VaLoma 3 - ULufingwi uLupwa

UMulungu mutungamu ku Vhayuuda

¹ Ishi kulandatana niizyo, kuli lilonka vhuli kuvha we Muyuuda? Vhuli, kutahiililwa kuli lilonka vhuli?

² Nalyoli kuvha we Muyuuda kuli ilonka ipiti. Ipiti kuli izyo, uMulungu ávhapiiye aVhayuuda indajizyo, inga vhazisunjiilile nu kuzilandata mu vhulanzi vhwavho.

³ Ileelo nalyoli aVhayuuda vhamo vhatáamile vhatungamu. Vhuli! Tuti, avhantu ivho vhe te vhatungamu kwa Mulungu, vhakumuvhiiha uMulungu kuuti woope aleshe kuvha mutungamu kuvhomba zye áfinzile?

⁴ Ndaali, te muumwo inga hansi! UMulungu akuvhalolesya avhantu kuuti uweene akuyanga izya nalyoli nu kuzivhomba, poosye inga avhantu vhonti vhakuluma ilenga. Yeenya, uVhusimbe uVhufinjile vhukuti, “Inga wavhavhuuzya avhantu vhaaho uvhutalamalandu vhwavho, amazwi gaaho ga nalyoli. Inga wavhalonga, uvhulonzi vhwaho vhugolosu.”

⁵ Ileelo inga imbiivhi zyitu zikuhomeshezya kuuti uMulungu akuvhomba ku vhugolosu, tuti vhuli? Vhuli, tuti te mugolosu lwe akuutupa isunde? (Nkuyanga fwe ne muntu.)

⁶ Ndaali, te muumwo inga hansi! Inga vwe zili vhwevhulo, pe uMulungu alivhalonga vhuli ku vhugolosu avhantu avha mu nsi?

⁷ Wumo angavhuziilizya angati, “Inga kuhopenkanya kwitu kukwavwa kulolesya kuuti uMulungu akuvhomba izya nalyoli nu kwonjezya uvhushindamu vhwakwe, pe shooni she nkulongwa kuuti ne mutalamalandu?”

⁸ Isho she shooka nu kuuti, “Tujendeelele kuvhomba uvhutalamalandu, inga inyinza zyinze.” Avhantu vhamo vhakutuyanjila imbiivhi kuuti tukusambiilizya inza vhwevhulo. Yeenya, ivho vhonti vhe vhakuyanga izyo vhalisundwa kulandatana ni mbiivhi zyavho.

Ataliipo umuntu umugolosu

⁹ Pe ishi, tuti vhuli? Vhuli, iswe swe Vhayuuda twe vhinza kuluusya vhe te Vhayuuda? Ndaali, te muumwo inga hansi. Yeenya, inza vwe navhalolesya imbiivhi zyavho, aVhayuuda na vhe te Vhayuuda, vhonti uvhutalamalandu vhukuvhakonzya.

¹⁰ Izyo zikuvhalilana nu Vhusimbe uVhufinjile vhwe vhukuti, “Ataliipo umuntu we mugolosu inga wooka.

¹¹ Ataliipo umuntu we amumanyile uMulungu, havhili ataliipo we akumulondola.

¹² Avhantu vhonti vhalesile kumushindiha uMulungu, yeenya, vhonti vhatali ni ilonka pilongolela lyakwe. Ataliipo umuntu we akuvhomba inyinza, ataliipo inga wooka.”

¹³ “Amalomu gaavho gali ngati mbiipa ye yili ukwazi, imili zyavho zikuyanga ilenga.” “Mu malomu gaavho, gakufuma amazwi amavhiivhi ge gali ngati nsalile izya njoha.”

¹⁴ “Zye vhakuyanga zyizuuye intipo nu kuvhavwalazya avhanji.”

¹⁵ “Ivinama vwavho vipupuusu kusogola kugoga.

¹⁶ Ponti pe vhakusogola, vhakuvhavwalazya avhanji nu kuvhayimvwa.

¹⁷ Avheene vhatalimanyile idala ilya kulandila na vhanji ku vhutehamu.”

¹⁸ “Vhatakumunyila uMulungu naalumo.”

