Yohani 12 - ULufingwi uLupwa

UMaliiya akumwitiilizya uYeesu amafuta

¹ Lwe zyasyala insiku 6 ishikulukuulu isha Pasaaka kufiha, uYeesu ahasogola havhili ku Besaniya, inkaaya ye ahalandilaga uLaazalo we uYeesu ámuzyusiizye.

² Pe avhantu vhamo avha paala vhahamusenganizanya uYeesu ishaakulya isha hamazuuvha. UMaalita we ahamuvhombelaga. ULaazalo áamile wooka mu vhajeni vhe vhátendiime pa meeza pooka nu Yeesu.

³ Pe uMaliiya ahanyatula insupa iya mafuta aga nsavho impiti havhili ge gakununshila, ahamwitiilizya uYeesu mu vinama vwakwe nu kumusyumula ni nsisi zyakwe. Inyumba yonti yihiizula umununsi umwinza uwa mafuta igo.

⁴ Ileelo wooka mu vhasundikwa vhaakwe, uYuuda we ahafumaga mu nkaaya iya Kaalyoti, we pisinda ámwaniliiye uYeesu, ahayanga ahati,

⁵ “Yaamile hinza kukazya amafuta igo ku dinaali 300 nu kuuvhapa avhapiina zyenezyo.”

⁶ UYuuda áyanzile vhwevhulo, te kuuti, mwe pe ahavhafwilaga uvhwila avhapiina, nkandi, mwe pe áamile mwivha. Uweene we ahasengulaga imfuuku iya mpiiya, ahiivhaga impiiya mu mfuuku iyo nu kuzivhombela wuuyo weeka.

⁷ Pe uYeesu ahayanga ahati, “Muleshi! Uweene akazile amafuta igo kuzya kunsengaanya pi isiku ilya kunsyila.

⁸ Avhapiina muli navho insiku zyonti, ileelo ine te mbe niimwe insiku zyonti.”

Avhalongozi avha Vhayuuda vhakupanzanya kumugoga uLaazalo

⁹ Lwe ivhungaana ilya vhantu lyamanya kuuti uYeesu ali mu nkaaya iya Besaniya, lihasogola te kwe kumwenya uYeesu vhweleele, nkandi nu kumwenya uLaazalo we uYeesu ámuzyusiizye.

¹⁰ Pe avhalongozi avha Vhayuuda vhahalondola idala ilya kumugoga uLaazalo woope.

¹¹ Vhávhomvile vhwevhulo, mwe pe kufumiilana ni nongwa izya kuzyuha ukwa Laazalo, aVhayuuda avhinji vhásambusile ku vhalongozi vhaavho, nu kumwitiha uYeesu.

UYeesu akwinjila mu Yelusaleemu nu ludovhelo

¹² Indaavhi yaakwe, ivhungaana ipiti ilya vhantu vhe vhínzile ku shikulukuulu isha Pasaaka vhahiivwa kuuti uYeesu ali mwi idala akwinza mu Yelusaleemu.

¹³ Pe vhahanyatula insamba izya matende, vhaheepa kusogola kumuposheela uYeesu. Vhahanda kuvhilishila kwi izwi, vhahati, “Ashindikwaje uMulungu! Alosiitwe we akwinza kwi izina ilya MWENE uMulungu! Alosiitwe uMwene uwa Vhaisilayeeli.”

¹⁴ Pe uYeesu ahayaaga inyaana iya ndogomi, ahalimbila pamwanya inza vwe yisimviilwe mu Vhusimbe uVhufinjile kuuti,

¹⁵ “Mwe vhantu avha mu nkaaya iya Sayuuni, mutogopaje! Yeenya, uMwene wiinyu akwinza, alimbiiye pa ndogomi inyaana!”

¹⁶ Ahavhaliilizyo iho, avhasundikwa avha Yeesu vhatámanyile izyo. Ileelo lwe uMulungu alolesya apazelu uvhushindamu uvhwa Yeesu, pe vhahakumbuha kuuti izyo zyásimviilwe mu Vhusimbe uVhufinjile ku zyakwe na vwe avhantu vhámuvhombeeye.

