Yohani 4 - ULufingwi uLupwa

UYeesu akuyanga nu mwantanda uMusamaliya

¹ Pe aVhafalisaayi vhahiivwa kuuti uYeesu akwozya avhantu nu kuvha na vhasundikwa avhinji kuluusya uYoohani uMwozyi.

² Ileelo uvhwanalyoli uYeesu atahozyaga, nkandi avhasundikwa vhaakwe vhe vhahozyaga.

³ Lwe uYeesu aamanya kuuti inongwa izyo zyakumuha, aheepa mu shigavho isha nsi isha Yudeeya pooka na vhasundikwa vhaakwe ahasogola mu shigavho isha nsi isha Galilaaya.

⁴ Lwe vhakusogola mu Galilaaya, uYeesu na vhasundikwa vhaakwe vhahanzilwaga kutuushila mu nsi iya Samaliya.

⁵ Pe vhahafiha mu nsi iya Samaliya, mu nkaaya ye vhahatinji iSikaali. Inkaaya iyo yáamile papiipi nu mugunda we uYaakobu ámupiiye umwana waakwe uYoosefu.

⁶ Ipo páamile ishifula she vhahatinji ishifula isha Yaakobu. Lwe izuvha lyafiha pi itwe, uYeesu ahatendama pa luvhazu pa shifula isho, inga atuuzye uvhulisu vhwe ájenzite uvhulendo uvhutali.

⁷ Pe ahinza umwantanda wumo uMusamaliya kutapa aminzi, uYeesu ahamuvhuuzya ahati, “We maayi, nkulaavha aminzi aga kumwela.”

⁸ Ahavhaliilizyo iho avhasundikwa vhaakwe vhápezile vhasogooye mu nkaaya kukala ishaakulya.

⁹ Pe umwantanda uyo ahamwamula uYeesu ahati, “Iwe we Muyuuda, niine ne Musamaliya! Shikusukumizya nkaani kulaavha aminzi ku kwane.” Áyanzile vhwevhulo, mwe pe aVhayuuda vhatahivwanaga na Vhasamaliya.

¹⁰ UYeesu ahamwamula ahati, “Inga waamanyile she uMulungu akwanza kuukupa, havhili kuuti wu naanu we akukulaavha aminzi aga kumwela, waamile undaavhaje, niine naamile inkupanje aminzi ge gakuuvhapa avhantu uvhulanzi.”

¹¹ Umwantanda uyo ahamwamula uYeesu ahati, “We mwene, iwe utali nu lukusa, poosye ishiliilo isha kutapila aminzi, havhili ishifula ishi shivhiiye nkaani, ishi kwe ugaaje kwoshi aminzi igo ge gakuuvhapa avhantu uvhulanzi?

¹² Utaata wiitu uYaakobu ahaatupa ishifula ishi she ahamwelaga na vhaana vhaakwe, pooka ni visugwa vwakwe. Vhuli, ukuyilola kuuti iwe we mupiti kuluusya uweene?”

¹³ Pe uYeesu ahamwamula ahati, “Umuntu wonti we akumwela aminzi ge gakufuma mu shifula ishi, akwumilwa ni shinyooto havhili.

¹⁴ Ileelo umuntu we akumwela aminzi ge ine nkuumupa, te ahuumilwe ishinyooto havhili. Aminzi ge ine nkuumupa, galiivha inza ishiduda isha minzi muhati yaakwe she shitakwuma naalumo nu kuumupa uvhulanzi uvhwa shiima.”

¹⁵ Pe umwantanda uyo ahamulaavha uYeesu ahati, “We mwene, nkukulaavha umpe aminzi ge ukugayanga, inga ishinyooto shitandumaje. Havhili intahinze kutapa aminzi pa shifula ipa!”

¹⁶ UYeesu ahamwamula ahati, “Sogoola umwite umulume waaho, uyinze nawo ipa.”

¹⁷ Umwantanda uyo ahamwamula ahati, “Ine ntimaliilwe.” UYeesu ahamwamula ahati, “Wayanga mwe muumwo kuuti utimaliilwe!

¹⁸ Nkuyanga vhwevhulo, mwe pe wímaliilwe na vhanaavuli vhasaano, woope umwanaavuli we ukutendama nawo ishi, te mulume waaho. Ipo wayanga zya nalyoli.”

¹⁹ Umwantanda uyo ahamwamula uYeesu ahati, “We mwene, ishi naamanya kuuti iwe we mukuvhwi.

