VaLoma 6 - ULufingwi uLupwa

Kufwa nu kuzyuha pooka nu Chilisiti

¹ Ishi pe tuti vhuli? Vhuli, tujendeelele kuvhomba uvhutalamalandu, inga uvhwila vhwa Mulungu vhwonjele kuvha na maha nkaani?

² Ndaali, te muumwo inga hansi! Kuzya vhutalamalandu iswe tuli ngati twe vhafwe. Kuli izyo, tutangajendeelela kuvhomba uvhutalamalandu.

^3-4 Mumanye kuuti lwe twozelwa, twásopenkiine nu Chilisiti uYeesu, kwe kuuti twámile ngati twafwa nu kusyilwa pooka nawo. Lwe uYeesu Chilisiti asyilwa, ázyusile ku maha amapiti aga Taata uMulungu. Kuli izyo, niiswe tuhazyuha pooka nawo, inga tulandilaje uvhulanzi uvhupwa.

⁵ Ishi, mwe pe twásopenkiine nu Chilisiti mu vhufwe vhwakwe lwe twozelwa, havhili kwi idala ilyo, tuhaholana nawo mu vhufwe vhwakwe, vhwevhulo nalyoli uMulungu akutuholanya nawo mu luzyuho lwakwe.

⁶ Tumanyile kuuti uvhuntu vhwitu uvhwa hali vhwáhomeliilwe pooka nu Chilisiti pa shihovhenkanyo, inga amaha aga vhuntu uvhwo uvhwa hali galovhe, tutahaavhe twe vhazya avha vhutalamalandu havhili.

⁷ Yeenya, umuntu inga aafwa pooka nu Chilisiti, akuvha musatushe nziila kufuma ku maha aga vhutalamalandu.

⁸ Ishi, mwe pe twáfuuye pooka nu Chilisiti, tukwitiha kuuti tulilandila pooka nawo.

⁹ Tumanyile kuuti uChilisiti ázyusile, te ahaafwe havhili, nu vhufwe vhutali na maha ku kwakwe havhili.

¹⁰ Kufwa kwakwe, áfuuye lwoka vhweleele, kuzya vhutalamalandu. Ishi mulanzi, na ku vhulanzi vhwe akulandila akumuhondezya uMulungu.

¹¹ Niimwe vhweleele muyilolaje kuuti mwe vhafwe kuzya vhutalamalandu. Havhili muyilolaje kuuti ku vhulanzi vhwe mukulandila mukumuhondezya uMulungu kwi idala ilya Chilisiti uYeesu.

¹² Pe ishi, mutahaaleshe uvhutalamalandu vhugakonzye amavhili giinyu ge gakufwa. Inga mwaleha vhwagakonzya, vhulivhapelela kulandata impapilo imbiivhi izya mavhili giinyu.

¹³ Havhili mutahaaleshe ivipelwa ivwa mu mavhili giinyu vivhe vwa kuvhombela uvhutalamalandu, nkandi muyifumwe kwa Mulungu inza avhantu vhe uMulungu avhazyusiizye, nu kuvhinjizya mu vhulanzi uvhupwa. Havhili muvifumwaje kwa Mulungu ivipelwa ivwo vivhombaje imbombo ingolosu.

¹⁴ Yeenya, uvhutalamalandu vhutaliivha na maha kuli imwe, mwe pe indajizyo zitakuvhakonzya, nkandi uvhwila uvhwa Mulungu.

Avhazya avha vhugolosu

¹⁵ Ishi pe tuti vhuli? Vhuli, tuvhombaje uvhutalamalandu, mwe pe indajizyo zitakutukonzya, nkandi uvhwila uvhwa Mulungu? Ndaali, te muumwo inga hansi!

¹⁶ Nalyoli mumanyile ahinza kuuti inga mwayifumwa kwa muntu nu kuvhomba zye akwanza, pe mukuvha mukumushindiha umuntu uyo, mukuvha mwe vhazya vhaakwe. Kwe kuuti inga mwalandata insiivho izya vhutalamalandu, mukuvha mwe vhazya avha vhutalamalandu. Ilyo likuvhapelela uvhufwe. Ileelo inga mukumulandata uMulungu mukuvha mwe vhazya vhaakwe, ilyo likuvhapelela uvhugolosu.

¹⁷ Ishi nkumusalifwa uMulungu. Mwáli mwe vhazya avha vhutalamalandu, ileelo ishi mwitisile insambiilizyo izya Shichilisiti zye muposheleeye, havhili mukuzilandata ku mwoyo wonti.

¹⁸ Musatuliilwe kufuma mu vhuzya uvhwa vhutalamalandu, muvhisiilwe kuvha mwe vhazya avha vhugolosu.

¹⁹ (Nayanjila mu shiholanyo ishi isha vhuzya, inga mumanye zye zikuyangwa, mwe pe imwe mwe vhayeyevhazu kufumiilana nu vhuntu vhwinyu uvhwa vhutalamalandu.) Lwe mwáshiili kumumanya uYeesu, muhavifumwaga ivipelwa ivwa mu mavhili giinyu kuuti vivhombaje imbombo iya vhuvhembu nu kwonjezya kuvhomba uvhutalamalandu uvhwamwavho. Ileelo ishi, mwe pe mumumanyile, muyifumwaje ivipelwa ivwa mu mavhili giinyu kuvhomba imbombo ingolosu, inga muvhe mwe vhazya vha Mulungu, pe woope avhazelufwe.

²⁰ Yeenya, ahavhaliilizyo haala he mwáli mwe vhazya avha vhutalamalandu, mutahalandataga ingolosu.

²¹ Vhuli, ahavhaliilizyo iho lwe muhavhombaga izyo zye ishi mukuzilolela insoni, mwáposheleeye lilonka vhuli? Uvhwanalyoli vhwe vhuno, zitali ni ilonka naalimo, uvhusililishilo vhwakwe vhufwe!

²² Ileelo ishi musatuliilwe kufuma mu vhutalamalandu, mwe vhazya vha Mulungu, ni ilonka lye mukuliposheela, vhufinjile na ku vhusililishilo uvhulanzi uvhwa shiima.

²³ Yeenya, amalipilo aga vhutalamalandu vhufwe, ileelo ishipeelwa she uMulungu akuutupa, vhulanzi uvhwa shiima kwi idala ilya Mwene wiitu uChilisiti uYeesu.