Yohani 14 - ULufingwi uLupwa

UYeesu lidala ilya kusogola kwa Taata

¹ Pe uYeesu ahajendeelela kuvhavhuuzya avhasundikwa vhaakwe kuuti, “Mutaswimililwaje mu mooyo giinyu. Mumumwitihaje uMulungu, munitihaje niine.

² Mu nyumba iya Taata waane muli uvhuzilo uvhupiti. Zitavhanje vhwevhulo, nkandi mbavhuziizye. Ishi nasogola kuvhasenganizyanya uvhuzilo. Zitavhanje vhwevhulo, nkandi mbavhuziizye. Ishi nasogola kuvhasenganizyanya uvhuzilo.

³ Lwe nasogola nu kuvhasenganizanya uvhuzilo, ndigaluha havhili kuvhanyatula, inga pe navha, niimwe muvhe pooka niine.

⁴ Imwe mulimanyile idala lye likufiha kwe nkusogola.”

⁵ Pe uToomasi ahamuvhuziilizya uYeesu ahati, “We Mwene, iswe tutamanyile kwe ukusogola. Pe tungalimanya idala inza vhuli?”

⁶ UYeesu ahamwamula ahati, “Ine ne ne lidala nu vhwanalyoli, havhili ne vhulanzi. Ataliipo umuntu we anginza kwa Taata, inga atatuushila ku kwane.

⁷ Inga mwaamanyile ine, nkandi mumumanyile nu Taata waane. Kwandila ishi, mumumanyile uTaata, havhili mumuvhwenyi.”

⁸ Pe uFiilipo ahamuvhuuzya uYeesu ahati, “We Mwene, tukukulaavha utulanje uTaata. Inga watulanga, lwe waamala zyonti.”

⁹ UYeesu ahamwamula ahati, “We Fiilipo, natendama niimwe ahavhaliilizyo ahatali honti iha, niishi ushiili utamanyile? Umuntu wonti we ambwenyi ine, amuvhwenyi nu Taata. Ishi pe shooni she ukuti, ‘Utulanje uTaata’?

¹⁰ Vhuli, utakwitiha kuuti ine indi muhati ya Taata, woope uTaata ali muhati yaane? Amazwi iga ge nkuvhavhuuzya ntakuyanga ku maha gaane neene, uTaata we ali mu mwane we akuvhomba imbombo zyonti izi.

¹¹ Mwitishe zye nkuyanga kuuti, indi muhati ya Taata waane, nu kuuti woope ali muhati yaane. Ileelo inga mutakwitiha zye nkuyanga, pe mwitishe ku mbombo zye nkuzivhomba.

¹² Nalyoli nkuvhavhuuzya kuuti, umuntu wonti we akuniitiha, kuuti avhombaje imbombo zye niine nkuvhomba. Havhili kwe avhombaje ni mpiti kuluusya zye nkuvhomba, mwe pe nkusogola kwa Taata.

¹³ Inga mukulaavha ishintu shonti kwi izina lyane, niine kwe mbombaje inza vwe mukulaavha. Kwi idala ilyo, nkulolesya uvhushindamu uvhwa Taata vwe vhuli.

¹⁴ Inga mukundaavha ishintu shonti kwi izina lyane, kwe mbombaje inza vwe mukundaavha.”

UYeesu akuyanga izya kwinza ukwa Mupepo uMufinjile

¹⁵ UYeesu ahati, “Inga munkunzite, kwe muzilandataje indajizyo zyane.

¹⁶ Pe niine kwe imulaavhe uTaata kuuti aavhape uMutuuli uwamwavho, havhili uyo, kuuti avhe pooka niimwe shiima.

¹⁷ UMutuuli uyo we Mupepo we alivhalolesya avhantu uvhwanalyoli. Avhantu vhe vhakumuhaana uMulungu vhatangamuposheela uMupepo uyo, mwe pe vhatakumulola, havhili vhatamumanyile. Ileelo imwe mumumanyile, mwe pe akuvha pooka niimwe, woope alitendama muhati zyinyu.

¹⁸ Te mbaleshe mweka ngati mwe vhantaagwa, kwe ninze havhili kuli imwe.

¹⁹ Hasyala ahavhaliilizyo hansi te nkaloleshe mu nsi umu. Ileelo imwe mulindola, mwe pe ine ndiivha ne mulanzi, niimwe muliivha mwe vhalanzi.

²⁰ Isiku ilyo, muliimanya kuuti ine indi muhati iya Taata waane, niimwe muli muhati yaane, niine indi muhati yiinyu.

²¹ Umuntu wonti we azimanyile nu kuzivhombela imbombo zye nkulajizya, uyo we ankunzite. Woope umuntu wonti we ankunzite ine, uTaata akumukunda. Niine nkumukunda havhili ndiyilolesya apazelu ku kwakwe.”

²² Pe umusundikwa wumo we izina lyakwe vhahatinji uYuuda we te wa ku Kaalyoti, ahamuvhuziilizya uYeesu ahati, “We Mwene, yingavha inza vhuli kuyilolesya kuli iswe, ileelo utahayilolesye ku vhantu avhanji vhonti?”

²³ UYeesu ahamwamula ahati, “Umuntu wonti we ankunzite ine, kwe azivhombelaje imbombo zye nkumulajizya. Woope uTaata waane kwe amukundaje umuntu uyo, havhili ine nu Taata waane tuliyinza ku kwakwe nu kutendama pooka nawo.

²⁴ Ileelo umuntu wonti we atankunzite ine, atakuzivhombela imbombo zye nkumulajizya. Amazwi ge nkuvhalajizya te gaane, gakufuma kwa Taata we ansonteleziizye kuli imwe.

²⁵ “Navhavhuuzya zyonti izyo lwe indi she nkutendama niimwe.

²⁶ Ileelo uMutuuli uyo, kwe kuuti uMupepo uMufinjile, we uTaata kwe amutume kuli imwe kwi izina lyane, we alivhasambiilizya nu kuvhakumbusya zyonti zye nkavhavhuzyaga.

²⁷ Lwe nkwepa, nkuvhaleshela uvhutehamu vhwane. Nkuvhaleshela uvhutehamu vhwe vhutali inza vhwe vhukufuma ku vhantu vhe vhakumuhaana uMulungu. Mutaswimililwaje mu mooyo giinyu, havhili mutogopaje.

²⁸ Mwivuuye vwe nkuvhavhuuzya kuuti, ‘Nasogola, ileelo kwe ninze kuli imwe.’ Inga nalyoli munkunzite, nkandi mukuseshela lwe mukwivwa kuuti nkusogola kwa Taata, mwe pe uTaata mupiti kunduusya ine.

²⁹ Navhavhuuzya zyonti izyo ahavhaliilizyo iha lwe zishiili kufumila, inga lwe zyinza zyafumila, muhanitihaje.

³⁰ Te njanje niimwe ahavhaliilizyo ahatali, mwe pe umupiti uwa nsi, kwe kuuti uSeetano akwinza, ileelo atali na maha kuli ine.

³¹ Zye nkuzivhomba zye uTaata ándajiziizye kuzivhomba, inga avhantu vhonti avha mu nsi umu vhamanye kuuti imukunzite. Ishi yimiliili, twepe ipa.”