¹⁹ Ishi, tukulola kuuti amazwi ge gakufuma mu Vhusimbe uVhufinjile, inga gayanga shimo, gakuvhavhuuzya vhe vhápeliilwe genego. Ageene gávhisiilwe kuuti lwe uMulungu ayilonga insi, avhantu vhonti vhatahaavhe ni lya kuyiyanjila, havhili yiloleshe apazelu kuuti avhantu vhonti vhavhiivhi pilongolela ilya Mulungu.

²⁰ Yeenya, ataliipo umuntu we alivhaazilwa kuuti mugolosu pilongolela ilya Mulungu kwi idala ilya kulandata indajizyo vwe zikuyanga. Imbombo iya ndajizyo kwe kulolesya kuuti avhantu vhonti vhatalamalandu.

Umuntu akuvhaazilwa kuuti mugolosu kwi idala ilya kumwitiha uYeesu

²¹ Ishi uMulungu atulolesiizye idala lyakwe ilya kutuvhaazya kuuti swe vhagolosu, ishisita indajizyo. Zyope indajizyo izya Moose nu vhusimbe uvhwa vhakuvhwi vikuyanga apazelu izya idala ilyo.

²² Idala ilyo kwe kumwitiha uYeesu Chilisiti. Kwi idala ilyo, uMulungu ishisita kusavhulanya akuvhavhaazya kuuti vhagolosu avhantu vhonti vhe vhakumwitiha uYeesu.

²³ Yeenya, avhantu vhonti vhavhomvile uvhutalamalandu, nu kusheepelwa uvhushindamu uvhwa Mulungu.

²⁴ Ileelo uMulungu ku vhwila vhwakwe, atuvhaziizye kuuti twe vhagolosu pa vhweleele kwi idala ilya vhutavhuzi vhwe vhuli mwa Chilisiti uYeesu.

²⁵ UMulungu ámufumwizye uYeesu kuvha mpuutile iya kuvhakundanya avhantu nu weene, kwi idala ilya kwita amavhanda gaakwe, avhantu vhe vhakwitiha kuuti áfuuye kuzya vhutalamalandu vhwavho vhaswilwe. UMulungu ávhomvile vhwevhulo kulolesya kuuti uweene mugolosu. Yeenya, uweene ájimbiliiye, atávhapiiye isunde ku vhutalamalandu vhwavho vhwe vhátazile ahavhaliilizyo aha mwisinda.

²⁶ Havhili, ávhomvile vhwevhulo, inga ahavhaliilizyo iha alolesye uvhugolosu vhwakwe. Uweene mugolosu, havhili we akuvhavhaazya avhantu vhe vhakumwitiha uYeesu kuuti vhagolosu.

²⁷ Pe ishi, inongwa izi zikutudindila nziila kuyitumvwa, mwe pe tutakuvhaazilwa kuuti twe vhagolosu kwi idala ilya kulandata indajizyo izya Moose, nkandi kwi idala ilya kumwitiha uYeesu vhweleele.

²⁸ Ishi, tukulola kuuti uMulungu akumuvhaazya umuntu kuuti mugolosu kwi idala ilya kumwitiha uYeesu, te kwi idala ilya kulandata indajizyo izya Moose.

²⁹ Amwe, uMulungu wu Mulungu uwa Vhayuuda vheeka? Te wu Mulungu uwa vhe te Vhayuuda vhoope? Nalyoli uweene wu Mulungu uwa vhantu vhonti,

³⁰ mwe pe kuli uMulungu wooka, havhili kuli idala lyoka ilya kuvhavhaazya avhantu kuuti vhagolosu pilongolela lyakwe. Kwandila ku Vhayuuda vhe vhakutahiililwa kufishila ku vhantu vhe te Vhayuuda vhe vhatakutahiililwa, vhonti vhakwitishilwa nu Mulungu kuuti vhagolosu kwi idala ilya kumwitiha uYeesu.

³¹ Pe ishi, lwe tukuhomeelezya kwitiha, vhuli, kwe kuuti indajizyo izi zitali ni ilonka? Ndaali! Inga tuli nu lwitiho, pe tukupela twavhomba ziila zye indajizyo zikulajizya.