Yohani 20 - ULufingwi uLupwa

Kuzyuha ukwa Yeesu

¹ Inzanshi nkaani lwe kukuvhambunkana isiku ilya Pamulungu, uMaliiya uwa ku Magidaala ahasogola ku mbiipa iya Yeesu. Lwe aafiha, ahalola ivhwe lye vhágubishiliiye imbiipa, vhaligalagasiizye kufuma pa mulyango uwa mbiipa.

² Pe aheepa paala akushimbila kusogola kwa Siimoni uPeeteli nu musundikwa ula we uYeesu ámukunzite nkaani. Ahavhavhuuzya ahati, “Avhantu vhashinyatuuye ishaala isha Mwene wiitu mu mbiipa, havhili tutamanyile kwe vhashivhiisile!”

³ UPeeteli nu musundikwa uwamwavho uyo vhaheepa, vhahasogola ku mbiipa.

⁴ Lwe vhakusogola, vhonti vhavhili vhahashimbilaga, ileelo umusundikwa uwamwavho uyo ahashimbila kumuluusya uPeeteli, nu kulongolela kufiha ku mbiipa.

⁵ Lwe aafiha, ahiinama, ahinanjizya mu mbiipa, ahalola umwenda we vhámusyililiiye uYeesu, ileelo atahinjila mu mbiipa.

⁶ Pe woope uSiimoni uPeeteli ahalandata, ahafiha paala, ahinjila mu mbiipa nu kugaaga amenda ge vhámusyililiiye uYeesu.

⁷ Havhili ahashaaga ni shitambaala she vhámupinyile uYeesu kwi itwe. Ishitambaala isho shitáali pooka na menda aganji, sháali sheeka shipinte ku luvhazu.

⁸ Pe umusundikwa we álongoleeye kufiha paala, woope ahinjila mu mbiipa. Lwe ayeenya, ahiitiha zye áyivuuye,

⁹ mwe pe ahavhaliilizyo iho, avhasundikwa avha Yeesu vhápezile vhashiili kuzimanya izya mu Vhusimbe uVhufinjile zye zikuti uYeesu akwanzilwa kuzyuha.

¹⁰ Pe avhasundikwa ivho, vhahagaluha kwe vhahatendamaga.

UYeesu akumuloleshela uMaliiya uwa mu nkaaya iya Magidaala

¹¹ UMaliiya uwa ku Magidaala ahasyala ayimiliiye panzi pa mbiipa uku akukuuta. Lwe akukuuta, ahiinama kwinanjizya mu mbiipa,

¹² ahavhalola avhahavhizya vhavhili vhe vházwaye amenda amazelu, vhatendiime pe ku vhwandilo vhákasiizye ishaala isha Yeesu. Uhavhizya wumo átendiime uluvhazu ulwa kwi itwe, uwamwavho átendiime uluvhazu ulwa ku vinama.

¹³ Avhahavhizya ivho vhahamuvhuziilizya vhahati, “We maayi, shooni she ukukuuta?” Ahavhaamula ahati, “Avhantu vhamo vhefwizye ishaala isha Mwene waane, havhili ntamanyile kwe vhashivhiisile!”

¹⁴ Lwe uMaliiya ayanga izyo, ahashevhela mwisinda, ahamulola umuntu wumo ayimiliiye pepaala. Fwandi umuntu uyo áamile wu Yeesu, ileelo uMaliiya ápezile atamumanyile.

¹⁵ UYeesu ahamuvhuziilizya ahati, “We maayi, shooni she ukukuuta? Vhuli, ukumulondola unaanu?” UMaliiya ápezile akusiivha kuuti umuntu uyo áamile muvhomvi uwa mu shilimbika, pe ahamwamula ahati, “We mwene, inga weewe uyefwizye ishaala isha Yeesu, nkulaavha umbuuzye kwe ushivhiisile, insogole inshinyatule.”

¹⁶ UYeesu ahamwita izina lyakwe ahati, “We Maliiya!” Pe uMaliiya ahashevhela mwisinda, ahamulola uYeesu, ahamwita mu njango iya Shiyalaamu ahati, “Labooni!” Izina ili kwe kuuti, “Musambiilizi.”

