Yakobu 1 - ULufingwi uLupwa

Umulaamu

¹ Ukalaata uno nsimvile neene ne Yaakobu, ne muvhomvi uwa Mulungu nu wa Mwene uYeesu Chilisiti. Nkuvhalamuha imwe mwe Vhayuuda mwenti mwe vha nkolo 12, mwe musaasite mu nsi izya mavhiila mu mavhiila.

Kujimbiilila mu ndingo

² Mwe vhamwitu, museshelaje lwe indingo izya mavhiila mu mavhiila zikuvhaaga,

³ mwe pe mumanyile kuuti ulwitiho lwinyu inga lukulingwa, lukuvhapela kuvha nu vhujimbiilizu.

⁴ Muvhanje nu vhujimbiilizu kufiha kumpeleela, inga mugome nu kuvha mwe vhalunjisu ishisita kusovhelwa naashimo.

⁵ Inga kuli uwamwinyu wumo we asovheliilwe uvhushindamu uvhwa njeele, amulaavhe uMulungu, woope kwe aamupe vhwenevhwo. Uweene akuuvhapa avhantu vhonti ivintu ku mwoyo umuzelu, havhili ishisita kupila.

⁶ Ileelo akwanzilwa alaavhe ku lwitiho ishisita amaganigani kuuti kwe aposheele. Nkuyanga vhwevhulo, mwe pe umuntu we ali na maganigani, akuvha fwe livhilingwa ilya sumbi, lye likunyatulwa ni nkungu nu kusumbilwa uku nuukwo.

⁷ Umuntu uyo atasiivhaje kuposheela ishintu naashimo kufuma kwa Mwene uYeesu,

⁸ mwe pe ali ni nsiivho pavhili, atali naapamo pe ayimiliiye.

Avhapiina na vhadumbwe

⁹ Uwamwitu wonti we mupiina akwanzilwa kuuti aseshelaje, mwe pe uMulungu amuzuvwa.

¹⁰ Woope we wu dumbwe akwanzilwa kuuti aseshelaje, mwe pe uMulungu amwisya. Nkuyanga vhwevhulo, mwe pe alituuha ngati vhwezya vhwa mwi ilaala.

¹¹ Lwe izuvha lyatukula, ahasanya haalama nkaani nu kufwosya amatundu, uvhwezya vhukulagala, uvhwinza vhwakwe vhukunanjiha. Vhwevhulo nu dumbwe woope, lwe akujendeelela mu mbombo zyakwe, munuumwo mwe alifwila.

UMulungu atakuvhinjizya avhantu mu ndingo

¹² Alosiitwe umuntu we akujimbiilila mu ndingo, mwe pe inga ayitishilwa, uMulungu aliimupa ishipambwi she vhulanzi uvhwa shiima vhwe áfinzile ku vhaala vhe vhakumukunda.

¹³ Inga umuntu akulingwa, atatinji, “Nkulingwa nu Mulungu.” UMulungu atakulingwa ni mbiivhi, havhili uweene atakumulinga umuntu naawumo.

¹⁴ Ileelo umuntu wonti we akulingwa, akulemwa ni mpapilo zyakwe imbiivhi.

¹⁵ Insiivho izya mpapilo zikumutwala umuntu kuvhomba uvhutalamalandu, vhwope uvhutalamalandu vhukumutwala umuntu uyo ku vhufwe.

¹⁶ Mwe vhamwitu vhankundwa, mutahopelwaje.

¹⁷ Ivintu vwonti ivwinza ni vipeelwa vwonti ivwinza vikufuma ku mwanya kwa Taata uMulungu, uMupezi uwa vintu vwonti ivwa kumwanya vwe vili nu vhuzelu. Vwe vili nu vhuzelu ivwo vitakuhozya ahavhaliilizyo honti, ahavhaliilizyo hamo vikuzima. Ileelo uweene uMulungu atakwanduha, havhili atakugalunkana inza ishinzyunguuli vwe shikugalunkana.

¹⁸ Kulandatana na vwe ákasiime, átuvhiisile kuvha swe vhaana vhaakwe kwi idala ilya iswe kulyitiha izwi lyakwe ilya nalyoli. Ávhomvile vhwevhulo, inga tuvhe swe vhaana vhaakwe imozi, ku vipelwa vwakwe vwonti vwe ávipezile, tuvhe inza iviyavho ivitanzi ivwa kufumwa ku kwakwe.

Kulitejeelezya izwi ilya Mulungu nu kulishindiha

¹⁹ Mwe vhamwitu vhankundwa, mutejelezyaje ahinza! Umuntu wonti atavhanje wa kuyanga naluvhiilo, nkandi avhanje wa kutejeelezya suuti! Havhili atavhanje we akuviitwa naluvhiilo.

²⁰ Nkuyanga vhwevhulo, mwe pe we ali nu mulaha uwa vhuntu, atangavhomba zye zihondeeye pilongolela ilya Mulungu.

²¹ Pe ishi, muvhuleshe uvhuhandamanu vhwonti nu vhuvhiivhi vhwe muli navhwo. Muposheele ku vhutonsu izwi liila lye uMulungu alivhiisile mu mooyo giinyu. Izwi ilyo lye lili na maha aga kuvhapoha.

²² Mukuyihopela kuuti mukulilandata izwi ilya Mulungu, ileelo mukulitejeelezya vhweleele. Muvhombaje inza vwe likuyanga,

²³ mwe pe umuntu we akutejeelezya izwi vhweleele, ileelo atakuvhomba vwe likuyanga, akuvha inza umuntu we akuyenyeelezya mwi ilooli.

²⁴ Lwe ayenyeelezya vwe ali nu kwepa, ahavhaliilizyo hanaaho akuyiluvwa vwe ali.

²⁵ Ileelo umuntu we akwenyeelezya nu kuzisivhiilila ahinza indajizyo indunjisu zye zili na maha aga kuvhasatula avhantu, akusugaana nuuyo. Inga akujendeelela kuvhomba vhwevhulo, ishisita kuluvwa ziila zye ayivuuye, alilootwa ku zyonti zye akuvhomba.

²⁶ Inga umuntu akuyilola kuuti akuvhomba zye zikumuhondezya uMulungu, ileelo atakuyenyeelezya vwe akuyanga, akuyihopela wuuyo weeka. Imbombo zye akusiivha kuuti zikumuhondezya uMulungu zya vhweleele.

²⁷ Imbombo zye zikumuhondezya uMulungu uTaata zye zino: kuvhaavwa avhantaagwa na vhaziishe mu mayimba gaavho nu kuyidinda kuuti izya mu nsi zitahakuhandamanie.