VaLoma 5 - ULufingwi uLupwa

UChilisiti akutukundanya nu Mulungu

¹ Ishi, mwe pe uMulungu atuvhaziizye kuuti swe vhagolosu kwi idala ilya kumwitiha uweene, tuli nu vhutehamu nawo kutuushila kwa Mwene wiitu uYeesu Chilisiti.

² Kwi idala ilya kumwitiha uYeesu, uMulungu átufwiliiye uvhwila, havhili poosye ishi atufwiliiye uvhwila. Ipo tukuseshela nkaani, mwe pe tukusuuvhila kuuti tuliivha pooka nu Mulungu mu vhutendamo vhwakwe uvhushindamu.

³ Havhili, poosye inga gatwinzila amayimba gonti, iswe tukujendeelela kuvha nu luseshelo, mwe pe tumanyile kuuti amayimba gakutuleetela uvhujimbiilizu.

⁴ Uvhujimbiilizu vhukuleeta ulujendo ulwinza, lwope ulujendo ulwinza lukuleeta ulusuuvhilo.

⁵ Ulusuuvhilo ulwo lutakutusuupizya, mwe pe uMulungu atulolesiizye ishikunzi shaakwe ishipiti mu mooyo giitu kwi idala ilya kuutupa uMupepo uMufinjile.

⁶ Yeenya, lwe twápezile tuli she swe vhayeyevhazu, lwe ahavhaliilizyo haafiha uChilisiti ahinza, ahatufwila iswe twe tutáali swe vhagolosu.

⁷ Nalyoli, shitazu umuntu kwitiha kumugoga kuzya muntu umugolosu. Ngavhanga umuntu angalinga kwitiha kumugoga kuzya muntu umwinza.

⁸ Ileelo uMulungu átulolesiizye kuuti atukunzite nkaani, kwi idala ilya kumufumwa uChilisiti atufwile iswe she twápezile twe vhatalamalandu.

⁹ Ishi, mwe pe tuvhaziliilwe kuuti twe vhagolosu kwi idala ilya mavhanda aga Yeesu, pe nalyoli kwi idala ilya Yeesu, tuliipokwa ku vhuhalazu uvhwa Mulungu.

¹⁰ Mwe pe inga uMulungu átukundiinye iswe nu weene kwi idala ilya vhufwe uvhwa Mwana waakwe, she twápezile twe vhalugu vhaakwe, pe nalyoli alitupoha ku vhuhalazu vhwakwe, kwi idala ilya vhulanzi uvhwa Mwana waakwe.

¹¹ Havhili, te lye liniilyo lyeka vhweleele, pooka niilyo uMulungu atuvhiisile kuuti tuseshele nkaani ku ziila zye atuvhombeeye, mwe pe kwi idala ilya Mwene uYeesu Chilisiti, tukundiine nu Mulungu.

UAadamu átupeleeye uvhufwe ileelo uYeesu atupeleeye uvhulanzi

¹² Vhamwitu, uvhutalamalandu vhwínjiiye mu nsi kwi idala ilya muntu wooka nu kutuleetela uvhufwe. Kuli izyo, avhantu vhonti vhakufwa, mwe pe vhatalamalandu.

¹³ Lwe indajizyo zishiili kwinza, uvhutalamalandu vhwáliipo mu nsi. Ileelo uvhutalamalandu vhutakuvhaazilwa kuvha vhutalamalandu ishisita indajizyo.

¹⁴ Poosye vhwevhulo, kufuma kwa Aadamu nu kufiha kwa Moose, uvhufwe vhwákonziizye poosye na ku vhantu vhe vhávhomvile uvhutalamalandu vhwe vhutáholiine na vhwe uAadamu ávhomvile. UAadamu áali shiholanyo isha Chilisiti we áyinzile pisinda.

¹⁵ Ileelo uvhutalamalandu vhwe vhwínzile kwi idala ilya Aadamu, shintu shinsi nkaani inga walingaanya nu vhwila uvhwa Mulungu vhwe vhwínzile kwi idala ilya Yeesu Chilisiti. Yeenya, umuntu wooka uAadamu ávhaziizye avhantu avhinji kufwa kufumiilana nu vhutalamalandu vhwakwe. Ileelo umuntu wooka uYeesu Chilisiti, akuuvhapa avhantu avhinji uvhwila uvhwa kuswilwa uvhutalamalandu vhwavho nu kuposheela uvhulanzi.

¹⁶ Havhili vwe uMulungu akuvhaswila avhantu ku vhwila vhwakwe kutakuholana na ziila zye zikufumiilana nu vhutalamalandu uvhwa Aadamu. Yeenya, lwe vhwavhombwa uvhutalamalandu vhuula vhwoka, uMulungu ávhalonzile avhantu nu kuuvhapa isunde. Havhili, ishi lwe vhwavhombwa uvhutalamalandu uvhwinji, uMulungu ku vhwila vhwakwe akuvhavhaazya avhantu kuuti vhagolosu.

¹⁷ Uvhutalamalandu uvhwa muntu wooka, vhwávhiisile uvhufwe vhuvhakonzye avhantu vhonti. Ileelo nalyoli vhaala vhe vhakuposheela uvhwila vhwe vhutali ni shipimilo kufuma kwa Mulungu nu kuvhaazilwa kuuti vhagolosu, vhalikonzya, mwe pe vhaliivha nu vhulanzi uvhwa shiima kwi idala ilya ziila zye ávhomvile umuntu uwamwavho, uYeesu Chilisiti.

¹⁸ Ishi, inza vwe avhantu vhonti vhálonziilwe kufumiilana nu vhutalamalandu vhwoka uvhwa muntu wooka, vhwevhulo avhantu vhonti vhakuvhaazilwa kuuti vhagolosu nu kupeelwa uvhulanzi kufumiilana ni mbombo yooka ingolosu iya muntu wooka.

¹⁹ Yeenya, inza vwe umuntu wooka áhaanile kumushindiha uMulungu, ahavhapelela avhantu avhinji kuvha vhatalamalandu, vhwevhulo umuntu wooka we ámushindisile uMulungu, alivhapelela avhantu avhinji kuvha vhagolosu.

²⁰ Indajizyo izya Moose zyínzile, inga amaha gonti aga vhutalamalandu galoleshe. Ileelo lwe amaha aga vhutalamalandu galoleha, vhwope uvhwila uvhwa Mulungu vhuhonjela kuvha na maha nkaani.

²¹ Pe ishi, inza vwe uvhutalamalandu vhwámile na maha aga kuvhakonzya avhantu nu kuvhapelela uvhufwe, vhwevhulo kwi idala ilya kuvhavhaazya kuuti vhagolosu, uvhwila uvhwa Mulungu vhukuvhakonzya avhantu nu kuvhapelela uvhulanzi uvhwa shiima kwi idala ilya Yeesu Chilisiti uMwene wiitu.