VaLoma 15 - ULufingwi uLupwa

Izya kuvhahondezya avhanji

¹ Ishi iswe twe tugomile mu lwitiho, yikwanzilwa tuvhajimbililaje vhaala vhe vhatagomile mu lwitiho, tuleshe kuvhomba ziila zye zikutuhondezya sweneeswe.

² Avhantu vhonti muli iswe, vhavhavhombelaje inyinza avhamwavho, inga vhazengwaje mu lwitiho.

³ Yeenya, woope uChilisiti atáyisivhiliiye wuuyo weeka, nkandi zye ávhomvile zikuvhalilana nu Vhusimbe uVhufinjile vhwe vhukuti, “Indigo zye vhakukuliga iwe Mulungu, zyánaazile ine.”

⁴ Zyonti zye zyásimviilwe hali, zyásimviilwe kuvha nsambiilizyo zyitu. UVhusimbe uvhwo vhukutwavwa kujimbiilila nu kutusuvhaalizya, lwe tukuguliilila kuuti zilunjishe zye uMulungu áfinzile.

⁵ UMulungu we akuutupa uvhujimbiilizu nu kutusuvhaalizya amooyo giitu, avhavhiishe kuuti muvhe ni nsiivho zyoka lwe mukumulandata uChilisiti uYeesu.

⁶ Ipo pe imwe mwenti kwe mumutiimaje uMulungu, uTaata uwa Mwene wiitu uYeesu Chilisiti ku mwoyo wooka na ku lumili lwoka.

UMulungu akuvhiitiha aVhayuuda na vhe te Vhayuuda

⁷ Ishi muposhelanaje inza vwe woope uChilisiti avhaposheleeye imwe, inga uMulungu ashindikwaje.

⁸ Yeenya, nkuvhavhuuzya imwe kuuti, uChilisiti áyinzile kuvhavhombela aVhayuuda, inga yiloleshe kuuti uMulungu mutungamu, kwe kuuti, kwi idala ilya Chilisiti, alunjisiizye zye áfinzile ku vhataata vhaavho.

⁹ Havhili, áyinzile, inga avhantu vhe te Vhayuuda vhamushindihaje uMulungu ku vhwila vhwakwe inza vwe uVhusimbe uVhufinjile vhukuyanga vhukuti, “Kuli izyo, ndikutiima ku vhantu vhe te Vhayuuda. Havhili ndiyimba inyimbo izya kulitiima izina lyaho.”

¹⁰ Havhili uVhusimbe vhukuyanga vhukuti, “Mwe vhantu vhe te Vhayuuda, seshelaaji pooka na Vhaisilayeeli, avhantu vha Mulungu.”

¹¹ Havhili vhukuti, “Mwe vhantu mwe te mwe Vhayuuda mumutiime uMWENE uMulungu. Mwe vhantu avha mu nsi zyonti mumutiime uMulungu!”

¹² Woope umukuvhwi uYisaayi átili, “Umuntu wumo mu luho ulwa Yeese aliyinza, aliyinza kuzikonzya inkolo zyonti, na vhantu avha mu nsi zyonti vhalimusuuvhila kuuti avhaposhe.”

¹³ Pe ishi, nkulaavha kuuti uMulungu we akuutupa ulusuuvhilo, avhiizuzye uluseshelo lwonti nu vhutehamu mu lwitiho lwinyu, inga ulusuuvhilo lwinyu lwonjele ku maha aga Mupepo uMufinjile.

Insiivho izya Paavhuli izya kusimba inongwa izi

¹⁴ Mwe vhamwitu, ine neneene, nalyoli imanyile kuuti imwe mwizuuye uvhwinza nu kumanya zye zikwanzilwa kuvhomba, havhili mungasambilizanya.

¹⁵ Ileelo inongwa zimo mbasimbiiye ku vhudandamazu nkaani, inga mbakumbusye zyenezyo. Mbomvile vhwevhulo kulandatana nu vhwila vhwe uMulungu ampiiye,

¹⁶ kuuti mbe ne muvhomvi uwa Chilisiti uYeesu ku vhantu vhe te Vhayuuda. Nkuvhalumbiilila Izwi iLyinza, inga mbe inza umupuuti we akuvhafumwa imwe kwa Mulungu, inza impuutile iya kumuhondezya uMulungu, havhili ye uMupepo uMufinjile ayizelufwizye.

