Yakobu 4 - ULufingwi uLupwa

Kumushindiha uMulungu

¹ Ivho na madali ge gali muli imwe vikufuma kwoshi? Vikufuma mu mpapilo zyinyu imbiivhi zye zikulwana muhati zyinyu!

² Mukunyonywa ileelo mutakuvwaga, pe mukugoga. Havhili mukuvha nu mwone ni vwa vhantu. Poosye inga mutahondeeye kuvwaga, mukwanda kudalinkana nu kulwa. Musovheliilwe, mwe pe mutakumulaavha uMulungu.

³ Havhili lwe mukulaavha, mutakuposheela, mwe pe mukulaavha ku nsiivho imbiivhi. Mukulaavha, inga viila vwe mwaposheela muvivhombele kuzikwilizya impapilo zyinyu.

⁴ Imwe muholiine na vhavhembu, mwe pe mutali nu mushinzi kwa Mulungu! Mutamanyile kuuti we akusungwa izya mu nsi, akuvha mulugu uwa Mulungu? Ishi, wonti we akusungwa izya mu nsi, ayipezile kuvha mulugu uwa Mulungu.

⁵ Mutasiivhaje kuuti uVhusimbe uVhufinjile vhukuyanga vhweleele, kuuti, “UMupepo uwa Mulungu we ahatuvhiiha muhati zyitu, ali ni shikunzi nkaani kuli iswe. Akuvwalala nkaani mu mwoyo lwe tutakumukunda weeka vhweleele.”

⁶ Pooka niizyo, uweene akwonjezya kutufwila uvhwila. Ye nongwa yisimviilwe mu Vhusimbe uVhufinjile kuuti, “UMulungu akuvhahaana avha mabaado, ileelo vhe vhakuyiisya, akuvhafwila uvhwila.”

⁷ Kuli izyo, mumushindihaje uMulungu. Mumuhaanaje nu kumudinda uMukwalanzi, woope kwe avhashimbilaje.

⁸ Mumupalamilaje uMulungu, woope kwe avhapalamilaje. Muleshe kuvhomba imbiivhi, imwe mwe vhatalamalandu! Havhili mugazelufwaje amooyo giinyu, imwe mwe vha nsiivho pavhili!

⁹ Muswimililwaje nu kuloosya nu kukuuta. Inseho zyinyu zigalunkane kuvha maloosyo nu luseshelo lwinyu luvhe vhuswimiilizu.

¹⁰ Muyisyaje pilongolela ilya Mwene uYeesu, pe woope kwe avhazuvwe.

Mutavhanje ni isuufwo

¹¹ Mwe vhamwitu, mutayanjilanaje imbiivhi. Umuntu we akumuyanga havhiivhi uwamwavho, poosye kumulonga, akuziyanjila havhiivhi indajizyo izya Mulungu nu kuzisuufwa. Lwe ukuzisuufwa indajizyo, utakuzishindiha, nkandi ukuzihaana.

¹² UMulungu weeka vhweleele we akuvhiiha indajizyo, havhili uweene we Mulonzi. Wuuyo weeka we ali na maha aga kupoha nu kulovwa. Ishi, iwe we naanu we ukwanza kumulonga umupalamani waaho?

Mutayibaadaje ku mbombo izya ndaavhi

¹³ Ishi ntejeelezyi ahinza, imwe mwe mukuyanga mukuti, “Ileelo poosye indaavhi kwe tusogole mu nkaaya yimo. Kwe tutendame ukwo umwaha wonti kukazya nu kulonka.”

¹⁴ Ileelo mutalimanyile lye lingafumila indaavhi! Uvhulanzi vhwinyu vhwa havhaliilizyo hansi vhweleele. Imwe muli ngati lyosi, lye likuloleha ahavhaliilizyo hansi, havhili naluvhiilo likuteega!

¹⁵ Mukwanzilwa mutinji, “Inga uMwene uYeesu akasiime kuuti tuvhe swe vhapuuma, kwe tuvhombe ili, poosye liila.”

¹⁶ Ileelo imwe mutakuvhomba vhwevhulo, mu kuyitiima nu kuyitumvwa. Kuyitumvwa kwinyu ukwo kuvhiivhi.

¹⁷ Ishi, umuntu wonti we azimanyile inyinza ileelo atakuzivhomba, uyo akuvha avhomba uvhutalamalandu.