Yohani 10 - ULufingwi uLupwa

Ishiholanyo isha mudiimi umwinza

¹ UYeesu ahajendeelela kuyanga na Vhafalisaayi vhaala ahati, “Nalyoli nkuvhavhuuzya kuuti, umuntu wonti we atakwinjiilila pa mulyango uwa ivhiji ilya ngʼonzi, ileelo akwinjiilila apanji, umuntu uyo mwivha, havhili mupumula vintu.

² Ileelo umuntu we akwinjiilila pa mulyango uwa ivhiji, uyo we mudiimi uwa ngʼonzi.

³ Umuguulizi uwa ivhiji akumwigulila umulyango umudiimi uyo uwa ngʼonzi. Lwe umudiimi uyo akuzyita ingʼonzi, zyope zikwivwa izwi lyakwe. Lwe akuzifumwa panzi, akuyiita ingʼonzi yaakwe yooka yooka izina lyakwe.

⁴ Inga azifumwa ingʼonzi zyakwe zyonti panzi, akuzilongolela kwilongolela, zyope zikumulandata, mwe pe zilimanyile izwi lyakwe.

⁵ Ingʼonzi zitangamulandata umuntu umujeni, zikumushimbila, mwe pe zitalimanyile izwi lyakwe.”

⁶ UYeesu ávhavhuziizye aVhafalisaayi ishiholanyo ishi, ileelo avheene vhatámanyile zye ahavhavhuzyaga.

⁷ Pe uYeesu ahayanga havhili ahati, “Nalyoli nkuvhavhuuzya kuuti, ine indi inza umulyango uwo, we ingʼonzi zikwinjiilila mwi ivhiji.

⁸ Vhonti vhe vhándongoleeye, vhiivha, havhili vhapumula vintu, ileelo ingʼonzi zitávhatejeleziizye.

⁹ Ine indi inza umulyango uwo. Umuntu wonti we akwinjila mwi ivhiji kutuushila ku kwane akupokwa, havhili akuvha musatushe kwinjila nu kufuma, kusogola kwi isole ilyinza.

¹⁰ Umwivha akwinza ni nsiivho izya kwivha nu kugoga nu kunanganya. Ileelo ine ninzile, inga zivhe nu vhulanzi, havhili zivhe navhwo ku vhwinji.

¹¹ “Ine ne mudiimi umwinza. Umudiimi umwinza akuyifumwa kufwa kuzipoha ingʼonzi zyakwe.

¹² Umuntu we muvhomba mbombo, ni ngʼonzi te zyakwe, inga aalola impumpi zikwinza, akushimbila nu kuzileha ingʼonzi zyeka. Pe impumpi zikulema ingʼonzi zimo, ni zyamwavho zikusaata.

¹³ Umuvhomba mbombo uyo akushimbila, mwe pe atakuzisaajila ingʼonzi izyo.

¹⁴ Ine ne mudiimi umwinza. Ingʼonzi zyane nzimanyile ahinza, zyope zimanyile ine.

¹⁵ Inza vwe uTaata amanyile ine, niine imumanyile uweene. Ine nkuyifumwa kufwa kuzipoha ingʼonzi zyane.

¹⁶ Ine indi ni ngʼonzi izyamwavho zye naazimo mwi ivhiji ili, zyope nkwanzilwa inzileete umu. Ingʼonzi izyo, zyope kwe zilimanye izwi lyane. Kwi idala ilyo, kwe yivhe impuga yooka nu mudiimi wooka.

¹⁷ “UTaata ankunzite, mwe pe nkuvhufumwa uvhulanzi vhwane, inga mbwaje havhili.

¹⁸ Ataliipo umuntu we angamfwula uvhulanzi vhwane. Ine ne nkusaavhula kuvhufumwa uvhulanzi vhwane. Ine indi na maha aga kuvhufumwa uvhulanzi vhwane, havhili indi na maha aga kuvha ne mulanzi havhili. Nkuyanga vhwevhulo, mwe pe uTaata waane we andajiziizye kuvhomba vhwevhulo.”

¹⁹ Lwe aVhayuuda vhiivwa amazwi igo, vhahasugaana insiivho.

²⁰ Avhinji mu Vhayuuda ivho vhahayanga vhahati, “Uno ali ni mpepo inkandamanu ye yimuvhiisile kuvha wu shipena. Kuli lilonka vhuli kumutejeelezya umuntu uno?”

²¹ Ileelo vhamo vhahayanga vhahati, “Umuntu we ali ni mpepo inkandamanu atangayanga amazwi inza igo. Vhuli, impepo inkandamanu yingamuvhiiha untonko kuuti alolaje?”

