VaLoma 9 - ULufingwi uLupwa

UMulungu vwe ávhasavhuuye aVhaisilayeeli

¹ Nkuyanga uvhwanalyoli, mwe pe nkumwitiha uChilisiti. Havhili umwoyo waane we wukulongolwa nu Mupepo uMufinjile, woope wukuhomeshezya kuuti nkuyanga uvhwanalyoli, ntakuluma ilenga.

² Nalyoli, ine indi nu vhuswimiilizu uvhupiti nu vhuvhaavi vhwe vhutakusila mu mwoyo waane,

³ kuzya vhajenzi vhaane aVhaisilayeeli. Yeenya, inga lwaamile lukasamo lwane, ine neneene, nkandi nitisile kutipwa nu kundehaanya nu Chilisiti, inga kuvhomba vhwevhulo kungavhaavwa avhajenzi vhaane ivho, kuuti vhamwitishe uChilisiti.

⁴ Ivho vhe Vhaisilayeeli, vhe uMulungu ávhavhiisile kuuti vhavhe vhaana vhaakwe, ahavhalolesya uvhushindamu vhwakwe nu kuvhiiha ulufingwi navho. Havhili ahaavhapa indajizyo zyakwe nu kufinga vwe aliivhapa, nu kuvhavhuuzya vwe yikwanzilwa kumupuuta.

⁵ AVhaisilayeeli ivho vhe vhazukulu vha Aabulahamu nu Yisaaka nu Yaakobu. Fwe muntu, woope uChilisiti Mwisilayeeli, havhili wu Mulungu uMupiti uwa vwonti. Ashindikwaje shiima! Amina.

⁶ Pooka niizyo, ntakuti uMulungu áposiitwe kulunjisya ulufingwi lwakwe ku Vhaisilayeeli. Ndaali! Yeenya, te vhonti vhe vha mu luho ulwa Vhaisilayeeli vhasaavhulwa vha Mulungu.

⁷ Havhili te kuuti uluho lwonti ulwa Aabulahamu vhasaavhulwa vha Mulungu. Ndaali! UMulungu áfinzile nu Aabulahamu átili, “Avhaana avha mu luho lwaho vhaliifuma mu mpaapo izya Yisaaka.”

⁸ Amazwi igo kwe kuuti, avhaana vhe vhápafwilwe kulandatana na vwe uAabulahamu ahanzaga, vhatakuvhaazilwa kuuti vhaana vha Mulungu, nkandi avhaana vha Aabulahamu vhe vhápafwilwe kulandatana nu lufingwi ulwa Mulungu vhe vhakuvhaazilwa kuuti vhaana vha Mulungu.

⁹ Ulufingwi ulwo lukuti, “Ndigaluha umwaha uwo ahavhaliilizyo inza iha, nu Saala aliivha nu mwana umwanaavuli.”

¹⁰ Havhili te lye liniilyo lyeka vhweleele, poosye uLebeka ápaafile nu taata wiitu uYisaaka amapasa avhaana vhavhili.

^11-12 Ileelo avhaana ivho she vhashiili kupaapwa, havhili she vhashiili kuvhomba ishintu shonti, shivhe shinza, poosye shivhiivhi, uMulungu ahamuvhuuzya uLebeka ahati, “Usongo alimuvhombela umwana.” Izi zikulolesya kuuti uMulungu akusaavhula umuntu kulandatana nu lukasamo ulwa Mulungu, yitakuvha kulandatana ni mbombo izya muntu uyo.

¹³ Izi zikuvhalilana nu Vhusimbe uVhufinjile vhwe vhukuti, “UYaakobu námukunzite, ileelo uEesavhu námuhaanile.”

UMulungu akuvhomba kulandatana nu lukasamo lwakwe

¹⁴ Ishi pe tuti vhuli? Tuti, uMulungu te mugolosu? Ndaali, te muumwo inga hansi!

¹⁵ Yeenya, ámuvhuziizye uMoose átili, “Ine ndimupepeelezya umuntu we nkwanza kumupepeelezya, havhili ndimufwila uvhwila umuntu we nkwanza kumufwila uvhwila.”

¹⁶ Kuli izyo, kusaavhula umuntu, uMulungu akumufwila uvhwila, atakusaavhula kulandatana nu kwanza ukwa muntu, poosye umute uwa muntu.

¹⁷ Yeenya, mu Vhusimbe uVhufinjile uMulungu ámuvhuziizye uFalaawo átili, “Nákuvhiisile kuvha we mwene, inga kwi idala lyaho imbalolesye avhantu amaha gaane, havhili inga izina lyane likumushe mu nsi zyonti.”