²⁰ Avhataata vhiitu vhahamupuutaga uMulungu mwi igamba ili ilya Geliziini, ileelo imwe mwe Vhayuuda mukuti tusogolaje kumupuuta uMulungu ku Yelusaleemu. Vhuli, uvhwanalyoli vhuli kwoshi?”

²¹ UYeesu ahamwamula ahati, “We maayi, yitiiha zye nkuyanga kuuti zya nalyoli, ahavhaliilizyo hakwinza he te muhamupuutaje uTaata mwi igamba ili, poosye ku Nyumba iMfinjile iya ku Yelusaleemu.

²² Imwe mwe Vhasamaliya mukumupuuta uMulungu we mutamumanyile, ileelo iswe twe Vhayuuda tukumupuuta uMulungu we tumumanyile, mwe pe alivhapoha avhantu kutuushila ku Vhayuuda.

²³ Ahavhaliilizyo hakwinza, havhili hafisile he avhantu vhe vhakumupuuta uMulungu mu vhwanalyoli, vhalimupuutaga uTaata inza vwe uMupepo waakwe akuvhalongola kumupuuta uweene inza vwe wa nalyoli. UTaata uMulungu akuvhalondola avhantu vhe vhakumupuuta kwi idala ilyo.

²⁴ UMulungu Mupepo, avhantu vhe vhakumupuuta, vhakwanzilwa kumupuuta inza vwe uMupepo waakwe akuvhalongola kumupuuta uweene mu vhwanalyoli.”

²⁵ Umwantanda uyo ahamwamula uYeesu ahati, “Imanyile kuuti uMeesiya akwinza, we vhakuti uChilisiti. Havhili imanyile kuuti inga ayinza, alitumanyisya zyonti.”

²⁶ Pe uYeesu ahamwamula ahati, “Ine ne nkuyanga niiwe, we we wuyo we iwe ukumuyanga.”

²⁷ Ahavhaliilizyo iho, avhasundikwa vhaakwe vhahagaluha kufuma kwe vhásogooye, vhahasukumila nkaani lwe vhaalola uYeesu akuyanga nu mwantanda uyo. Ileelo atáliipo umusundikwa inga wooka we ámuvhuziliziizye uYeesu kuuti, “Ukwanza ishooni ku kwakwe?” Poosye kuuti, “Shooni she ukuyanga nawo?”

²⁸ Umwantanda uyo ahayileha insonta yaakwe iya minzi pepaala, ahasogola mu nkaaya iya Sikaali. Lwe aafiha mu nkaaya iyo, ahavhavhuuzya avhantu ahati,

²⁹ “Tujende mumwenye umuntu we ambuuzya zyonti zye nkavhombaga. Vhuli, umuntu uyo angavha wu Chilisiti we tukumusuuvhila kuuti akwinza?”

³⁰ Lwe avhantu vhiivwa izyo, vhaheepa mu nkaaya iyo, vhahanda kusogola kwe uYeesu áamile.

³¹ Lwe avhantu vhaala vhashiili kufiha, avhasundikwa vhaakwe vhahamulaavha vhahati, “We Musambiilizi, nzaaga ulye ishaakulya.”

³² Ileelo uweene ahavhaamula ahati, “Ine indi ni shaakulya ishamwavho she imwe mutashimanyile.”

³³ Pe avhasundikwa vhaakwe vhahanda kuvhuzilizanya vheeka kuuti, “Vhuli, kuli umuntu we ayinzile kuumupa ishaakulya lwe tutaliipo?”

³⁴ UYeesu ahavhaamula ahati, “Ishaakulya shaane ine, kwe kuvhomba ulukasamo ulwa Taata we ansonteleziizye kumaliilizya imbombo yaakwe.

³⁵ Imwe mukuyanga mukuti, ‘Gasyala ameezi gane vhweleele kufishila ahavhaliilizyo aha mvuno.’ Ileelo ine nkuvhavhuuzya kuuti, te vwe zili. Yeenyi amagunda vwe gali, iviyavho vweleeye, yikwanzilwa vivunwe.

³⁶ We akuvuna akuposheela amalipilo gaakwe. Akuvhungaaniha mu shanga shaakwe vwe avunile, kwe kuuti uvhulanzi uvhwa shiima. Kuli izyo, we akuvhwala na we akuvuna vhonti vhaliseshela pooka.

³⁷ Galiipo amazwi ge gakuti, ‘Umuntu wumo akuvhwala, uwamwavho akuvuna.’ Amazwi iga ga nalyoli.

