Yohani 21 - ULufingwi uLupwa

UYeesu akuvhaloleshela avhasundikwa vhaakwe mu shigavho isha nsi isha Galilaaya

¹ Lwe ahavhaliilizyo hatuuha, uYeesu ahavhaloleshela havhili avhasundikwa vhaakwe pa luvhazu pa sumbi uwa Tibeeliya. Lwe ashiili kuvhaloleshela zyáli ishi,

² uSiimoni uPeeteli nu Toomasi we vhahamwitaga vhahatinji Ipasa nu Nasaniyeeli we áfumile mu nkaaya iya Kaana iya ku Galilaaya, na vhaana vhavhili avha Zebedaayi na vhasundikwa avhamwavho vhavhili vháali vhonti pooka.

³ USiimoni uPeeteli ahavhavhuuzya avhamwavho ahati, “Nasogola kwa sumbi kuvuvha inswi.” Vhoope vhahayanga vhahati, “Niiswe kwe tusogole pooka niiwe.” Pe vhahasogola, vhahinjila mwi ivhooti, vhahavuvha vhusiku vhwonti, ileelo vhatahalema inswi inga yooka.

⁴ Inzanshi lwe kukuvhambunkana, uYeesu ahimiilila pa luvhazu pa sumbi, ileelo avhasundikwa vhaakwe vhatahamumanya kuuti wu Yeesu.

⁵ Pe uYeesu ahavhavhuziilizya ahati, “Mwe vhaana vhaane, muli ni nswi inga yooka?” Avheene vhahamwamula vhahati, “Naayimo.”

⁶ UYeesu ahavhavhuuzya ahati, “Teji ulwelo uluvhazu ulwa kundiilo ulwa ivhooti, kwe muleme inswi.” Pe vhahatega ulwelo mwa sumbi. Pisinda, vhahanda kulukwesa, ileelo vhahapootwa, mwe pe inswi zyáli nyinji nkaani.

⁷ Umusundikwa ula we uYeesu ámukunzite, ahamuvhuuzya uPeeteli ahati, “Uno wu Mwene!” Lwe uSiimoni uPeeteli ayiivwa kuuti wu Mwene, ahazwala amenda gaakwe ge ázuuye lwe aakuvuvha inswi, ahayigwilizya mwa sumbi.

⁸ Avhasundikwa avhamwavho vhahasogola pa luvhazu pa sumbi ni ivhooti she vhakulukwesa ulwelo lwe lwízuuye inswi, mwe pe vhatáamile apatali na pa luvhazu pa sumbi. Kufuma pe vháali na pa luvhazu pa sumbi páali uvhutali uvhwa ntambwi 100 ishi.

⁹ Lwe vhaafiha pa luvhazu pa sumbi, vhahawulola umwoto uwa mazimwa, pa mwoto ipo páamile inswi ni ikaati.

¹⁰ UYeesu ahavhavhuuzya ahati, “Leeti inswi zimo zye mwalema ishi.”

¹¹ Pe uSiimoni uPeeteli ahinjila mwi ivhooti, ahakwesela pa luvhazu ulwelo lwe lwízuuye inswi. Mu lwelo umwo mwáli inswi impiti 153. Pooka nu kuuti inswi zyámile nyinji nkaani, ulwelo lutádumusile naapamo.

¹² UYeesu ahavhiita avhasundikwa vhaakwe ahati, “Nzaaji mulaavhushe.” Atáliipo umusundikwa naawumo we álinzile kumuvhuziilizya kuuti, “Vhuli, iwe we naanu?” Vhatámuvhuziliziizye, mwe pe vhámanyile kuuti wu Mwene.

¹³ UYeesu ahapalamila, ahanyatula ikaati nu kuuvhapa avhasundikwa vhaakwe. Havhili ahanyatula zyope inswi, ahavhomba inza vhwevhulo.

¹⁴ Ulwo lwáli lwa vhutatu uYeesu kuvhaloleshela avhasundikwa vhaakwe, lwe uMulungu amuzyusya.

