Yohani 11 - ULufingwi uLupwa

Uvhufwe uvhwa Laazalo

¹ Kwáli umuntu wumo we izina lyakwe vhahatinji uLaazalo. ULaazalo áamile muvhinu. Umuntu uyo ahatendamaga mu lutala ulwa Besaniya pooka na vhanine avhalindu avha Maliiya nu Maalita.

² UMaliiya uyo, umunine uwa Laazalo we áamile muvhinu, we ámupasile uMwene uYeesu amafuta ge gakununshila mu vinama vwakwe nu kumusyumula ni nsisi zyakwe.

³ Pe avhanine ivho vhahatuma intumi kwa Yeesu kumuvhuuzya kuuti, “We Mwene, unkundwa waaho uLaazalo muvhinu.”

⁴ Lwe uYeesu ayiivwa intumi iyo, ahayanga ahati, “Uvhuvhinu uvhu te vhwa kumugoga uLaazalo, vhwa kulolesya uvhushindamu uvhwa Mulungu, inga avhantu vhanshindishe ine ne Mwana waakwe kutuushila uvhuvhinu uvhwo.”

⁵ UYeesu ámukunzite nkaani uMaalita na vhanine vhaakwe uMaliiya nu Laazalo.

⁶ Ileelo lwe uYeesu ayiivwa kuuti uLaazalo muvhinu, ahonjezya kutendama paala insiku zivhili.

⁷ Pe lwe insiku zivhili izyo zyatuuha, uYeesu ahavhavhuuzya avhasundikwa vhaakwe ahati, “Tujendi havhili mu shigavho isha nsi isha Yudeeya.”

⁸ Avhasundikwa vhaakwe vhahamuvhuziilizya vhahati, “We Musambiilizi, shiniishi vhweleele aVhayuuda vhamo vhanzaga kukuhoma na mavhwe kuuti ufwe kunuukwo. Ishi shooni she ukwanza kusogola havhili?”

⁹ UYeesu ahavhaamula ahati, “Vhuli, umusanya wutali na masaala 12? Inga umuntu akujenda ahavhaliilizyo iho atangapunula, mwe pe uvhuzelu vhukumuhozezya, akuvilola ivintu vwonti.

¹⁰ Ileelo umuntu we akujenda uvhusiku akupunula, mwe pe uvhuzelu uvhwa kumwavwa vhutakuvha.”

¹¹ Lwe uYeesu aamala kuyanga izyo, ahajendeelela kuvhavhuuzya avhasundikwa vhaakwe ahati, “Unkundwa wiitu uLaazalo akaasite, ileelo kwe nsogole kumudaamusya.”

¹² Pe avhasundikwa vhaakwe vhahamwamula vhahati, “We Mwene, inga akaasite tulo, kwe apone.”

¹³ UYeesu ipa ahayangaga kuuti uLaazalo afuuye, ileelo avhasundikwa vhaakwe vhahasiivhaga kuuti akuyanga kuuti akaasite tulo.

¹⁴ Pe uYeesu ahavhavhuuzya apazelu avhasundikwa vhaakwe ahati, “ULaazalo afuuye.

¹⁵ Ileelo ine naseshela ku zyinyu, mwe pe ntaaliipo lwe uLaazalo akufwa, inga imwe muvhe nu lwitiho ulupiti kuli ine. Ishi tujendi ku kwakwe.”

¹⁶ Pe umusundikwa wumo we izina lyakwe vhahatinji uToomasi, havhili we vhahamwitaga vhahatinji Ipasa, ahavhavhuuzya avhasundikwa avhamwavho ahati, “Niiswe tujendi inga tusogole tufwe pooka nawo.”

UYeesu ali na maha aga kuvhazyusya avhafwe

¹⁷ Lwe uYeesu aafiha mu lutala ulwa Besaniya, ahaaga uLaazalo ali ni nsiku zine mu mbiipa.

¹⁸ Ulutala ulwa Besaniya lwáli ikilomiita zitatu ishi kufuma mu nkaaya iya Yelusaleemu.

¹⁹ AVhayuuda avhinji vhínzile mu Besaniya kuvhasuvhaalizya avha Maalita nu Maliiya kuzya vhufwe uvhwa munine waavho uLaazalo.

