VaLoma 7 - ULufingwi uLupwa

Vhe vhakulongolwa nu Yeesu vhatakulongolwa ni ndajizyo izya Moose

¹ Mwe vhamwitu, nkuyanga niimwe mwe muzimanyile indajizyo izya Moose. Mumanyile kuuti indajizyo zikumukonzya umuntu ahavhaliilizyo he mulanzi.

² Yeenya, ishiholanyo isha lulajizyo ulwa vhantu vhe vhimaliine. Umwantanda atangamuleha umulume, lwe umulume ali she akulandila. Ileelo umulume waakwe inga aafwa, pe umwantanda akuvha asatulwa kufuma ku lulajizyo ulwa kwimalwa nawo.

³ Ileelo inga ayiimalwa nu mwanaavuli uwunji she umulume waakwe ali she akulandila, umwantanda uyo akuvha muvhembu. Ileelo inga umulume waakwe aafwa, ululajizyo ulwo lutakumukunga havhili, inga ayiimalwa nu mwanaavuli uwunji atakuvha muvhembu.

⁴ Vhamwitu, vwe zili na kuli imwe. Inza vwe inga umuntu aafwa indajizyo zitakumukonzya, niimwe indajizyo izya Moose zitakuvhakonzya, mwe pe muli ngati mufuuye pooka nu Chilisiti pa shihovhenkanyo. Ishi imwe mwe vhantu vhaakwe we ázyusile, inga tuvhombaje imbombo inyinza zye zikumuhondezya uMulungu.

⁵ Ahavhaliilizyo he uvhuntu vhwitu uvhwa vhutalamalandu vhuhatukonzyaga iswe, indajizyo zyávhiisile impapilo imbiivhi izya mu mavhili giitu kuuti zivhe na maha nkaani. Ishi she shátuvhiisile kuuti tunyonywaje kuvhomba uvhutalamalandu ahavhaliilizyo honti. Ilyo lye lyátupeleeye uvhufwe.

⁶ Ileelo ishi tufuuye pooka nu Chilisiti, kwe kuuti tusatuliilwe kufuma mu ndajizyo. Ahavhaliilizyo iha tutakumuvhombela uMulungu kwi idala ilya hali ilya kulandata indajizyo zye zyásimviilwe, nkandi kwi idala ipwa ilya kulongolwa nu Mupepo uMufinjile.

Indajizyo nyinza

⁷ Ishi pe tuti vhuli? Tuti, indajizyo mbiivhi? Ndaali, te muumwo inga hansi! Nalyoli inga indajizyo zitáliipo, ine nkandi ntamanyile kuuti uvhutalamalandu shintu vhuli. Yeenya, inga ululajizyo lwe lukuti, “Utanyonywaje ishintu isha wamwinyu” lutáliipo, ine nkandi ntamanyile kuuti kunyonywa vhutalamalandu.

⁸ Ileelo lwe nalumanya ululajizyo ulu, pe uvhutalamalandu vhuhazivhuusya impapilo imbiivhi izya mavhiila mu mavhiila muhati yaane. Yeenya, inga indajizyo zitaliipo, uvhutalamalandu vhutakuvha na maha.

⁹ Insiku izya kwisinda lwe ntázimanyile indajizyo izya Moose, nkalandilaga inza vwe nkwanza. Ileelo lwe nazimanya indajizyo, nkamanya kuuti ine ne mutalamalandu.

¹⁰ Nkalola kuuti indajizyo izyo, zye zyáli zya kumpa uvhulanzi, zihavha zya kumpeleela uvhufwe.

¹¹ Yeenya, uvhutalamalandu kutuushila indajizyo izyo, vhuhankopenkanya nu kungoga.

¹² Kuli izyo, nalyoli indajizyo izya Mulungu mfinjile, ngolosu havhili nyinza.

¹³ Vhuli, ishintu ishinza isho she shándeteeye uvhufwe? Ndaali, te muumwo inga hansi! Uvhutalamalandu vhwe vhwámpeleeye uvhufwe kwi idala ilya shintu ishinza isho, inga kwi idala ilya ndajizyo uvhutalamalandu vhumanyishe kuuti vhuvhiivhi nkaani.

¹⁴ Tumanyile kuuti indajizyo zyáfumile kwa Mupepo uMufinjile, ileelo ine indi nu vhuntu uvhwa vhutalamalandu, kwe kuuti ne muzya uwa vhutalamalandu.

¹⁵ Yeenya, ntakumanya zye nkuzivhomba. Ilyinza liila lye nkwanza kulivhomba ntakulivhomba, nkandi liila lye nkuliviitilwa lye nkulivhomba.

¹⁶ Inga nkuvhomba zye ntakwanza, pe yikulolesya kuuti nkwitiha kuuti indajizyo nyinza.

¹⁷ Ipo ntakuvha neene ne nkulivhomba ilyo lye nkuliviitilwa, vhutalamalandu vhwe vhuli muli ine vhwe vhukuvhomba lyenelyo.

¹⁸ Imanyile kuuti muhati yaane, kwe kuuti mu vhuntu vhwane uvhwa vhutalamalandu mutali ishintu ishinza naashimo. Yeenya, nkwanza kuvhomba inyinza, ileelo yitakuvha vhwevhulo.

¹⁹ Nkuti mutali ishintu ishinza, mwe pe ntakuvhomba inyinza zye nkwanza, nkandi imbiivhi zye ntakwanza kuvhomba.

²⁰ Ishi, inga nkuvhomba ziila zye ntakwanza, pe nalyoli ntakuvha neene ne nkuvhomba zyenezyo, vhukuvha vhutalamalandu vhwe vhuli muhati yaane.

²¹ Pe ishi, nshivhwenyi ishintu ishi: Lwe nkwanza kuvhomba ishintu ishinza, nkwaga nsavhuuye ishintu ishivhiivhi.

²² Indajizyo izya Mulungu nkuzisungwa ku mwoyo waane wonti.

²³ Ileelo ivipelwa ivwa mu muvhili waane, amaha aga vhutalamalandu vhwe vhukulwa uvhulugu ni nsiivho zyane vhukuvikonzya. Amaha igo gakumbiiha kuvha ne muzya uwa vhutalamalandu vhwe vhukuvhomba imbombo mu muvhili waane.

²⁴ Nasheela ine! Wu naanu we kuuti amposhe nu muvhili uno we wukuntwala ku vhufwe?

²⁵ Nkumusalifwa uMulungu we kwi idala ilya Mwene wiitu uYeesu Chilisiti, akutupoha kufuma mu maha aga vhutalamalandu. Yeenya, ine neneene nkulandata indajizyo izya Mulungu mu nsiivho zyane, ileelo uvhuntu vhwane uvhwa vhutalamalandu vhukulandata indajizyo izya vhutalamalandu.