Yakobu 5 - ULufingwi uLupwa

Insoshi ku vhadumbwe

¹ Ishi ntejeelezyi ahinza, imwe mwe vhadumbwe! Kutaaji nu kuloosya, ku vhuswimiilizu uvhupiti vhwe mupalamiiye kuvhwaga.

² Ivwuma vwinyu viliivhola, na menda giinyu galiliiha nu luswa.

³ Isahaabu zyinyu ni mpiiya zyinyu ziliisile nu vhusimu. Uvhusimu uvhwo kwe vhuvhe shilolesyo ku vhantu kuuti uMulungu alivhalonga imwe. Havhili kwe vhunanganye amavhili giinyu inza umwoto, mwe pe mulundisile ivwuma kuzya manda aga kumpeleela.

⁴ Tejeelezyi avhavhomvi vhiinyu, vwe vhakuyivhuna nu kuvhalonga! Vhamazile kwefwa ivwakulya mu magunda giinyu, ileelo imwe mutavhalifile. Kuyivhuna kwavho kwivwisile mu makutwi aga MWENE uMulungu uwa Maha Gonti.

⁵ Mu vhulanzi vhwinyu mwe vhantu vhe vhakuyihondezya nu kuvhomba izya mpapilo zyinyu. Ishi mupalamiiye kulongwa. Muli inza ivisugwa vwe vwinile, inga vivhoolwe.

⁶ Muvhalonzile nu kuvhagoga avhantu vhe vháali vhagolosu, avhantu vhe vhatahavhadindaga naashimo.

Kujimbiilila mu mayimba

⁷ Mwe vhamwitu, mujimbililaje kufishila ahavhaliilizyo he uMwene uYeesu aliyinza. Yeenyi uvhujimbiilizu uvhwa mulimi. Uweene akuguliilila umugunda wumezye nu kugomwa iviyavho ahinza. Iviyavho ivwo vili ni ilonka ku kwakwe. Ye nongwa akujimbiilila imvula iya mu ndundo ni ya shisiku.

⁸ Niimwe vhwevhulo, mujimbililaje, havhili mugomaje amooyo giinyu, mwe pe kwinza ukwa Mwene kupalamiiye.

⁹ Mwe vhamwitu, mutakwinanaje, inga mutahinze mulongwe, mwe pe uMulonzi apalamiiye kwinza.

¹⁰ Mwe vhamwitu, yenyeelezyi avhakuvhwi vwe vhahajimbililaga mu mayimba, lwe vhakuyanga kwi izina ilya MWENE uMulungu. Ishi vhavhe shiholanyo kuli imwe.

¹¹ Inza vwe mumanyile, vhalosiitwe vhaala vhe vhajimbiliiye. Mwivuuye inongwa izya vhujimbiilizu uvhwa Yobo, havhili muvhwenyi vwe uMWENE uMulungu ámuvhombeeye pisinda. Uweene ali nu vhwila uvhupiti, havhili uvhwa mavhiila mu mavhiila.

¹² Ipiti kuli izyo zyonti mwe vhamwitu, mutalapaje kwi izina ilya ku mwanya, poosye kwi izina ilya nsi, poosye ku shintu ishinji shonti. Inga mukwitiha ishintu, mutinji, “Eena” vhweleele, poosye inga mukuhaana, mutinji, “Ndaali” vhweleele. Ishisita kuvhomba vhwevhulo, mukwinza mukulongwa.

Kumulaavha uMulungu ku lwitiho

¹³ Umuntu wonti kuli imwe, inga akuyimba, akwanzilwa amulaavhaje uMulungu. Inga kuli umuntu wonti we ali nu luseshelo, akwanzilwa kwimba inyimbo izya kumutiima uMulungu.

¹⁴ Kuli imwe inga kuli umuntu we avhinile, akwanzilwa kuvhiita avhasongo avha shivhanza, inga vhamulaavhile nu kumupaha amafuta kwi izina ilya Mwene uYeesu.

¹⁵ Kulaavha ku lwitiho, kukumupoha umuvhinu uyo, woope uMwene akumuvhuusya. Inga avhomvile uvhutalamalandu, akuswilwa.

¹⁶ Kuli izyo, mupemulilanaje uvhutalamalandu vhwinyu nu kulavhilana, inga uMwene avhaponiaje. Kulaavha ukwa muntu umugolosu kuli na maha, havhili kukuvhomba imbombo.

¹⁷ Umukuvhwi uEeliya áamile muntu inza iswe. Lwe alaavha ku mwoyo wonti kuuti imvula yitahatoonye, yoope yitahatoonya ku havhaliilizyo aha maaha gatatu na meezi 6.

¹⁸ Pisinda, ahalaavha havhili kuuti imvula yitoonye, yoope yihanda kutoonya ni nsi yihamezya ivimelwa havhili.

¹⁹ Mwe vhamwitu, tuti uwamwinyu wumo alesile uvhwanalyoli, pisinda uwunji amugalusya havhili.

²⁰ Mumanye ahinza kuuti umuntu wonti we akumugalusya umutalamalandu kufuma kwi idala ilya vhunanjisu, akumupoha uvhulanzi vhwakwe kufuma mu vhufwe. Havhili akumuvhiiha umutalamalandu uyo kuuti aswilwe uvhutalamalandu vhwakwe uvhwinji.