Yohani 1 - ULufingwi uLupwa

UIzwi áyinzile avha muntu

¹ Ku vhwandilo lwe ivintu vwonti vishiili kupelwa, kwáli uIzwi, uIzwi uyo áali pooka nu Mulungu, havhili uIzwi uyo áali wu Mulungu.

² Kufuma ku vhwandilo uIzwi uyo áali pooka nu Mulungu.

³ UMulungu ávipezile ivintu vwonti kutuushila kwa Izwi. Shitaliipo ishintu she shápeliilwe ishisita kutuushila ku kwakwe.

⁴ UIzwi uyo áali vhwandilo uvhwa vhulanzi. Vhwope uvhulanzi uvhwo vhwáli vhuzelu vhwa vhantu.

⁵ Uvhuzelu uvhwo vhukuhozya mu shiisi, shoope ishiisi shitávhupoosite.

⁶ UMulungu ámusonteleziizye umuntu wumo we izina lyakwe vhahatinji uYoohani.

⁷ UYoohani áyinzile kuvhahomeshezya avhantu izya vhuzelu uvhwo, inga kutuushila ku kwakwe avhantu vhonti vhavhwitishe.

⁸ Havhili uweene atáamile vhuzelu uvhwo, nkandi áyinzile kuvhahomeshezya avhantu izya vhuzelu uvhwo.

⁹ Uvhuzelu uvhwo vhwáli vhwa nalyoli, vhuhinza mu nsi umu nu kuvhahozezya avhantu vhonti.

¹⁰ UIzwi áliipo mu nsi. UMulungu ápezile insi kutuushila kwa Izwi uyo, ileelo poosye vhwevhulo avhantu avha mu nsi vhatámumanyile.

¹¹ Áyinzile ku vhantu vhaakwe, ileelo avheene vhatámuposheleeye.

¹² Ileelo vhaala vhe vhámuposheleeye nu kumwitiha, ávhavhiisile kuvha vhaana vha Mulungu.

¹³ Ivho vhe vhaana vha Mulungu, ileelo te kulandatana ni shifumo shaavho, poosye kulandatana nu kupaapwa kwi idala ilya kuhomaana umwanaavuli nu mwantanda, poosye ku lukasamo ulwa muntu, uMulungu wuuyo we avhavhiisile kuvha vhaana vhaakwe.

¹⁴ UIzwi uyo áyinzile avha muntu, ahatendama pooka niiswe. Tuhavhulola uvhushindamu vhwakwe, uvhushindamu vhwe vhukulolesya kuuti Mwana imozi we afumile kwa Taata, ali nu vhwila nu vhwanalyoli nkaani.

¹⁵ UYoohani ahavhahomeshezya avhantu inongwa izya muntu uyo, ahayanga kwi izwi ipiti, ahati, “Uno we nkavhavhuzyaga kuuti, ‘Aliyinza umuntu wumo mwisinda lyane, we mupiti kunduusya ine, mwe pe uweene áliipo lwe ine nshiili kupaapwa.’”

¹⁶ Kufumiilana nu vhudumbwe uvhwa vhwila vhwakwe, iswe swenti uMulungu atufwiliiye uvhwila, havhili kwe ajendeelele kutufwila uvhwila ahavhaliilizyo honti.

¹⁷ Nkuyanga vhwevhulo, mwe pe uMulungu áfumwizye indajizyo zyakwe kwi idala ilya Moose, ileelo uvhwila nu vhwanalyoli atupiiye kwi idala ilya Yeesu Chilisiti.

¹⁸ Ataliipo umuntu we amuvhwenyi uMulungu lumo, nkandi we Mwana imozi, we woope wu Mulungu, havhili ali nu vhuliilani uvhwa papiipi nkaani nu Taata uMulungu. Uyo we amulolesiizye uMulungu kuli iswe.

Uvhwahoome uvhwa Yoohani uMwozyi

¹⁹ Isiku limo, avhalongozi avha Vhayuuda vhávhasonteleziizye avhapuuti na Vhalaawi kufuma mu Yelusaleemu kumuvhuziilizya uYoohani uMwozyi kuuti uweene wu naanu. Uweene ahahomeshezya,

²⁰ ahaamula ishisita kuzyiha ahati, “Ine te ne Chilisiti.”

