Yohani 3 - ULufingwi uLupwa

UYeesu akupanga nu Nikodeemo

¹ Kwáli umupiti wumo uwa Vhayuuda kufuma mu mpuga iya Vhafalisaayi we izina lyakwe vhahatinji uNikodeemo.

² Isiku limo uvhusiku, uNikodeemo ahasogola kwa Yeesu, ahamuvhuuzya ahati, “We Musambiilizi, tumanyile kuuti iwe we Musambiilizi we uMulungu akusonteleziizye, mwe pe ataliipo umuntu we angavhomba ivilolesyo vwe ukuvhomba inga uMulungu atali pooka nawo.”

³ UYeesu ahamwamula ahati, “Nalyoli nkukuvhuuzya kuuti, ataliipo umuntu we anginjila mu vhumwene uvhwa Mulungu, inga atapafwilwe ulwa vhuvhili.”

⁴ UNikodeemo ahamuvhuziilizya uYeesu ahati, “Vhuli, umuntu umugoosi angapaapwa vhuli ulwa vhuvhili? Vhuli, anginjila havhili mu lwanda ulwa nyina inga apaapwe?”

⁵ UYeesu ahamwamula ahati, “Nalyoli nkukuvhuuzya kuuti, ataliipo umuntu we anginjila mu vhumwene uvhwa Mulungu inga atapafwilwe kwi idala ilya minzi ni lya Mupepo uwa Mulungu.

⁶ Avhapaafi vhakupaapa avhaana vhaavho nu muvhili, ileelo uMupepo uMufinjile we akupaapa avhantu vhupwa, inga vhavhe nu vhulanzi uvhwa shiima.

⁷ Utasukumilaje zye nakuvhuuzya kuuti, ‘Mukwanzilwa mupaapwe ulwa vhuvhili.’

⁸ Inkungu yikuvugula kusogola kwonti kwe yikwanza. Ungiivwa lwe yikuvugula, ileelo utakumanya kwe yikufuma na kwe yikusogola. Izi vwe zili poosye na kwa muntu wonti we apafwilwe nu Mupepo uMufinjile.”

⁹ UNikodeemo ahamuvhuziilizya uYeesu ahati, “Vhuli, izi zingavha inza vhuli?”

¹⁰ UYeesu ahamwamula ahati, “Iwe we musambiilizi uwa vhantu avha mu nsi iya Isilayeeli we ukushindikwa, utazimanyile vhuli zyonti izi?

¹¹ Nalyoli nkukuvhuuzya kuuti, iswe tuzimanyile zye tukuyanga, havhili tukuhomeshezya ziila zye tuzivhwenyi, ileelo imwe mutakwitiha zye tukuvhavhuuzya.

¹² Nkuvhavhuuzya zye zikuvhombeha mu nsi umu, ileelo imwe mutakwitiha, pe mungiitiha inza vhuli inga navhavhuuzya zye zikuvhombeha ku mwanya?

¹³ Ataliipo umuntu wonti we ahasogola ku mwanya, ileelo ine ne Mwana wa Aadamu ne nkinza kufuma ku mwanya.

¹⁴ “Yeenya, aVhaisilayeeli lwe vhali mu luugwa, uMoose ágomvile ishiholanyo isha njoha iya shaaba nu kushizuvwa mwi ikwi. Niine ne Mwana wa Aadamu nkwanzilwa vhanzuvwe pa shihovhenkanyo,

¹⁵ inga mbape uvhulanzi uvhwa shiima avhantu vhe vhakuniitiha.

¹⁶ UMulungu ávhakunzite nkaani avhantu avha mu nsi umu, ye nongwa ánsonteleziizye ne Mwana waakwe imozi, kwinza mu nsi umu inga umuntu wonti we akuniitiha atahateeje, nkandi avhwaje uvhulanzi uvhwa shiima.

¹⁷ Yeenya, uMulungu atánsonteleziizye ne Mwana waakwe kuvhalonga avhantu avha mu nsi umu, nkandi kuvhapoha.

¹⁸ “UMulungu atakumulonga umuntu we anitisile ne Mwana waakwe, ileelo umuntu we atanitisile alonziilwe, mwe pe atanitisile ne Mwana waakwe imozi.