AVhayuuda vhakumuhaana uYeesu

²² Pe ahavhaliilizyo aha shikulukuulu isha Vhayuuda isha kukumbuha kuyizigula iNyumba iMfinjile ku Yelusaleemu, hahafiha. Ahavhaliilizyo iho háamile ha lupepu.

²³ UYeesu ahazyunguulaga pa Nyumba iMfinjile mwi idala lye vhahatinji Idala iLyilishe ilya Solomooni.

²⁴ Pe aVhayuuda vhamo vhahamuzyunguula uYeesu, vhahamuvhuziilizya vhahati, “Vhuli, kwe ututamwe mu mooyo giitu kufishila lii? Inga nalyoli iwe we Chilisiti, tuvhuuzye apazelu.”

²⁵ Ileelo uYeesu ahavhaamula ahati, “Ine mbavhuziizye kuuti ne naanu, ileelo imwe mukuhaana kuniitiha. Imbombo zye nkuvhomba ku maha aga Taata waane zye zikunkomeshezya kuuti ine ne naanu.

²⁶ Ileelo imwe mukuhaana kuniitiha, mwe pe te mwe vha mu mpuga iya ngʼonzi zyane.

²⁷ Ingʼonzi zyane zilimanyile izwi lyane. Niine nzimanyile, zyope zikundandata.

²⁸ Ine nkuuzipa uvhulanzi uvhwa shiima, te zihateeje naalumo. Havhili ataliipo umuntu we angazifwula ku maha kufuma mu nyoovhe zyane.

²⁹ UTaata waane we ampiiye izyo, mupiti kuluusya vhonti. Ishi ataliipo umuntu we angazifwula mu nyoovhe zyakwe.

³⁰ Ine nu Taata waane tuli pooka.”

³¹ Pe aVhayuuda vhamo lwe vhiivwa izyo, vhahanda kusevha amavhwe havhili, inga vhamuhome nu kumugoga uYeesu.

³² Ileelo uYeesu ahavhavhuuzya ahati, “Navhalolesya imbombo inyinji inyinza ku maha aga Taata waane. Vhuli, mbombo vhuli zye zikuvhavhiiha imwe kuuti munkome na mavhwe?”

³³ AVhayuuda vhahamwamula vhahati, “Tutakwanza kukuhoma na mavhwe, mwe pe uvhomvile imbombo inyinza, nkandi, mwe pe ukumusaamula uMulungu. Tukuyanga vhwevhulo, mwe pe iwe ukuyanga kuuti we Mulungu she we muntu vhweleele inza avhantu avhanji!”

³⁴ UYeesu ahavhaamula ahati, “Vhuli, yitasimviilwe mu makalaata giinyu aga ndajizyo kuuti uMulungu átili, ‘Imwe mwe vhalungu’?

³⁵ Yisimviilwe mu Vhusimbe uVhufinjile kuuti avhantu vhe vhaposheleeye izwi ilya Mulungu, uMulungu ávhayanzile átili avhantu ivho vhalungu. Niiswe tumanyile kuuti zye zisimviilwe mu Vhusimbe uVhufinjile zya nalyoli insiku zyonti.

³⁶ Vhuli, shooni she mukuti ine nkumusaamula uMulungu lwe nkuti, ‘Ine ne Mwana wa Mulungu’? UTaata we ansavhuuye nu kunsonteelezya mu nsi.

³⁷ Inga ntakuvhomba imbombo izya Taata waane, pe mutanitihaje.

³⁸ Ileelo inga nkuzivhomba imbombo zye uTaata waane akuzivhomba, poosye inga mutakwitiha zye nkuyanga, ishi mujendeelele kuzyitiha imbombo izyo. Kwi idala ilyo, pe kwe mumanye kuuti uTaata waane ali muhati yaane, niine indi muhati yaakwe.”

³⁹ Lwe aVhayuuda vhamo vhiivwa izyo, vhahanzaga kumulema havhili, ileelo uYeesu ahapulumuha mu nyoovhe zyavho.

⁴⁰ Pe uYeesu ahasogola havhili kwi isyila ilya ijenje uYoolodaani, ahafiha pe uYoohani ahozyaga avhantu ku vhwandilo, ahatendama kwekuula.

⁴¹ Lwe uYeesu ashiili ali kwekuula, avhantu avhinji vhahamwinzila nu kuyanga kuuti, “UYoohani atávhomvile ishilolesyo naashimo, ileelo inongwa zyonti zye ahaziyangaga izya muntu uno zya nalyoli.”

⁴² Pe ukwo avhantu avhinji vhahamwitiha uYeesu.