²⁰ Lwe avhantu vhamuvhuuzya uMaalita kuuti uYeesu ali mwi idala akwinza, ahafuma kunzi nu kusogola kumuposheela, ileelo uMaliiya ahasyala pahaaya.

²¹ Lwe uMaalita ahomaana nu Yeesu, ahamuvhuuzya ahati, “We Mwene, inga waalipo ipa, umunine waane, nkandi atafuuye.

²² Ileelo poosye ishi imanyile kuuti, shonti she ungamulaavha uMulungu, kwe aakupe.”

²³ Pe uYeesu ahamwamula uMaalita ahati, “Umunine waaho kwe azyushe.”

²⁴ UMaalita ahamwamula uYeesu ahati, “We Mwene, imanyile kuuti, uMulungu lwe akuvhazyusya avhantu vhonti isiku ilya kumpeleela, woope alizyuha.”

²⁵ UYeesu ahamwamula uMaalita ahati, “Ine ne nkuzyusya, havhili ne nkupa uvhulanzi. Umuntu wonti we akuniitiha ine, poosye inga aafwa, aliivha mulanzi.

²⁶ Woope we mulanzi, havhili akuniitiha ine, te ahaafwe naalumo. Vhuli, ukuzyitiha izyo?”

²⁷ UMaalita ahamwamula uYeesu ahati, “Mwe muumwo Mwene, niitiha kuuti iwe we Chilisiti, uMwana wa Mulungu we ukwinza mu nsi umu kufuma kwa Mulungu.”

UYeesu akukuuta

²⁸ Lwe uMaalita ayanga izyo, ahasogola kumwita umunine waakwe uMaliiya, ahamuvhuuzya kukwilu ahati, “UMusambiilizi aliipo ipa, akukwita.”

²⁹ Lwe uMaliiya ayiivwa izyo, ahimiilila naluvhiilo nu kusogola kwa Yeesu.

³⁰ UYeesu áshiili kwinjila mu lutala ulwa Besaniya, áamile kumo kwe uMaalita ásogooye kumuposheela.

³¹ Lwe avhantu vhaala vhe vhásogooye kumusuvhaalizya uMaliiya vhamulola akuvhuuha nu kufuma panzi, pe vhahanda kumulandata, mwe pe vhahasiivhaga kuuti uMaliiya asogola ku mbiipa kukuuta.

³² Lwe uMaliiya aafiha pe uYeesu áamile, ahamulola, ahasugamila pa vinama vwakwe uku akukuuta, ahamuvhuuzya ahati, “We Mwene, inga uvhanje ipa, umunine waane, nkandi atafuuye.”

³³ Lwe uYeesu amulola uMaliiya akukuuta na vhantu vhe vhínzile nawo, vhoope vhakukuuta, ahaswimiililwa nkaani mu mwoyo waakwe.

³⁴ Pe uYeesu ahavhavhuziilizya ahati, “Mumusyiliiye kwoshi?” Vhahamwamula vhahati, “We Mwene, tujende tukulanje.”

³⁵ UYeesu ahakuuta.

³⁶ Pe aVhayuuda vhe vhínzile pa mpungo, vhahayanga vhahati, “Yeenya vwe uYeesu aamukunzite uLaazalo!”

³⁷ Ileelo vhamo vhahayanga vhahati, “Umuntu uno we ámuponiizye untonko, ishi pe shooni she atavhombaga shimo, inga uLaazalo atahaafwe?”

UYeesu akumuzyusya uLaazalo

³⁸ Lwe uYeesu ali she aswimiliilwe mu mwoyo waakwe, ahafiha pa mbiipa pe vhámusyiliiye uLaazalo. Imbiipa iyo yáamile lishembo lye vhágubishiiye ni ivhwe ipiti pa mulyango.

³⁹ UYeesu ahavhavhuuzya avhantu vhe vháliipo paala ahati, “Lyefwi ivhwe ilyo pa mulyango.” UMaalita we áamile munine wa we áfuuye ahamwamula uYeesu ahati, “We Mwene, kufiha ahavhaliilizyo iha ataliha kununka, mwe pe zyatuuha insiku zine kufuma pe twaamusyiliiye.”

⁴⁰ UYeesu ahamwamula uMaalita ahati, “Ine nkuvhuziizye kuuti inga ukwitiha, kwe uvhulole uvhushindamu uvhwa Mulungu vwe vhuli.”

