VaLoma 4 - ULufingwi uLupwa

Ishiholanyo isha Aabulahamu shikulolesya uvhumwamu uvhwa lwitiho

¹ Pe ishi, kulandatana ni nongwa izya kuvhaazilwa uvhugolosu, iswe swe Vhayuuda tuyanje ishooni izya Aabulahamu, utaata wiitu kuzya muvhili?

² Inga tukuti uAabulahamu ávhaziliilwe kuuti mugolosu ku mbombo zyakwe inyinza, uweene nkandi ali ni shintu isha kuyibaadila. Ileelo uvhwanalyoli vhukuti, atali ni shintu isha kuyibaadila pilongolela lya Mulungu.

³ Yeenya, uVhusimbe uVhufinjile vhukuti, “UAabulahamu ámwitisile uMulungu, pe uMulungu ahamuvhaazya kuuti mugolosu.”

⁴ Nalyoli umuntu inga avhomba imbombo, amalipilo gaakwe gatakuvha shipeelwa, gakuvha shintu she akwanzilwa kuposheela.

⁵ Ileelo umuntu we atakusuuvhila imbombo zyakwe, nkandi akumwitiha uMulungu we akumuvhaazya kuuti mugolosu, pooka nu kuuti te mugolosu, uyo we uMulungu akumuvhaazya kuuti mugolosu kulandatana nu lwitiho lwakwe.

⁶ Umwene uDaavhudi áyanzile inongwa izya vhuloote uvhwa muntu we uMulungu akumuvhaazya kuuti mugolosu ishisita kwenya imbombo zyakwe, átili,

⁷ “Vhalosiitwe vhaala vhe uMulungu avhaswiliiye uvhutalamalandu vhwavho, nu kuvhwefwa nziila.

⁸ Alosiitwe umuntu we uMWENE uMulungu atakumuvhaazya, kuuti mutalamalandu.”

⁹ Vhuli, uvhuloote uvhwo vhwe vhukuyangwa nu Daavhudi, vhwa Vhayuuda vheeka, mwe pe vhatahiliilwe, pamo vhwa pooka na vhantu avhanji, vhe te Vhayuuda vhe vhatatahiliilwe? Mukumbushe kuuti uVhusimbe uVhufinjile vhukuti, uMulungu ámuvhaziizye uAabulahamu kuuti mugolosu kwi idala ilya lwitiho lwakwe kwa Mulungu.

¹⁰ Ileelo zyáfumiiye lyeli? Nkuhomeelezya kuuti uAabulahamu ávhaziliilwe kuuti mugolosu, lwe ashiili kutahiililwa!

¹¹ Kutahiililwa kwakwe sháali shilolesyo ku kwakwe isha kumulolesya kuuti uMulungu ámuvhaziizye kuuti mugolosu kufumiilana nu lwitiho, lwe áamile nalwo lwe ashiili kutahiililwa. Kwi idala ilyo, uAabulahamu wu taata waavho vhonti vhe vhakwitiha, poosye she vhatatahiliilwe, inga vhoope vhavhaazilwe kuuti vhagolosu.

¹² Avhantu vhe vhatahiliilwe vhoope, uAabulahamu wu taata waavho mu lwitiho. Yeenya, atakuvha wu taata waavho, mwe pe vhatahiliilwe, nkandi, mwe pe vhakumwitiha uMulungu inza vwe uweene uAabulahamu áali lwe ashiili kutahiililwa.

¹³ UMulungu áfinzile nu Aabulahamu na vhantu avha mu luho lwakwe kuuti, aliivhapa insi yonti kuuti yivhe vhupwano vhwavho. UMulungu atáfinzile isho nu Aabulahamu, mwe pe ahazilandataga indajizyo, nkandi, mwe pe ámwitisile uMulungu. Pe uweene uMulungu ahamuvhaazya uAabulahamu kuuti mugolosu.

¹⁴ Yeenya, inga yaamile kuuti aVhayuuda vhe vhakulandata indajizyo vhe vhakupwana izyo zye uMulungu áfinzile, pe kumwitiha uMulungu kutali ni ilonka naalimo. Ipo lwope ulufingwi ulwa Mulungu, nkandi lwa ilenga,

¹⁵ mwe pe indajizyo zikuleeta uvhuhalazu uvhwa Mulungu. Ileelo inga indajizyo zitaliipo, pe kutaliipo kushilanya indajizyo.

¹⁶ Ili lye likuvhiiha kuuti ulufingwi ulwa Mulungu lusuuvhile kumwitiha uweene nu vhwila vhwakwe. Kwi idala ilyo, ziila zye uMulungu áfinzile ku vhantu vhonti avha mu luho ulwa Aabulahamu, zivhe zya nalyoli. Kwe kuuti, yitakuvha ku Vhayuuda vhe vhakuzilandata indajizyo vheeka, nkandi poosye na ku vhaala vhe vhakumwitiha uMulungu inza uAabulahamu. Iswe swenti utaata wiitu mu lwitiho wu Aabulahamu.

¹⁷ Izi zili inza vwe yisimviilwe mu Vhusimbe uVhufinjile kuuti, “Nkuvhiisile kuvha we taata uwa vhantu avha mu nkolo inyinji.” UAabulahamu áyivuuye izi zye uMulungu áfinzile ku kwakwe, lwe ayimiliiye pilongolela lyakwe. Ahamwitiha uMulungu we akuvhazyusya avhafwe na we akuviyanga ivintu vwe vitaliipo fwe ngati viliipo.

¹⁸ Pooka nu kuuti amazwi aga Mulungu gáali magomu kugiitiha, uAabulahamu ágitisile nu kusuuvhila. Pe ahavha wu taata uwa nkolo inyinji, inza vwe uMulungu ámuvhuziizye kuuti, “Avhantu avha mu luho lwaho vhaliivha vhinji inza inzota.”

¹⁹ Ahavhaliilizyo he uMulungu ámuvhuziizye, uAabulahamu áamile na maaha 100 ishi. Uweene ámanyile kuuti, umuvhili waakwe wáamile ngati wufuuye, havhili woope umushi waakwe uSaala áamile mugumba. Ileelo pooka niizyo ulwitiho lwakwe lutátozosile.

²⁰ Havhili atáali nu mwoyo uwa maganigani kuzya lufingwi ulwa Mulungu. Ájendeleeye kumwitiha nu kumushindiha uMulungu,

²¹ mwe pe nalyoli ámanyile kuuti uMulungu kwe avhombe ziila zye áfinzile ku kwakwe.

²² Ye nongwa uVhusimbe uVhufinjile vhukuti, uMulungu ámuvhaziizye kuuti mugolosu.

²³ Ileelo amazwi igo ge gakuti, “UMulungu ámuvhaziizye kuuti mugolosu,” gatásimviilwe kwe kwa Aabulahamu weeka,

²⁴ nkandi na kuli iswe swenti. Nalyoli gakutuvhuuzya kuuti, inga twamwitiha uMulungu, we ámuzyusiizye uMwene wiitu uYeesu, pe niiswe vhweleele tulivhaazilwa kuuti swe vhagolosu.

²⁵ UMulungu ámufumwizye uYeesu kuvha mpuutile kuzya vhutalamalandu vhwitu, havhili ámuzyusiizye, inga tuvhaazilwe kuuti swe vhagolosu.