²¹ Vhahamuvhuziilizya havhili vhahati, “Ishi pe we naanu? Vhuli, we mukuvhwi uEeliya?” Uweene ahavhaamula ahati, “Ine te ne Eeliya.” Avheene vhahamuvhuziilizya havhili vhahati, “Vhuli, we we mukuvhwi uwamwavho we tukumuguliilila kufuma kwa Mulungu?” UYoohani ahavhaamula ahati, “Te neene.”

²² Vhahamuvhuziilizya vhahati, “Ishi tuvhuuzye, iwe we naanu? Tuvhuuzye, inga tusogole tuvhavhuuzye vhe vhatusonteleziizye. Iwe ukuyitaha kuuti we naanu?”

²³ UYoohani ahavhaamula kulandatana na mazwi ge áyanzile umukuvhwi uYisaayi ahati, “Ine ne lizwi lya muntu we akuvhila imbila mu luugwa akuti, ‘Musenganizanyi uMWENE uMulungu idala!’”

²⁴ Pe avhantu ivho vhe aVhafalisaayi vhávhasonteleziizye kwa Yoohani,

²⁵ vhahamuvhuziilizya vhahati, “Inga iwe te we Chilisiti, havhili te we mukuvhwi uEeliya, havhili te we mukuvhwi uwunji we tukumuguliilila kufuma kwa Mulungu, ishi ugaazile kwoshi amaha aga kwozya avhantu?”

²⁶ UYoohani ahavhaamula ahati, “Ine nkwozya na minzi, ileelo pahati yiinyu aliipo we imwe mutamumanyile.

²⁷ Uyo we akwinza mwisinda lyane, havhili ine ntahondeeye poosye kuvha ne muvhomvi waakwe uwa kuzevwa nu kusatula inkusa izya vilyatu vwakwe.”

²⁸ Zyonti izyo zyávhombesile mu lutala ulwa Besaniya, mwi isyila uluvhazu ulwa kuvhutukulo ulwa ijenje uYoolodaani, kwe uYoohani ahozyaga avhantu.

UYeesu we Hagonzi aha Mulungu

²⁹ Isiku lye likulandata, uYoohani ahamulola uYeesu akwinza ku kwakwe. Ahavhavhuuzya avhantu vhe vháliipo paala ahati, “Yeenya, uno wu Hagonzi aha Mulungu we akwefwa uvhutalamalandu uvhwa vhantu vhonti mu nsi!

³⁰ Uno we navhavhuzyaga inongwa zyakwe kuuti, ‘Akwinza umuntu wumo mwisinda lyane we mupiti kunduusya ine, mwe pe uweene áliipo lwe ine nshiili kupaapwa.’

³¹ Ine neneene ntámumanyile, ileelo nínzile kuvhoozya avhantu na minzi, inga amanyishe ku Vhaisilayeeli.”

³² Pe uYoohani ahavhahomeshezya avhantu ahati, “Namulola uMupepo uMufinjile kufuma ku mwanya akwiha pamwanya yaakwe ku shiholanyo isha nkunda nu kusyala pooka nawo.

³³ Ine ntámumanyile, ileelo uMulungu we ánsonteleziizye kwozya avhantu na minzi we ámbuziizye átili, ‘Inga wamulola umuntu we uMupepo waane kufuma ku mwanya akwiha pamwanya yaakwe nu kusyala pooka nawo, we alivhozyaga avhantu nu Mupepo uMufinjile.’”

³⁴ Pe uYoohani ahati, “Niine nazilola, havhili nkuhomeshezya kuuti uno Mwana wa Mulungu.”

UYeesu akuvhasevha avhasundikwa avha kwanda

³⁵ Indaavhi yaakwe, uYoohani uMwozyi ahimiilila havhili pi isyila ilya ijenje uYoolodaani pooka na vhasundikwa vhavhili mu vhasundikwa vhaakwe.

³⁶ UYoohani ahamulola uYeesu akutuuha papiipi navho. Lwe amulola, ahavhavhuuzya avhasundikwa vhaakwe ivho ahati, “Yeenya, uyo we wu Hagonzi ha Mulungu.”

³⁷ Lwe avhasundikwa vhaakwe vhavhili ivho vhamwivwa uYoohani akuyanga amazwi igo, vhahamulandata uYeesu.