¹⁷ Ivhungaana ilya vhantu lye lyámile pooka nu Yeesu lwe akumwita uLaazalo kufuma mu mbiipa, lyákumusiizye inongwa izyo.

¹⁸ Kufumiilana niizyo, avhantu ivhungaana vhápezile vhivuuye izya shilolesyo she uYeesu ávhomvile, ye nongwa vhápezile vheefile mu Yelusaleemu kusogola kumuposheela.

¹⁹ Lwe aVhafalisaayi vhaalola vwe avhantu vhamuposheela uYeesu, vhahavhuzilizanya vhuuvho vheeka vhahati, “Vhuli, mwalola? Tutangavhomba naashimo! Yeenya, avhantu vhonti vhakumulandata uweene.”

UYeesu akukuvhwa izya kufwa kwakwe

²⁰ Kwáli avhantu vhamo vhe te Vhayuuda vhe vhoope vhásogooye mu Yelusaleemu kumupuuta uMulungu ahavhaliilizyo aha shikulukuulu isha Pasaaka.

²¹ Avhantu ivho vhahasogola kwa Fiilipo uwa mu nkaaya iya Betisaayida mu shigavho isha nsi isha Galilaaya, vhahamulaavha vhahati, “We mwene, tukulaavha tuyanje nu Yeesu.”

²² UFiilipo ahasogola kumuvhuuzya uAndeleeya, pe vhonti uFiilipo nu Andeleeya vhahasogola kumuvhuuzya uYeesu.

²³ UYeesu ahavhaamula ahati, “Ishi ahavhaliilizyo haafiha aha vhushindamu vhwane ne Mwana wa Aadamu kuloleha.

²⁴ Nalyoli nkuvhavhuuzya kuuti, inga imbeyu yitafushilwa pansi inza umuntu we afuuye, yitangaamela, nkandi inga yafushilwa, pe yikumela nu kupaapa amantonongwa aminji.

²⁵ Umuntu wonti we akusungwa kuvhupoha uvhulanzi vhwakwe, alivhulovwa. Ileelo umuntu wonti we akuvhuviitilwa uvhulanzi vhwakwe ku zyane mu nsi ino, alivhwaga uvhulanzi uvhwa shiima.

²⁶ Umuntu wonti we akumbombela ine, akwanzilwa andandate. Yeenya, ponti pe indi, nu muvhomvi waane kwe avhanje. Havhili uTaata alimushindiha umuntu wonti we akumbombela ine.

²⁷ “Ishi nanda kuswimiililwa nkaani mu mwoyo waane. Ishi inti vhuli? Vhuli, inti, ‘We Taata, nkukulaavha umposhe mu havhaliilizyo iha aha mayimba’? Ndaali, ntangalaavha inza isho, mwe pe ninzile mu nsi umu kuyimba.

²⁸ We Taata, ulolesye uvhushindamu uvhwa izina lyaho ku vhantu.” Pe izwi lihafuma ku mwanya kwa Mulungu lihati, “Nalolesya uvhushindamu uvhwa izina lyane, havhili kwe njendeelele kulolesya.”

²⁹ Pe ivhungaana ilya vhantu vhe vháliipo paala lwe vhiivwa izwi kufuma ku mwanya, vhamo vhahati, “Imvula yajilima,” avhamwavho vhahati, “Uhavhizya uwa Mulungu ayanga nawo.”

³⁰ Ileelo uYeesu ahavhavhuuzya avhantu ivho ahati, “Izwi lye mwalyivwa kufuma ku mwanya te lya kunaavwa ine, lya kuvhaavwa imwe.

³¹ Ishi ahavhaliilizyo haafiha aha Mulungu kuvhalonga avhantu avha mu nsi umu, havhili aha kumusumba kunzi uSeetano we mupiti uwa nsi ino.

³² Ileelo ine lwe vhanzuvwa pa shihovhenkanyo, ndivhavhiiha avhantu vhonti vhinze ku kwane.”

³³ UYeesu áyanzile vhwevhulo kulolesya vwe aliifwa.

