VaLoma 8 - ULufingwi uLupwa

Kulandila ku maha aga Mupepo uMufinjile

¹ Pe ishi, kwandila ahavhaliilizyo iha uMulungu te aavhape isunde vhaala vhe vhasopenkiine nu Chilisiti uYeesu.

² Mwe pe uMupepo uMufinjile we akuuvhapa uvhulanzi, avhavhiisile kuvha mwe vhasatushe, inga muleshe kulongolwa nu vhutalamalandu vhwe vhukuvhapelela avhantu uvhufwe. Avhomvile vhwevhulo kwi idala ilya Chilisiti uYeesu.

³ Indajizyo izya Moose zitáamile na maha aga kutuvhiiha kuvha swe vhasatushe, mwe pe uvhuntu vhwitu uvhwa vhutalamalandu vhwáposiitwe kuzilandata. Ileelo shiila she indajizyo zyáposiitwe kushivhomba, uMulungu áshivhomvile. Ámutumiliziizye uMwana waakwe wuuyo avhe nu muvhili inza amavhili giitu, ileelo ishisita uvhutalamalandu. Kutuushila umuvhili uwo uMulungu ávhupiiye isunde uvhutalamalandu. Kwi idala ilyo, ahapela aamala amaha aga vhutalamalandu,

⁴ inga tulunjisye ingolosu zye indajizyo zikwanza. Yeenya, tutakulongolwa havhili nu vhuntu uvhwa vhutalamalandu, tukulongolwa nu Mupepo uMufinjile.

⁵ Vhe vhakulongolwa nu vhuntu uvhwa vhutalamalandu, injeele zyavho zikusiivha kwe kuvhomba uvhutalamalandu. Ileelo vhaala vhe vhakulongolwa nu Mupepo uMufinjile, injeele zyavho zikusiivha kuvhomba zye uMupepo uMufinjile akusungwa.

⁶ Umuntu we injeele zyakwe zikulongolwa nu vhuntu uvhwa vhutalamalandu, akuyipelela uvhufwe, ileelo umuntu we injeele zyakwe zikulongolwa nu Mupepo uMufinjile akuvha nu vhulanzi nu vhutehamu.

⁷ Yeenya, avhantu vhe vhakulongolwa nu vhuntu uvhwa vhutalamalandu vhakuyipela kuvha vhalugu vha Mulungu, mwe pe vhatakuzilandata indajizyo izya Mulungu inga hansi, havhili vhatangazilandata.

⁸ Kwe kuuti, vhe vhakuvhulandata uvhuntu uvhwa vhutalamalandu vhatangamuhondezya uMulungu.

⁹ Ileelo imwe mutakulongolwa nu vhuntu uvhwa vhutalamalandu, mukulongolwa nu Mupepo uMufinjile, inga nalyoli uMupepo uwa Mulungu akulandila muli imwe. Ileelo umuntu we atali nu Mupepo uwa Chilisiti, uyo te wa Chilisiti.

¹⁰ Ileelo inga uChilisiti ali muhati zyinyu, poosye inga amavhili giinyu gakufwa kufumiilana nu vhutalamalandu, uMupepo uMufinjile akuuvhapa uvhulanzi, mwe pe uMulungu avhavhaziizye imwe kuuti mwe vhagolosu.

¹¹ Havhili, inga uMupepo uwa ula we ámuzyusiizye uYeesu akulandila muhati zyinyu, amavhili giinyu ge gakufwa, uMulungu we ámuzyusiizye uChilisiti uYeesu aliigapa uvhulanzi kwi idala ilya Mupepo waakwe we akulandila muhati zyinyu.

¹² Pe ishi, vhamwitu, iswe mu vhulanzi vhwitu tutakwanzilwa kulongolwa nu vhuntu uvhwa vhutalamalandu.

¹³ Yeenya, inga mukulongolwa nu vhuntu uvhwa vhutalamalandu mu vhulanzi vhwinyu, muliifwa, ileelo inga mukuleha kuzilandata imbombo izya vhuntu uvhwa vhutalamalandu ku maha aga Mupepo uMufinjile, muliyiima mwe vhalanzi.

¹⁴ Vhonti vhe vhakulongolwa nu Mupepo uwa Mulungu vhe vhaana vha Mulungu.

¹⁵ Yeenya, uMupepo uwa Mulungu atakutupela kuvha twe vhazya vhe vhakumwogopa uMulungu, nkandi tukuvha twe vhaana vhaakwe nu kumwita uweene kuuti, “Taata wiitu.”

¹⁶ UMupepo uyo we akuhomeshezya mu mooyo giitu kuuti iswe swe vhaana vha Mulungu.

¹⁷ Ishi, inga swe vhaana vha Mulungu, pe nalyoli swe vhapwana avha Mulungu, swe vhapwana pooka nu Chilisiti. Nalyoli inga tukwitiha kuyimba inza uChilisiti, pe tuliposheela uvhushindamu pooka nawo.

UMulungu aliivhapa uvhushindamu avhaana vhaakwe

¹⁸ Amayimba giitu aga havhaliilizyo iha, ntakulola kuuti shintu, inga naholanya nu vhushindamu vhwe uMulungu aliitupa ahavhaliilizyo he hakwinza.

¹⁹ Yeenya, ivipelwa vwonti vikuguliilila ku mwoyo wonti ahavhaliilizyo he uMulungu alivhalolesya apazelu avhaana vhaakwe.