¹⁹ Uvhu vhwe vhulonzi, uvhuzelu vhwinzile mu nsi umu, ileelo avhantu vhasungwilwe kuvha mu shiisi kuluusya kuvha mu vhuzelu, mwe pe imbombo zyavho mbiivhi.

²⁰ Avhantu vhonti vhe vhakuvhomba imbiivhi, vhakuvhuviitilwa uvhuzelu uvhwo. Havhili vhatakwanza kusogola kwe uvhuzelu vhuli, vhakuvhomba isho inga imbiivhi zyavho zitahaloleshe apazelu.

²¹ Ileelo avhantu vhonti vhe vhakuvhomba izya nalyoli vhakusogola ku vhuzelu uvhwo, inga imbombo zyavho ziloleshe apazelu kuuti zikuvhombwa inza vwe uMulungu akwanza.”

UYoohani uMwozyi akupanga izya Yeesu

²² Lwe ahavhaliilizyo hatuuha hansi, uYeesu na vhasundikwa vhaakwe vhahasogola mu nsi iya Yudeeya. Vhahatendama ku havhaliilizyo hamo mu nsi iyo, umwo ahozyaga avhantu.

²³ Ahavhaliilizyo hehaala, woope uYoohani uMwozyi ahozyaga avhantu mu nkaaya iya Ayinooni, papiipi ni nkaaya iya Saleemu, mwe pe ukwo kwámile aminzi aminji. Avhantu avhinji vhahasogolaga ku kwakwe, inga avhoozye.

²⁴ Ahavhaliilizyo iho uYoohani uMwozyi ápezile ashiili kulemwa nu kukungwa mu jeela.

²⁵ Isiku limo, avhasundikwa vhamo avha Yoohani uMwozyi vhahanda kudalinkana nu Muyuuda wumo izya maata aga kuyizelufwa.

²⁶ Pe vhahasogola kwa Yoohani uMwozyi, vhahamuvhuuzya vhahati, “We musambiilizi, umuntu we waamile nawo kwi isyila ilya ijenje uYoolodaani, we waatuvhuziizye inongwa zyakwe, woope akwozya avhantu. Havhili avhantu avhinji vhakusogola ku kwakwe kuluusya ku kwaho.”

²⁷ UYoohani ahavhaamula ahati, “Umuntu atangavha ni shintu, inga uMulungu atamupiiye.

²⁸ Imwe mweneemwe mwe vhahoome vhaane, ku zye nkuyanga kuuti, ‘Ine te ne Chilisiti,’ uMulungu ánsonteleziizye, inga ndongolele pilongolela lyakwe.

²⁹ Umulindu we akwimalwa akwanzilwa kusogola kwa mulume waakwe. Ine indi inza umumanyani uwa mulume we akumwimala umulindu uyo, nkwimiilila pa luvhazu pa we akwimala, nkuseshela lwe nkwivwa izwi lyakwe.

³⁰ Yikwanzilwa umuntu uyo avhe mupiti nkaani, ileelo ine imbe ne munsi nkaani.”

³¹ Uweene we afumile ku mwanya ali na maha kuluusya avhantu vhonti. Umuntu wonti we afumile pa nsi, wa pa nsi, havhili akuyanga izya pa nsi panaapa. Ileelo we afumile ku mwanya ali na maha kuluusya avhantu vhonti.

³² Umuntu uyo akuhomeshezya zye azivhwenyi nu kuzyivwa kufuma kwa Mulungu, ileelo avhantu vhansi vhweleele vhe vhakwitiha kuuti zye akuyanga zya nalyoli.

³³ Umuntu wonti we akumwitiha uweene, akuhomeshezya kuuti zye uMulungu akuyanga zya nalyoli,

³⁴ mwe pe uMulungu ámusonteleziizye uYeesu kuyanga amazwi aga Mulungu. UMulungu ámupiiye uYeesu uMupepo uMufinjile ishisita ishipimo.

³⁵ UTaata uMulungu amukunzite uMwana waakwe, havhili amupiiye amaha aga kukonzya ivintu vwonti.

³⁶ Umuntu wonti we akumwitiha uMwana wa Mulungu, ali nu vhulanzi uvhwa shiima, ileelo umuntu wonti we akumuhaana, atali nu vhulanzi uvhwa shiima, mwe pe uvhuhalazu uvhwa Mulungu vhukuvha kwa muntu uyo shiima.