³⁴ Pe ivhungaana ilya vhantu lihamwamula uYeesu lihati, “Tuvhaziizye mu Vhusimbe uVhufinjile kuuti, uChilisiti alilandila shiima. Ishi shooni she ukuti avhantu kwe vhamuzuvwe uMwana wa Aadamu? Vhuli, uMwana uwa Aadamu wu naanu?”

³⁵ UYeesu ahavhavhuuzya ahati, “Uvhuzelu vhukuvha pooka niimwe ahavhaliilizyo hansi vhweleele. Mujendeelele kujenda mu vhuzelu uvhwo lwe vhuliipo, inga ishiisi shitahinze shivhapoote, mwe pe umuntu we akujenda mu shiisi, atakumanya kwe akusogola.

³⁶ Ishi muvhiihaje ulusuuvhilo lwinyu mu vhuzelu uvhwo, inga muvhanje mwe vhantu vhe vhakulongolwa nu vhuzelu.” Lwe uYeesu ayanga amazwi igo, ahayileha impuga yiila, ahasogola, ahazyihama.

AVhayuuda avhinji vhakuhaana kumwitiha uYeesu

³⁷ Pooka nu kuuti uYeesu ávhomvile ivilolesyo ivwinji pilongolela lyavho, ileelo avhantu vhatámwitisile.

³⁸ Zyáli inza vhwevhulo, inga amazwi galunjishe ge umukuvhwi uYisaayi áyanzile átili, “We MWENE Mulungu, wu naanu we áyitisile izwi lye twálumbiliiye? Havhili, uMWENE amulolesiizye unaanu amaha gaakwe?”

³⁹ Vhatámwitisile, mwe pe uMulungu áyanzile kutuushila kwa mukuvhwi uYisaayi kuuti,

⁴⁰ “Avhavhiisile uvhwantonko, na mooyo gaavho agavhiisile kuvha magomu, inga aminso gaavho gatalolaje na mooyo gaavho gatamanyaje, inga vhatahinze vhagalushe ku kwane imbaposhe.”

⁴¹ UYisaayi áyanzile izyo, mwe pe ávhuvhwenyi uvhushindamu uvhwa Yeesu, pe ahayanga inongwa zyakwe.

⁴² Poosye vhwevhulo, avhinji mu vhapiti avha Vhayuuda vhámwitisile uYeesu, ileelo vhatahayangaga apazelu kuuti vhamwitisile, mwe pe vhahogopaga kuuti aVhafalisaayi vhatahavhashimbizye mwi isinagoogi.

⁴³ Avhalongozi ivho vhahasungwaga nkaani kushindikwa na vhantu kuluusya kushindikwa nu Mulungu.

Avhantu vhalilongwa kuzya mazwi aga Yeesu

⁴⁴ Pe uYeesu ahayanga kwi izwi ipiti ahati, “Umuntu we akuniitiha ine, atakuniitiha neneene vhweleele, akumwitiha na ula we ansonteleziizye.

⁴⁵ Umuntu wonti we akundola ine, akumulola na we ansonteleziizye.

⁴⁶ Ine ninzile mu nsi umu, inga mbe ne vhuzelu ku vhantu, inga umuntu wonti we akuniitiha ine atatendamaje mu shiisi.

⁴⁷ Umuntu we akugiivwa amazwi gaane, ileelo atakugalema, te nkamulonje, mwe pe ntínzile kuvhalonga avhantu, nkandi nínzile kuvhapoha.

⁴⁸ Umuntu wonti we akunkaana ine pooka na mazwi gaane, ali nawo uwa kumulonga. Amazwi igo ge nkugayanga, ge galimulonga pi isiku ilya kumpeleela.

⁴⁹ Nkuyanga vhwevhulo, mwe pe ntayanzile ku maha gaane neene, uTaata we ansonteleziizye, we andajiziizye izya kuyanga na vwe yikwanzilwa kuyanga.

⁵⁰ Havhili, imanyile kuuti indajizyo zyakwe zikuuvhapa avhantu uvhulanzi uvhwa shiima. Pe niine nkuyanga zyeziila zye uTaata waane andajiziizye kuyanga.”