VaLoma 16 - ULufingwi uLupwa

Umulaamu uwa Paavhuli ku vhantu amavhiila mu mavhiila

¹ Nkwanza mumanye kuuti uwamwitu uFiibi, muntu mwinza. Uweene muvhomvi uwa mu shivhanza she shili mu nkaaya iya Kenkileeya.

² Nkulaavha mumuposheele ahinza, mwe pe mwitisi uwa Mwene uYeesu. Kuposheela avhantu inza vhwevhulo vwe yikwanzilwa ku vhafinjile. Havhili mumwavwe shonti she asovheliilwe, mwe pe woope avhavwizye avhantu avhinji nkaani, niine vhuulo anavwizye.

³ Mundamushile uPuliisila nu Aakila, avhavhomvi avhamwitu mu mbombo iya Chilisiti uYeesu.

⁴ Avheene vhatásajiiye poosye kuvhulovwa uvhulanzi vhwavho, ku zyane. Nkuvhasalifwa nkaani, te neene neeka ne nkuvhasalifwa, nkandi na vhantu avha mu vivhanza vwonti ivwa vhe te Vhayuuda, vhoope vhakuvhasalifwa.

⁵ Havhili, mundamushile avhiitisi vhe vhakuhomaana mu nyumba yaavho, pooka nu nkundwa waane uEpayineeto, we áali wa kwanda kumwitiha uChilisiti mu shigavho isha nsi isha Aasiya.

⁶ Mundamushile uMaliiya, we ávhomvile imbombo ku mute ku zyinyu.

⁷ Havhili mundamushile uAndulooniko nu Yuuniya, aVhayuuda avhamwitu vhe vhákunziilwe pooka niine mu jeela. Avhantu ivho vhándongoleeye ine kumwitiha uChilisiti, havhili vhamanyisile nkaani mu vhatumwa.

⁸ Mundamushile uAmpiliyaato, unkundwa waane mwa Mwene uYeesu.

⁹ Mundamushile uAlubaano, umuvhomvi uwamwitu mu mbombo iya Chilisiti, pooka nu nkundwa waane uSitaaku.

¹⁰ Mundamushile uApeele, we atuusile mu ndingo inyinji nu kwitishilwa nu Chilisiti, havhili mundamushile avhantu avha mu nyumba iya Alisitoobulo.

¹¹ Mundamushile uHelodiyooni, uMuyuuda uwamwitu, na vhantu vhe vhali mu nyumba iya Naliikiso, vhe vhamwitisile uMwene uYeesu.

¹² Mundamushile uTilifaayina nu Tilifoosa. Avhantanda ivho vhakuvhomba ku mute nkaani imbombo iya Mwene uYeesu. Havhili, mundamushile unkundwa waane uPeelesi. Uno woope mwantanda we ávhomvile ku mute nkaani imbombo iya Mwene uYeesu.

¹³ Mundamushile uLuufo, umusaavhulwa uwa Mwene uYeesu, havhili mundamushile nu maayi waakwe, we ánavwizye ine ngati ne mwana waakwe.

¹⁴ Havhili, mundamushile uAsinkiliito nu Filegooni nu Heelime nu Patilooba nu Heelima na vhamwitu vhe vhali pooka navho.

¹⁵ Mundamushile uFiloologo nu Yuuliya nu Neeleya nu munine umulindu, nu Oolimpa, pooka na vhafinjile vhonti vhe vhali navho.

¹⁶ Ku vhusililishilo, mulamunkane mwenti ku lwofwanyo ulwa shikunzi. Avhiitisi vhonti avha mu vivhanza ivwa Chilisiti vwe vili uku vhakuvhalamuha.

Insoshi nu mulaamu uwa vhusililishilo

¹⁷ Ishi, vhamwitu, nkuvhasoha kuuti muvhe minso na vhantu vhaala, vhe insambiilizyo zyavho zikuvhavhiiha avhiitisi kuuti vhatapunkane. Muvhe apatali navho, mwe pe insambiilizyo zyavho zikusugaana ni nsambiilizyo zye musambiliiye. Mutantame navho.

¹⁸ Nalyoli avhantu inza ivho vhatakumuvhombela uMwene wiitu uChilisiti, vhakuvhomba ku nsiivho iya kulondola ivintu ivwa kulya vhuuvho. Ku vhuhopenkanyi vhwavho, vhakuyanga amazwi aminza aga kuvhahondezya, fwandi vhakuvhahopenkanya avhantu avha lwitiho uluyeyevhazu.

¹⁹ Avhantu vhonti vhivuuye kuuti imwe mulilemile ahinza izwi ilya Mulungu. Izyo zikumbiiha kuuti nseshele nkaani, ileelo nkwanza kuuti muvhe nu vhushindamu uvhwa njeele ku mbombo inyinza, havhili mutakweswaje ni mbiivhi.

²⁰ Ishi, uMulungu we akuutupa uvhutehamu alimutinzanya uSeetano nu kuuvhapa imwe amaha aga kumupoota. UMwene wiitu uYeesu Chilisiti avhafwilaje uvhwila.

²¹ UTiimoti, umuvhomvi uwamwitu, akuvhalamuha. Havhili, vhoope aVhayuuda avhamwitu avha Luukiyo nu Yaasoni nu Sosipeeteli, vhakuvhalamuha.

²² Niine ne Telitiiyo, ne musimvi uwa mazwi aga mwa kalaata uno uwa Paavhuli, nkuvhalamuha kwi izina ilya Mwene uYeesu.

²³ UGaayo we nkutendama mu nyumba yaakwe, havhili we mu kwakwe mwe avhantu avha mu shivhanza shonti isha Mwene uYeesu vhakuvhungaana, akuvhalamuha. Woope uElaasito, we akusengula impiiya izya nkaaya ino, akuvhalamuha, havhili woope uwamwitu uKwalito, akuvhalamuha.

²⁴ UMwene wiitu uYeesu Chilisiti avhafwilaje uvhwila imwe mwenti. Amina.

UPaavhuli akumushindiha uMulungu

²⁵ Ishi, ashindikwaje uMulungu! Uweene ali na maha aga kuvhagomwa kwi idala ilya Izwi iLyinza ilya Yeesu Chilisiti lye nkukumusya. Izwi ilyo, hali lyáli kukwilu.

²⁶ Ileelo uMulungu uwa shiima álajiziizye kuuti Izwi ilyo liloleshe apazelu kutuushila mu Vhusimbe uVhufinjile uvhwa vhakuvhwi. Havhili kuuti avhantu avha mu nsi zyonti vhalimanye Izwi ilyo, inga vhamwitishe nu kumushindiha.

²⁷ UMulungu weeka we ali nu vhushindamu uvhwa njeele vhwonti, ashindikwaje shiima kuzya Yeesu Chilisiti! Amina.