UYeesu akuyanga nu Peeteli

¹⁵ Lwe vhalaavhuha, uYeesu ahamuvhuziilizya uPeeteli ahati, “We Siimoni mwana wa Yoohani, vhuli, unkunzite nkaani kuluusya ivintu ivi ivwa kuvuvhila inswi?” UPeeteli ahamwamula ahati, “Eena Mwene, iwe umanyile kuuti nkukunzite.” UYeesu ahamuvhuuzya ahati, “Udiimaje ingʼonzi zyane.”

¹⁶ UYeesu ahamuvhuziilizya uPeeteli ulwa vhuvhili ahati, “We Siimoni mwana wa Yoohani, vhuli, unkunzite?” UPeeteli ahamwamula ahati, “Eena Mwene, iwe umanyile kuuti nkukunzite.” UYeesu ahamuvhuuzya ahati, “Udiimaje ingʼonzi zyane.”

¹⁷ Ahamuvhuziilizya ulwa vhutatu ahati, “We Siimoni mwana wa Yoohani, vhuli, unkunzite?” Pe uPeeteli ahaswimiililwa, mwe pe amuvhuziilizya ulwa vhutatu kuuti, “Vhuli, unkunzite?” Ahamwamula ahati, “We Mwene, iwe umanyile zyonti. Umanyile kuuti, nkukunzite.” UYeesu ahamuvhuuzya ahati, “Udiimaje ingʼonzi zyane.

¹⁸ Nalyoli nkukuvhuuzya kuuti, lwe we mujaaha, uhayizwalizyaga amenda weeka nu kusogola kwonti kwe ukwanza. Ileelo lwe wagoosipa, uligolosyaga inyoovhe zyaho, nu muntu uwunji we alikuzwalizyaga, nu kukutwala kwe utakwanza.”

¹⁹ UYeesu áyanzile izyo kulolesya vwe uPeeteli aliifwa kwi idala ilya kulolesya uvhushindamu uvhwa Mulungu. Lwe uYeesu ayanga amazwi igo, ahamuvhuuzya uPeeteli ahati, “Undandate.”

²⁰ Pe uPeeteli ahashevhela mwisinda, ahamulola umusundikwa we uYeesu ámukunzite akuvhalandata. Umusundikwa uyo we átendiime papiipi nu Yeesu lwe vhaakulya ishaakulya isha Pasaaka, nu kumuvhuziilizya kuuti, “We Mwene, wu naanu we kuuti akwaniile?”

²¹ Pe lwe uPeeteli amulola umusundikwa uyo, ahamuvhuziilizya uYeesu ahati, “We Mwene, shintu vhuli she kwe shimwaje umusundikwa uno?”

²² UYeesu ahamwamula uPeeteli ahati, “Inga nkwanza kuuti uno avhe mulanzi kufishila lwe nkugaluha, shooni she iwe izyo zikukutamwa? Iwe undandate ine.”

²³ Amazwi igo ge uYeesu áyanzile gahivwiha ku vhasundikwa avhinji, pe vhahasiivha kuuti umusundikwa uyo te ahaafwe. Ileelo uYeesu atámuvhuziizye umusundikwa uyo kuuti te ahaafwe, átili, “Inga nkwanza kuuti uno avhe mulanzi kufishila lwe nkugaluha, shooni she iwe izyo zikukutamwa?”

²⁴ Umusundikwa uyo we akuhomeshezya izi nu kuzisimba. Niiswe tumanyile kuuti zye akuhomeshezya zya nalyoli.

UYeesu ávhomvile ni zinji inyinji

²⁵ Ziliipo izinji inyinji zye uYeesu ávhomvile, ileelo zitasimviilwe. Inga zyonti zisimbwaje, nkulola kuuti insi yonti, nkandi yitali nu vhuzilo uvhwa kukwilana kusengula amakalaata gonti igo.