³⁸ Ine návhasonteleziizye imwe kuvuna vwe mutávhwaye. Avhantu avhanji vhávhomvile imbombo yonti ingomu. Imwe mukulyaga ilonka kuzya mbombo yaavho.”

AVhasamaliya avhinji vhakumwitiha uYeesu

³⁹ AVhasamaliya avhinji avha mu nkaaya yiila iya Sikaali vhahamwitiha uYeesu, mwe pe vhívuuye zye umwantanda ula áhomesheziizye kuuti, “Umuntu uyo ambuuzya zyonti zye nkavhombaga.”

⁴⁰ Lwe aVhasamaliya vhaala vhaafiha pe uYeesu áali, vhahamulaavha nkaani kuuti atendame pooka navho, woope ahiitiha, pe ahatendama mu nkaaya iyo insiku zivhili.

⁴¹ Ahavhaliilizyo honti iho, avhantu avhinji nkaani vhahamwitiha uYeesu ku ziila zye ahayangaga.

⁴² Vhahamuvhuuzya umwantanda uyo vhahati, “Ishi twamwitiha umuntu uno, te ku ziila zyeka zye utuvhuziizye, nkandi twamwitiha, mwe pe twivwa sweneeswe zye akuyanga. Havhili twamanya kuuti, nalyoli umuntu uno we Muposhi uwa nsi.”

UYeesu akumuponia umwana uwa mulongozi

⁴³ Lwe insiku zivhili zyatuuha, uYeesu aheepa mu nkaaya iya Sikaali nu kusogola mu shigavho isha nsi isha Galilaaya.

⁴⁴ UYeesu ápezile avhavhuziizye avhasundikwa vhaakwe atili, “Umukuvhwi atakushindikwa na vhantu avha ku mwavho.”

⁴⁵ Avhantu avha mu shigavho isha nsi isha Galilaaya vhahamuposheela ahinza, mwe pe vhoope vhásogooye ku Yelusaleemu ku shikulukuulu isha Pasaaka, ukwo vhávhwenyi zyonti zye uYeesu ávhomvile.

⁴⁶ Pe uYeesu ahasogola havhili mu nkaaya iya Kaana ye yáali mu shigavho isha nsi isha Galilaaya. Mu nkaaya iyo mwe ágaluliinye aminzi kuvha divaayi. Kwáli umulongozi wumo uwa silikaali mu nkaaya iya Kapelanawuumu we umwana waakwe umwanaavuli áali muvhinu.

⁴⁷ Umulongozi uyo ahiivwa kuuti uYeesu ayinzile havhili mu shigavho isha nsi isha Galilaaya, kufuma mu shigavho isha nsi isha Yudeeya. Ahasogola kwa Yeesu nu kumulaavha nkaani kuuti asogole ku nkaaya iya Kapelanawuumu kumuponia umwana waakwe, mwe pe ávhinile nkaani, asyaye hansi kufwa.

⁴⁸ UYeesu ahamwamula umulongozi uyo ahati, “Mwe vhantu imwe, vhuli, mutanganiitiha ishisita kulola ivilolesyo ni zya kusukumizya?”

⁴⁹ Pe ahamwamula uYeesu ahati, “We mwene, nkukulaavha, tujende umuponie umwana waane she ashiili kufwa.”

⁵⁰ Ileelo uYeesu ahamuvhuuzya ahati, “Sogoola kuhaaya umwana waaho aponile.” Umulongozi uyo ahiitiha izwi lye uYeesu ámuvhuziizye, pe ahanda kusogola ku kwakwe.

⁵¹ Lwe umulongozi uyo ali mwi idala akujenda, ahahomaana na vhavhomvi vhaakwe. Vhahamuvhuuzya vhahati, “Umwana waaho aponile, mwinza vhweleele.”

⁵² Pe ahavhavhuziilizya avhavhomvi vhaakwe ahati, “Aaponile kufuma lii?” Avheene vhahamwamula vhahati, “Aaponile kufuma mawiila umusanya lwe izuvha lyateguha.”

⁵³ Pe uyise uwa mujaaha uyo ahamanya kuuti umwana waakwe aaponile kufuma ahavhaliilizyo hehaala he uYeesu aamuvhuziizye kuuti, “Umwana waaho aponile.” Pe umulongozi uyo pooka na vha mu nyumba yaakwe, vhahamwitiha uYeesu.

⁵⁴ Ishi sháamile shilolesyo isha vhuvhili she uYeesu ávhomvile mu shigavho isha nsi isha Galilaaya, lwe aafuma mu shigavho isha nsi isha Yudeeya.