Yakobu 2 - ULufingwi uLupwa

Mutavhombaje izya kusavhulanya

¹ Mwe vhamwitu, mutavhanje mwe vhakusavhulanya, mwe pe mumwitisile uMwene wiitu uYeesu Chilisiti uwa Vhushindamu.

² Tuti, umuntu wumo azwaye insalaamu iya sahaabu na menda aga mushinzi, ayinjila mu luhomaano lwinyu, havhili umupiina ayinjila we azwaye amenda amanyanka.

³ Inga mukumushindiha we azwaye amenda aga mushinzi, mukumuvhuuzya mukuti, “Tendaama ipa, apinza,” ileelo umupiina mukumuvhuuzya mukuti, “Iwe yimiliila paala, poosye tendaama pansi ipa, sha pa vinama vwane,”

⁴ vhuli, te lwe mwavhomba izya vhunyala? Vhuli, te lwe mwafumwa uvhulonzi, kufumiilana ni nsiivho zyinyu imbiivhi?

⁵ Mwe vhamwitu vhankundwa, tejeelezyi ahinza! UMulungu avhasavhuuye avhantu avhapiina mu nsi umu kuuti vhavhe vhe vhadumbwe mu lwitiho, nu kuposheela uvhumwene vhwe áfinzile ku vhonti vhe vhakumukunda.

⁶ Ileelo imwe mukumusuufwa ula we mupiina. Vhuli, avhadumbwe ivho te vhe vhakuvhayimvwa imwe nu kuvhatwala kwi ilonjelwi?

⁷ Vhuli, te vhe vhanaavho vhe vhakulisaamula izina ilyinza ilya Yeesu lye muhapeelwa?

⁸ Mu Vhusimbe uVhufinjile, indajizyo izya MWENE wiitu uMulungu zikuyanga zikuti, “Umukundaje umupalamani waaho inza vwe ukuyikunda weneewe.” Inga mukuvhomba vhwevhulo, pe lwe mukuvhomba ahinza.

⁹ Ileelo inga mukusavhulanya avhantu, pe mukuvhomba uvhutalamalandu, ni ndajizyo zikuvhalonga kuuti imwe mwe vhapuvi.

¹⁰ Inga umuntu akulandata indajizyo zyonti izya Mulungu, ileelo aapuvha yooka vhweleele, uMulungu akumuvhaazya kuuti apuvile zyonti.

¹¹ Nkuyanga vhwevhulo, mwe pe uMulungu we avhiisile ululajizyo lwe lukuti, “Utavhembuhaje,” havhili we avhiisile ululajizyo lwe lukuti, “Utagogaje.” Kwe kuuti, inga utakuvhembuha, ileelo ukugoga, uMulungu akukuvhaazya kuuti upuvile indajizyo zyonti.

¹² Kuli izyo, muyangaje nu kuvhomba uku mukumbuhaje kuuti uMulungu alivhalonga imwe ku ndajizyo zye zili na maha aga kuvhasatula avhantu.

¹³ UMulungu te ahaavhe nu vhwila, lwe akumulonga umuntu we atali nu vhwila. Inga umuntu ali nu vhwila ku vhanji, woope uMulungu alimufwila uvhwila pi isiku ilya vhulonzi!

Kuvha nu lwitiho ni mbombo inyinza

¹⁴ Mwe vhamwitu, umuntu angalyaga lilonka vhuli, inga akuti ali nu lwitiho, ileelo atakuvhomba imbombo inyinza? Nalyoli ulwitiho lwakwe lutangamupoha!

¹⁵ Tuti, uwamwitu wumo umwanaavuli, poosye umwantanda, atali na menda, poosye ishaakulya isha kumukwilana.

¹⁶ Havhili wumo muli imwe akumuvhuuzya akuti, “Sogolaaga ku vhutehamu, uyootaje umwoto nu kwikuta.” Nalyoli inga atakuumupa vwe asovheliilwe ivwo, zitahondeeye inga hansi!

¹⁷ Vhwevhulo, inga muli nu lwitiho ileelo mutali ni mbombo inyinza, pe ulwitiho lwinyu lufuuye.

¹⁸ Ileelo umuntu wumo angati, “Avhantu vhamo vhali nu lwitiho, avhamwavho vhali ni mbombo inyinza.” Uyo ingamwamula kuuti, “Undolesye vwe ungavha nu lwitiho ishisita kuvha ni mbombo inyinza. Ine ku mbombo inyinza, nkukulolesya vwe ulwitiho lwane luli.”

¹⁹ Ukwitiha kuuti uMulungu ali wooka. Mwe muumwo! Zyope impepo inkandamanu zikwitiha vhwevhulo nu kutetema kwi lyoga!

²⁰ We shipukupuuku iwe! Kwe nkulolesye kuuti ulwitiho ishisita imbombo inyinza, lutali ni ilonka.

²¹ Utaata wiitu uAabulahamu ámufumwizye umwana waakwe uYisaaka kuuti avhe mpuutile iya kufwa pa shifinjilo. Ku mbombo iyo, uMulungu ahamuvhaazya kuuti mugolosu.

²² Waalola vwe ulwitiho lwakwe lwálandatiine pooka ni mbombo yaakwe, kufishila pe luhalunjiha kwi idala ilya mbombo yaakwe?

²³ Izyo zyávhombesile inza vwe yisimviilwe mu Vhusimbe uVhufinjile kuuti, “UAabulahamu ámwitisile uMulungu, pe uMulungu ahamuvhaazya kuuti mugolosu,” ahavha mumanyani wa Mulungu.

²⁴ Kuli izyo, mwalola kuuti te kwe ku lwitiho lweka vhweleele kuuti umuntu akuvhaazilwa kuuti mugolosu, nkandi umuntu akuvhaazilwa kuuti mugolosu inga ali nu lwitiho pooka ni mbombo inyinza.

²⁵ Vhwevhulo, woope uLaahabu ula umuvhembu, ávhaziliilwe kuuti mugolosu ku mbombo inyinza ye ávhomvile, mwe pe ávhaposheleeye avhahapenza vhaala nu kuvhavhuuzya kuuti vhatuushe idala ilinji, inga vhatahaalemwe.

²⁶ Kwe kuuti inza vwe umuvhili ishisita umwuyu wukuvha wufuuye, lwope ulwitiho ishisita imbombo inyinza lukuvha lufuuye.