³⁸ Pe uYeesu ahagalunkana mwisinda, ahavhalola avhasundikwa ivho vhakumulandata. UYeesu ahavhavhuziilizya ahati, “Vhuli, mukulondola ishooni?” Vhoope vhahamwamula vhahati, “We Laabi (izina ili kwe kuuti Musambiilizi), ukutendama kwoshi?”

³⁹ UYeesu ahavhaamula ahati, “Nzaaji, niimwe kwe mupalole pe nkutendama.” Pe vhahamulandata. Ahavhaliilizyo aha saala 10 vhahafiha pe ahatendamaga, vhahalinda nawo isiku ilyo.

⁴⁰ Umusundikwa wumo mu vhaala vhavhili vhe vhívuuye amazwi aga Yoohani, nu kumulandata uYeesu, izina lyakwe vhahatinji uAndeleeya, umunine uwa Siimoni uPeeteli.

⁴¹ UAndeleeya ahasogola suuti kumulondola umunine waakwe uSiimoni. Lwe amwaga, ahamuvhuuzya ahati, “Twamulola uMeesiya!” Izina ili kwe kuuti uChilisiti.

⁴² Pe uAndeleeya ahinza nu Siimoni kwa Yeesu. UYeesu ahamwenya uSiimoni, ahamuvhuuzya ahati, “Iwe we Siimoni umwana wa Yoohani. Ishi, izina lyaho kuuti uvhe we Keefa.” (Izina ili kwe kuuti Peeteli poosye kuuti iyalaawe.)

UFiilipo nu Nasaniyeeli vhakumulandata uYeesu

⁴³ Indaavhi yaakwe, uYeesu ahaamula kusogola mu shigavho isha nsi isha Galilaaya. Lwe aafiha, ahamwaga uFiilipo, ahamuvhuuzya ahati, “We Fiilipo, undandate, uvhe we musundikwa.”

⁴⁴ UFiilipo ahatendamaga mu nkaaya iya Betisaayida, inkaaya ye vhoope avha Andeleeya nu Peeteli vhahatendamaga.

⁴⁵ UFiilipo ahamulola uNasaniyeeli, ahamuvhuuzya ahati, “Twamulola umuntu ula we uMoose ásimvile inongwa zyakwe mwi ikalaata ilya ndajizyo na we avhakuvhwi vhásimvile inongwa zyakwe. Umuntu uyo izina lyakwe wu Yeesu umwana wa Yoosefu we akufuma mu nkaaya iya Naazaleeti.”

⁴⁶ Ileelo uNasaniyeeli ahamuvhuziilizya uFiilipo ahati, “Vhuli, shintu vhuli ishinza she shingaafuma mu nkaaya inyinsi iya Naazaleeti?” UFiilipo ahamwamula ahati, “Nzaaga uyilolele weneewe.”

⁴⁷ Lwe uYeesu amulola uNasaniyeeli akwinza ku kwakwe, ahayanga inongwa zyakwe ahati, “Yeenya, umuntu uyo we akwinza, Mwisilayeeli uwa nalyoli we atapezile alume ilenga naalumo.”

⁴⁸ UNasaniyeeli ahamuvhuziilizya uYeesu ahati, “Waamanya vhuli ine?” UYeesu ahamwamula ahati, “Poosye lwe uFiilipo ashiili kwinza kukwita, ine mpezile nkuvhwenyi lwe utendiime pansi pi ituvhu.”

⁴⁹ Pe uNasaniyeeli ahamwamula ahati, “We Musambiilizi, ishi naamanya kuuti iwe we Mwana wa Mulungu! Iwe we Mwene uwa nsi iya Isilayeeli!”

⁵⁰ UYeesu ahamwamula nu kumuvhuziilizya kuuti, “Vhuli, ukwitiha, mwe pe nakuvhuuzya kuuti, nkuvhwenyi lwe utendiime pansi pi ituvhu? Kwe uzilole izinji impiti nkaani izya kusukumizya kuluusya izi!”

⁵¹ UYeesu ahajendeelela kuyanga kuuti, “Nalyoli nkuvhavhuuzya kuuti, kwe mulole ku mwanya kwigusile, avhahavhizya avha Mulungu vhakuzuvha nu kwiha pali ine ne Mwana wa Aadamu.”