²⁰ Ivipelwa vwonti vwásheefile uvhumwamu, te kuuti vwávhisiilwe vhwevhulo ku lukasamo lwavho, nkandi ku lukasamo ulwa Mulungu wuuyo. Pooka niizyo, vikusuuvhila ku mwoyo wonti,

²¹ inga vwinze visatulwe kufuma mu vhuzya vhwavho uvhwa kusheepelwa uvhumwamu, nu kuposheela uvhushindamu vhwe uMulungu aliivhapa avhaana vhaakwe.

²² Tumanyile kuuti kufishila ahavhaliilizyo iha, ivipelwa vwonti vikuvhuvhula ku vhuvhaavi, inza uvhuvhaavi uvhwa kupaapa umwana.

²³ Havhili, te vwe vipelwa vweka vwe vikuvhuvhula ku vhuvhaavi. Niiswe vhweleele tukuvhuvhula nkaani mu mooyo giitu, poosye inga tupeliilwe uMupepo uMufinjile we shipeelwa ishitanzi isha Mulungu. Tukuvhuvhula, mwe pe tukuguliilila kuuti uMulungu aatupe amaha gonti aga kuvha swe vhaana vhaakwe, kwe kuuti, kugatavhula amavhili giitu.

²⁴ Ulusuuvhilo ulwo tuli nalwo kufuma pe uMulungu átuposile. Ileelo inga tukushilola she tukushisuuvhila, shitakuvha sha kushiguliilila. Vhuli, wu naanu we akugulililaga kupeelwa ishintu she ali nasho?

²⁵ Ileelo inga tukusuuvhila she tutakushilola, pe tukuguliilila ku vhujimbiilizu.

²⁶ Pooka niizyo, uMupepo uMufinjile we akutwavwaga mu vhuyeyevhazu vhwitu, mwe pe iswe tutamanyile vwe yikwanzilwa kulaavha, nkandi uMupepo uMufinjile wuuyo akutulaavhila ku nkuuta iya vhuswimiilizu ye yitangalondovholwa.

²⁷ Uweene uMulungu we akupenza zye zili mu mooyo aga vhantu, azimanyile insiivho izya Mupepo uMufinjile. Yeenya, uMupepo uyo akuvhalaavhila avhafinjile inza vwe uMulungu akwanza.

²⁸ Tumanyile kuuti, muli zyonti uMulungu akuvhavhombela inyinza avhantu vhe vhamukunzite, vhaala vhe avhiisite inza vwe avhalulumiiye.

²⁹ Yeenya, uMulungu ávhamanyile avhantu vhaakwe vhe ávhasavhuuye she ashiili kuvhapela, havhili ivho ávhasavhuuye, inga vhaholane nu Mwana waakwe uYeesu Chilisiti. Ávhomvile vhwevhulo, inga uMwana uyo avhe wu hatoote ku vhaana avhamwavho vhonti avha Mulungu.

³⁰ Havhili ivho vhe ávhasavhuuye ahavhiita. Ivho vhe ávhiisite ahavhavhaazya kuuti vhagolosu, havhili ahaavhapa uvhushindamu.

Ataliipo uwa kutulehaanya ni shikunzi isha Mulungu

³¹ Ishi pe tuti vhuli kuli izi? Inga uMulungu ali uluvhazu lwitu, wu naanu we angatupoota?

³² UMulungu atámufwiliiye uvhwila uMwana waakwe wuuyo, ámufumwizye kuuti afwe ku zyitu swenti. Pe ishi, inga átupiiye uMwana waakwe wuuyo, nalyoli aliitupa pooka nawo ivintu vwonti pa vhweleele.

³³ Nalyoli naawumo we angavhalonjeelela avhasaavhulwa avha Mulungu, mwe pe uMulungu wuuyo we akuvhavhaazya kuuti vhagolosu.

³⁴ Havhili, nalyoli naawumo we angaatupa isunde. Yeenya, uChilisiti uYeesu we áfuuye nu kuzyuha, ishi atendiime uluvhazu ulwa nyoovhe iya kundiilo iya Mulungu, pa vhushindamu uvhupiti nkaani, ukwo akutulaavhila iswe.

³⁵ Shitaliipo ishintu naashimo she shingatulehaanya ni shikunzi isha Chilisiti. Vhuvhe vhupiina, poosye vhuswimiilizu, gavhe mayimba, poosye nzala, kuvhe kulalilwa, poosye kupulumulwa, poosye kuvhe kufwa, vwonti ivwo vitangatulehaanya ni shikunzi isha Chilisiti.

³⁶ Izyo zikuvhalilana nu Vhusimbe uVhufinjile vwe vhusimviilwe kuuti, “Insiku zyonti, tukupulumulwa kutugoga, mwe pe tukukuvhombela iwe. Iswe tukuvhombelwa havhiivhi inza ingʼonzi zye zikusogola kuvhoolwa.”

³⁷ Ileelo poosye inga zyonti izyo zikutwaga, iswe tukujendeelela kuzipoota kwi idala ilya Chilisiti we atukunzite iswe.

³⁸ Nalyoli imanyile kuuti naashimo ishintu she shingatulehaanya ni shikunzi isha Mulungu. Vhuvhe vhufwe, poosye vhulanzi, vhavhe vhe vhahavhizya, poosye avha maha ku mwanya, zivhe zye ziliipo, poosye zye zikwinza, poosye vivhe vipelwa vwe vili na maha,

³⁹ gavhe maha ga ku mwanya, poosye ga pa nsi. Shitaliipo ishipelwa naashimo she shingatulehaanya ni shikunzi isha Mulungu she shili mwa Chilisiti uYeesu uMwene wiitu.