwane, inga mbape uvhulanzi uvhwa shiima.

⁴¹ “Ine ntakusuuvhila kuuti avhantu vhanshindishe.

⁴² Ileelo mbamanyile imwe vwe muli, mutamukunzite uMulungu mu mooyo giinyu.

⁴³ Ine ninzile ku maha aga Taata waane, ileelo mukuhaana kumposheela. Ileelo umuntu uwunji inga ayinza ku maha gaakwe wuuyo, mulimuposheela.

⁴⁴ Mukusungwa kushindikwa na vhanji, ileelo mutali nu mute uwa kulondola umushinzi we wukufuma kwa Mulungu wuuyo. Pe munganiitiha ine inza vhuli?

⁴⁵ Mutasiivhaje kuuti ine kwe mbalonje kwa Taata waane, nkandi uMoose we kwe avhalonje, mwe pe we mukumusuuvhila.

⁴⁶ Inga nalyoli mwámwitisile uMoose, pe nkandi munitisile niine, mwe pe uMoose we ásimvile inongwa zyane.

⁴⁷ Ishi inga mutakwitiha zye uMoose ásimvile, pe mungiitiha vhuli zye nkuyanga?”