Yakobu 3 - ULufingwi uLupwa

Kuyidinda nu lumili

¹ Mwe vhamwitu, kuli imwe kutahaavhe avhasambiilizi avhinji avha izwi ilya Mulungu, mwe pe mumanyile kuuti isiku ilya kulongwa, uMulungu alitulonga iswe swe vhasambiilizi nkaani kuluusya avhanji.

² Iswe swenti tukupuvha ku madala aminji. Inga kuli umuntu we atakupuvha kuyanga kwakwe, uyo mulunjisu, uyo we ali na maha aga kuyidinda uvhupuvi uvhwa muvhili waakwe wonti.

³ Zyope imfwalaasi, tukuzivhiishila ivijela ivinsi mu malomu gaavho, inga zitushindihaje, inga tugalongozyaje amavhili gaavho gonti.

⁴ Vhwevhulo zyope imeeli, poosye she mpiti nkaani, zikubunshilwa ni nkungu impiti, poosye vhevhulo, zikulongolwa nu tusyetulilo utunsi vhweleele, kusogola kwonti kwe umulongozi akwanza.

⁵ Vhwevhulo poosye ulumili, shipelwa ishinsi mu muvhili, ileelo lukuyitumvwa ku lutumvwo ulupiti. Sivhiliili umwoto umunsi vwe wukuholeelezya isitu ipiti!

⁶ Ulumili lwope luli inza umwoto. Ulwene lwizuuye imbiivhi inyinji izya mu nsi kuluusya ivipelwa vwonti ivwa muvhili. Lukumuhandamania umuntu umuvhili waakwe wonti nu kuholeelezya umwoto mu vhulanzi vhwakwe vhwonti. Ulumili lwope lukuholeela nu mwoto uwa shiima shiima uwa mwi ipalaazya.

⁷ Avhantu vhakuvikonzya ivihanu ivwa nkolo zyonti, inyunyi, na vwe vikukwesuha ni vihanu ivwa mwa sumbi.

⁸ Ileelo naawumo umuntu we ali na maha aga kuludinda ulumili kuuti lutayangaje imbiivhi. Ulwene lunanzi, lukupulupuuta uku na kuula, havhili lukugoga avhantu inza uwanga.

⁹ Ku lumili tukumutiima uTaata, uMWENE wiitu. Havhili ku lumili tukuvhatipa avhantu, vhe uMulungu ahavhapela ku shiholanyo shaakwe.

¹⁰ Mwi ilomu mukufuma intiimo ni ntipo. Mwe vhamwitu, zitakwanzilwa kuuti zivhanje vhwevhulo!

¹¹ Vhuli, ishiduda shooka shingaafumwa aminzi amanonu na minzi aga ivheeya pooka?

¹² Mwe vhamwitu, ituvhu litangaahoma amakusu, poosye amampensya gatangaahoma amatuvhu. Vhwevhulo, ishiduda isha minzi aga ivheeya shitangaafumwa aminzi amanonu.

Uvhushindamu uvhwa njeele

¹³ Ishi kuli limwe, inga kuli umuntu we ali nu vhushindamu uvhwa njeele, avhulolesye vhwenevhwo ku lujendo lwakwe ulwinza. Havhili avhombaje imbombo ku vhutonsu vhwe vhukufumiilana nu vhushindamu uvhwa njeele.

¹⁴ Ileelo inga amooyo giinyu gizuuye umwone nu lupapilo, pe mutayitiimaje, havhili mutayangaje ilenga ku zya nalyoli.

¹⁵ Uvhushindamu uvhwa njeele inza uvhwo, vhutakufuma ku mwanya, nsiivho zya mu nsi munuumu, havhili zya mu muvhili, vhukufuma kwa Seetano.

¹⁶ Nkuyanga vhwevhulo, mwe pe ponti pe avhantu vhali nu mwone nu lupapilo pakuvha ivho ni mbiivhi izinji zyonti.

¹⁷ Ileelo vhe vhakuvha nu vhushindamu uvhwa njeele vhwe vhukufuma kwa Mulungu, amooyo gaavho mazelu. Ivho vhe vhakusungwa kuvha nu vhutehamu na vhantu avhanji, vhatonsu, havhili vhali nu mushinzi. Muhati zyavho vhizuuye uvhwila ni mbombo inyinza. Vhatakuvhomba uvhunyala ku vhantu vhamo, havhili vhatali ni shifumbo.

¹⁸ Avhantu vhe vhakusungwa uvhutehamu, vhakuvha ngati vhakuvhwala imbeyu, pisinda vhaliivuna uvhugolosu.