¹⁷ UYeesu ahamuvhuuzya uMaliiya ahati, “Utahandeme, mwe pe nshiili kusogola ku mwanya kwa Taata. Ileelo sogoola uvhavhuuzye avhamwitu, kuuti nkuzuvha ku mwanya kwa Taata waane we wu Taata wiinyu, havhili kwa Mulungu waane we wu Mulungu wiinyu.”

¹⁸ Pe uMaliiya uwa ku Magidaala ahasogola ku vhasundikwa avha Yeesu, ahavhavhuuzya inongwa izi, ahati, “Yeenya, ine namulola uMwene!” Pe ahavhavhuuzya zyonti zye uYeesu ámulajiziizye.

UYeesu akuvhaloleshela avhasundikwa vhaakwe

¹⁹ Isiku lyeliila ilya Pamulungu hamazuuvha, lye lisiku ilya kwanda ilya mulungu, avhasundikwa avha Yeesu vhávhungiine mu nyumba yimo, nu kugalila amalyango, mwe pe vhahavhogopaga avhalongozi avha Vhayuuda. Poosye she amalyango gáamile magalile, uYeesu ahavhaloleshela, nu kwimiilila pahati yaavho, ahavhalamuha ahati, “Muvhe nu vhutehamu!”

²⁰ Lwe avhalamuha vhwevhulo, ahavhalolesya amavhamba aga mu nyoovhe ni lya pa luvhazu lwakwe. Lwe avhasundikwa vhaakwe vhamulola uMwene uYeesu, vhahaseshela nkaani.

²¹ UYeesu ahavhavhuuzya havhili ahati, “Uvhutehamu vhuvhe pooka niimwe! Inza vwe uTaata ánsonteleziizye ine, vhwevhulo niine nkuvhasonteelezya imwe.”

²² Pe ahavhapuutila umwuyu, ahavhavhuuzya ahati, “Posheeli uMupepo uMufinjile.

²³ Inga mukuvhaswila avhantu uvhutalamalandu vhwavho, woope uMulungu alivhaswila. Inga mutakuvhaswila, woope uMulungu te ahavhaswile.”

UYeesu akumuloleshela uToomasi

²⁴ Umusundikwa wumo mu vhasundikwa avha Yeesu, we izina lyakwe vhahatinji uToomasi, we vhahamwitaga vhahatinji Ipasa, atáamile pooka na vhasundikwa avhamwavho lwe uYeesu akuvhaloleshela.

²⁵ Pe avhasundikwa avhamwavho ivho vhahamuvhuuzya vhahati, “Iswe tumuvhwenyi uMwene.” Ileelo uweene ahavhaamula ahati, “Ine ntangiitiha izyo inga ntagalola amavhamba aga masumaali mu nyoovhe zyakwe, na pa luvhazu lwakwe, nu kumupalamansya ni nyoovhe yaane.”

²⁶ Lwe zyatuuha insiku 8 kufuma pe uYeesu ávhalolesheeye, avhasundikwa vhávhungiine pooka havhili mu nyumba yimo. Isiku ilyo uToomasi áamile pooka navho. Amalyango gáamile magalile, uYeesu ahavhaloleshela havhili, ahimiilila pahati yaavho, ahavhalamuha ahati, “Uvhutehamu vhuvhe pooka niimwe!”

²⁷ Pe ahamuvhuuzya uToomasi ahati, “We Toomasi, nzaaga umpalamansye ni nyoovhe yaaho mu nyoovhe zyane. Havhili, umpalamansye ni nyoovhe zyaho pa luvhazu lwane. Utahajendeelele kuvha we muntu we atakwitiha, nkandi uvhe we muntu we akwitiha.”

²⁸ UToomasi ahamwamula uYeesu ahati, “Iwe we Mwene waane, havhili iwe we Mulungu waane!”

²⁹ UYeesu ahamuvhuuzya ahati, “Wiitiha, mwe pe wandola. Vhalosiitwe vhe vhakwitiha ishisita kundola.”

Insiivho izya ikalaata ili

³⁰ UYeesu ávhomvile ivilolesyo ivinji ivwinji pilongolela ilya vhasundikwa vhaakwe, vwe vitasimviilwe mwi ikalaata ili.

³¹ Ileelo ivilolesyo vwe vili mwi ikalaata ili visimviilwe, inga mwitishe kuuti uYeesu wu Chilisiti, uMwana wa Mulungu, nu kuuti kwi idala ilya kumwitiha, mukuposheela uvhulanzi kwi izina lyakwe.