¹⁸ Kuli izyo, uMulungu akumufwila uvhwila umuntu wonti we akwanza kumufwila uvhwila, havhili akumuvhiiha umwoyo umugomu umuntu wonti we akwanza kumuvhiiha.

¹⁹ Wumo angambuziilizya angati, “Inga zili vhwevhulo, pe shooni she uMulungu akutulonga? Wu naanu we angaludinda ulukasamo ulwa Mulungu?”

²⁰ Te muumwo kuvhuziilizya inza isho. We muntu we, we naanu iwe we ungadalinkana nu Mulungu? Vhuli, ishintu she shihapelwa shingamuvhuziilizya we ahashipela kuuti, “Shooni she uhampela ine inza ishi?”

²¹ Vhuli, uhamata atali na maha kwi ivhumba, kuuti kufuma muli ilyo, limo amatilaje ishiliilo isha mbombo izya mushinzi? Havhili ilyamwavho amatilaje ishiliilo isha mbombo ye yitali nu mushinzi?

²² Ileelo, mwe pe uMulungu ahanzaga kuvhalolesya avhantu uvhuhalazu vhwakwe nu kuvhalolesya amaha gaakwe, ávhajimbiliiye nkaani vhaala vhe vhali inza iviliilo vhe asivhiliiye kuuvhapa isunde.

²³ Havhili, mwe pe uMulungu ahanzaga kutulolesya kutangala ukwa vhushindamu vhwakwe uvhupiti,

²⁴ átusavhuuye swenti, swe Vhayuuda na vhe te Vhayuuda, inga atufwile uvhwila, mwe pe átusengiinye kuuti tuvhe nu vhushindamu pooka nawo.

²⁵ Izi zye uMulungu áyanzile mwi ikalaata ilya mukuvhwi uHoosiya kuuti, “Vhaala vhe te vhantu vhaane, ndivhiita ndiiti, ‘Vhantu vhaane.’ Na vhaala vhe ntávhakunzite, ndivhiita ndiiti, ‘Vhankundwa vhaane.’”

²⁶ Havhili, “Poope ipo pe vhívuuye kuuti, ‘Imwe te mwe vhaane,’ ipo vhaliyangwa kuuti, ‘Vhaana vha Mulungu uMulanzi.’”

²⁷ Woope umukuvhwi uYisaayi akuyanga izya Vhaisilayeeli kuuti, “Poosye inga aVhaisilayeeli vhinji inza ulusenga ulwa mu luvhazu mwa sumbi, vhansi vhweleele vhe vhaliipokwa.

²⁸ Yeenya, uMWENE uMulungu alivhalovwa nziila avhantu avha mu nsi zyonti, ishisita kuhaavha.”

²⁹ Izyo zikuvhombeha inza vwe umukuvhwi uYisaayi áyanzile hali kuuti, “Atavhanje wu MWENE uwa Maha Gonti kululesheelezya uluho ulwa Vhaisilayeeli, nkandi tuhalovha inza avhantu avha mu Sodooma na mu Gomoola.”

Ishintu she shikuvhapela aVhaisilayeeli vhatahavhaazilwe kuuti vhagolosu

³⁰ Ishi pe tuti vhuli? Kwe kuuti, avhantu vhe te Vhayuuda, poosye she vhatahalondolaga kuvhaazilwa nu Mulungu kuuti vhagolosu, ileelo ishi uMulungu avhavhaziizye kuuti vhagolosu kwi idala ilya lwitiho.

³¹ Havhili kwe kuuti, aVhaisilayeeli vhe vháali nu mute kulandata indajizyo, inga vhavhaazilwe kuuti vhagolosu kwi idala ilyo, vhatávhaziliilwe.

³² Vhatávhaziliilwe kuuti vhagolosu, mwe pe vhásuvhiiye imbombo zyavho, vhálesile kumwitiha uChilisiti. Vhahapunula pi ivhwe liila ipiti, vhahagwa.

³³ Inongwa izi zikuvhalilana na vwe uMulungu áyanzile mu Vhusimbe uVhufinjile kuuti, “Yeenya, mu nkaaya iya Sayuuni mbiisile ivhwe lye avhantu vhakupunula. Ivhwe lye lilivhapelela avhantu kuuti vhavhanje vhakugwa. Ileelo umuntu wonti we akumwitiha uyo we livhwe ilyo, te ahasuupile naalumo!”