Yohani 15 - ULufingwi uLupwa

UYeesu ali inza impensya ilya nalyoli

¹ Pe uYeesu ahajendeelela kuvhasambiilizya avhasundikwa vhaakwe kuuti, “Ine indi inza ikwi ilya impensya ilya nalyoli, uTaata waane ali inza umulimi.

² Ulusamba lwonti lwe luli muli ine lwe lutakuhoma amantonongwa, uTaata akuludiba. Ileelo ulusamba lwe lukuhoma amantonongwa, uTaata akulupalulila, inga luhomaje ahinza.

³ Imwe mupaluliliilwe, kwe kuuti mwe vhazelu, mwe pe muzyitisile insambiilizyo zyane.

⁴ Mujendeelele kuvha pooka niine, niine kwe njendeelele kuvha pooka niimwe. Inza vwe ulusamba lutangaahoma amantonongwa lweka ishisita kuvha mwi impensya, niimwe mutangavhomba zye zikumuhondezya uMulungu ishisita kuvha muhati yaane.

⁵ “Ine indi inza ikwi ilya impensya, imwe mwe nsamba. Umuntu wonti we akuvha muhati yaane, niine nkuvha muhati yaakwe, uyo we akuhoma amantonongwa aminji, mwe pe ishisita ine mutangavhomba naashimo.

⁶ Umuntu wonti we atali muhati yaane, alisumbwa panzi inza vwe ulusamba lukusumbwa nu kwuma. Pe avhantu vhakulusevha nu kulusumba mu mwoto lukupwa.

⁷ Inga mwavha muhati yaane na mazwi gaane gavha muhati zyinyu, pe mulaavhaje kwa Taata shonti she mukwanza, woope aliivhapa.

⁸ Inga mukuhoma amantonongwa aminji, nu kuvha mwe vhasundikwa vhaane avha nalyoli, kwe mulolesyaje apazelu uvhushindamu uvhwa Taata waane.

⁹ Inza vwe uTaata ankunzite ine, vwe niine mbakunzite imwe. Ishi pe mujendeelele kuvha mu shikunzi shaane.

¹⁰ Inga mukuzilandata indajizyo zyane, pe kwe mujendeelele kuvha mu shikunzi shaane, inza vwe niine nkuzilandata indajizyo izya Taata waane nu kuvha mu shikunzi shaakwe.

¹¹ “Navhavhuuzya zyonti izyo, inga muvhe nu luseshelo inza ine, havhili museshelaje nkaani.

¹² Ululajizyo lwane kuli imwe lwa kuuti, mukundanaje inza vwe niine mbakunzite imwe.

¹³ Ataliipo umuntu we ali ni shikunzi ishipiti kuluusya ishikunzi isha muntu we akwitiha kufwa kuzya vhamanyani vhaakwe.

¹⁴ Inga mukuvhomba zye mbalajiziizye, kwe muvhe mwe vhamanyani vhaane.

¹⁵ Kwandila ishi, te mbiitaje havhili kuuti mwe vhazya vhaane, mwe pe umuzya atakumanya zye umwene waakwe akuvhomba. Ileelo imwe kwe mbiitaje kuuti mwe vhamanyani vhaane, mwe pe navhamanyisya zyonti zye nivuuye kufuma kwa Taata waane.

¹⁶ Te mwemwe mwánsavhuuye ine, ine ne návhasavhuuye imwe kuvha mwe vhasundikwa vhaane. Návhasavhuuye, inga mupaapaje amantonongwa ge gatakusila naalumo. Pe zyonti zye mukumulaavha uTaata uMulungu kwi izina lyane, aliivhapa.

¹⁷ Ishi nkuvhalajizya imwe kuuti, mukundanaje.”

Avhantu avha mu nsi vhakuvhaviitilwa vhe vhakumwitiha uYeesu

¹⁸ UYeesu ahajendeelela kuvhavhuuzya avhasundikwa vhaakwe ahati, “Inga avhantu avha mu nsi umu vhakuvhaviitilwa imwe, mukumbuhaje kuuti vhátalisile kumviitilwa ine.

¹⁹ Inga mwaamile mwe vhantu avha mu nsi umu, nkandi vhavhakunzite inza vwe vhavhakunzite avhantu vhaakwe. Ileelo imwe te mwe vha mu nsi umu, mwe pe mbasavhuuye kufuma mu nsi umu, ye nongwa avhantu avha mu nsi umu vhakuvhaviitilwa.

²⁰ Mukumbuhaje zye návhavhuziizye kuuti, ‘Umuzya te mupiti kuluusya umwene waakwe.’ Inga vhánjimvwizye ine, pe niimwe vhalivhayimvwa. Havhili inga vhakuzyitiha insambiilizyo zyane, pe ni zyinyu vhalizyitiha.

²¹ Ileelo vhalivhavhombela zyonti izyo, mwe pe mukulilandata izina lyane, havhili, mwe pe vhatamumanyile we ansonteleziizye.

²² Inga ntínzile nu kuyanga navho, nkandi vhatali nu vhutalamalandu. Ileelo ishi vhatangayiyanjila kuuti vhatali nu vhutalamalandu.

²³ Umuntu wonti we akumviitilwa ine, akumuviitilwa nu Taata waane.

²⁴ Mbomvile imbombo impiti zye umuntu inga wooka atahavhomba. Inga apele vhatazilolaje, nkandi vhatali nu vhutalamalandu. Ileelo ishi vhazivhwenyi zyonti zye mbomvile, ileelo poosye vhwevhulo vhali she vhakumviitilwa ine nu Taata waane.

²⁵ Izi zivhombesile, inga amazwi ge gasimviilwe mu Vhusimbe uVhufinjile galunjishe, mwe pe yisimviilwe kuuti, ‘Vhámuvitiliilwe vhweleele.’

²⁶ “Nkumutuma uMutuuli we wu Mupepo uMufinjile uwa kuvhalolesya avhantu vhonti uvhwanalyoli. Akufuma kwa Taata, havhili lwe aafiha kuli imwe, alivhahomeshezya uvhwanalyoli vhwane.

²⁷ Havhili, niimwe mulivhahomeshezyaga avhantu avhanji, mwe pe muli pooka niine kufuma ku vhwandilo.”