⁴¹ Pe avhantu vhe vháliipo paala, vhahalyefwa ivhwe liila lye lyáli pa mulyango. UYeesu aheenya ku mwanya, ahalaavha kwa Mulungu ahati, “We Taata, nkukusalifwa, mwe pe watejeelezya impuuto zyane.

⁴² Imanyile kuuti, ukuntejelezyaga ahavhaliilizyo honti, ileelo nkuyanga izi kuzya ivhungaana ilya vhantu ivha, inga vhiitishe kuuti iwe we unsonteleziizye.”

⁴³ Lwe uYeesu ayanga izyo, ahavhilishila kwi izwi ipiti ahati, “We Laazalo, fuma kunzi!”

⁴⁴ Pe ahafuma mu mbiipa ivinama ni nyoovhe zyakwe vhazizinzile na menda aga kusyilila. Havhili, áamile nu mwenda we vhámupinyile ku minso. Pe uYeesu ahavhavhuuzya avhantu ivho ahati, “Musatuli amenda igo nu kumuleha kuuti asogolaje.”

Avhalongozi avha Vhayuuda vhakupanzanya kumugoga uYeesu

⁴⁵ Lwe aVhayuuda avhinji vhe vhínzile kumusuvhaalizya uMaliiya vhazilola zye uYeesu avhomba, vhahamwitiha.

⁴⁶ Ileelo vhamo vhahasogola ku Vhafalisaayi nu kuvhavhuuzya zye uYeesu ávhomvile.

⁴⁷ Pe avhapiti avha vhapuuti na Vhafalisaayi vhahavhungaana pa lukuvhato lwe vhahatinji iSaniheediliini, vhahavhuzilizanya vhuuvho vheeka vhahati, “Vhuli, tuvhombe ishooni? Yeenya, umuntu uno akuvhomba ivilolesyo ivwinji.

⁴⁸ Inga twamuleha vhweleele kuuti avhombaje ivilolesyo ivwo, avhantu vhonti kwe vhamwitishe. Pe aVhaluumi kwe vhinze kunanganya iNyumba iMfinjile ni nsi yiitu.”

⁴⁹ Pe wumo mu vhapiti ivho we izina lyakwe vhahatinji uKayaafa, we umwaha uwo áamile mupuuti umupiti, ahayanga ahati, “Imwe mutamanyile naashimo!

⁵⁰ Vhuli, mutamanyile kuuti hinza kuli imwe kuuti umuntu wooka afwe kuzya vhantu vhonti, kuluusya kuuti insi yonti yilovhe?”

⁵¹ UKayaafa atáyanzile izyo ku lukasamo lwakwe. Ileelo, mwe pe áali mupuuti umupiti umwaha uwo, akuvile kuuti uYeesu kwe afwe kuzya Vhayuuda.

⁵² Havhili uYeesu te kuuti afwe kuzya Vhayuuda vheeka vhweleele, nkandi na kuzya kuuti avhavhungaanishe avhaana vha Mulungu vhe vhasaasite, inga vhavhe pooka.

⁵³ Pe kufuma isiku ilyo, avhalongozi avha Vhayuuda vhahanda kulondola idala ilya kumugoga uYeesu.

⁵⁴ Kuli izyo, uYeesu ahaleha kujenda apazelu mu shigavho isha nsi isha Yudeeya, pe aheepa nu kusogola papiipi nu luugwa, mu nkaaya iya Eefulayimu. Ahatendama ukwo pooka na vhasundikwa vhaakwe.

⁵⁵ Ishikulukuulu isha Vhayuuda isha Pasaaka shápalamiiye. Pe avhantu avhinji vhaheepa mu nkaaya zyavho kusogola mu Yelusaleemu, inga vhayizelufwe.

⁵⁶ Pe avhalongozi avha Vhayuuda vhahajendeelela kumulondola uYeesu. Lwe vhavhungaana pa Nyumba iMfinjile, vhahanda kuvhuzilizanya vhuuvho vheeka kuuti, “Imwe mukulola vhuli? Umuntu uno kwe ayinze ku shikulukuulu, pamo te ayinze?”

⁵⁷ Pe avhapiti avha vhapuuti na Vhafalisaayi vhahalajizya kuuti umuntu wonti inga aamanya kwe uYeesu ali, asogole avhavhuuzye, inga vhamuleme.