¹⁷ Ishi kufumiilana nu Chilisiti uYeesu, nkuyitumvwa ku mbombo ye nkumuvhombela uMulungu.

¹⁸ Niine te njanje naashimo ishinji, nkandi sheshiila she uChilisiti ávhomvile kutuushila kuli ine, isha kuvhavhiiha vhe te Vhayuuda kuuti vhamushindishe. Ávhomvile vhwevhulo kutuushila ku mazwi ge nkayangaga na ku mbombo zye nkavhombaga,

¹⁹ havhili kwi idala ilya maha aga vilolesyo ni zya kusukumizya, na ku maha aga Mupepo uMufinjile. Kuli izyo, nzyunguluuye mwonti kulumbiilila Izwi iLyinza ilya Chilisiti, kwandila mu nkaaya iya Yelusaleemu kufishila mu nsi iya Ililiiko.

²⁰ Muli zyonti izi, insiivho zyane kwe kulumbiilila Izwi iLyinza kwe uChilisiti atamanyisile, inga ntahinze inzenje pa lwalo ulwa muntu uwunji.

²¹ Izi zikuvhalilana nu Vhusimbe uVhufinjile vhwe vhukuyanga vhukuti, “Avhantu vhe vhatavhavhuziizye inongwa zyakwe, vhalimulola, vhoope vhe vhativuuye zyenezyo, vhalimumanya.”

Umwoyo uwa Paavhuli kusogola mu nkaaya iya Luumi

²² Imbombo iyo ye yoope ulwinji yandindilaga kwinza kuli imwe.

²³ Ileelo ishi, naamala imbombo yaane mu nsi ye indi, havhili amaaha aminji nsamvile kuvhavuula ukwo.

²⁴ Nkusuuvhila kwinza kuvhalola, lwe nkutuuha kusogola ku Hisipaaniya. Havhili nkusuuvhila kuposheela kuli imwe ivwa kunaavwa kujendeelela nu vhulendo uvhwa kusogola ku Hisipaaniya, lwe natendama nu kuseshela pooka niimwe ku havhaliilizyo hansi.

²⁵ Ileelo ishi nkusogola ku Yelusaleemu kutwala ivwa kuvhaavwa avhafinjile avha kuula.

²⁶ Avhiitisi avha ku Makedooniya na ku Akaaya vhaavhwenyi kuuti hinza kusanga ivintu vwavho, kuvhaavwa avhapiina mu vhafinjile avha ku Yelusaleemu.

²⁷ Avhiitisi ivho vhaavhomvile izyo ku luseshelo, havhili nalyoli vhakudaayilwa kuvhaavwa avhapiina ivho. Yeenya, inga avhantu vhe te Vhayuuda vhali nu vhuliilani mu vhuloote uvhwa Mupepo uMufinjile, kutuushila ku Vhayuuda, pe vhoope vhakwanzilwa kuvhaavwa aVhayuuda ivintu vwavho vwe vhali navwo.

²⁸ Lwe naamala imbombo iyo, iya kuuvhapa ivwa kuvhaavwa avhapiina ivho, pe ndituushila kuvhalola imwe lwe ndi mu vhulendo uvhwa kusogola ku Hisipaaniya.

²⁹ Imanyile kuuti, lwe ninza kuli imwe uChilisiti aliloota nkaani ahavhaliilizyo aha kutendama pooka, ine niimwe.

³⁰ Mwe vhamwitu, ku maha aga Mwene wiitu uYeesu Chilisiti na ku shikunzi she uMupepo uMufinjile akuutupa, nkuvhalambiilizya ku mwoyo waane wonti, kuuti muvhe pooka niine, kundaavhila ine kwa Mulungu.

³¹ Mundavhilaje kuuti avhantu vhe vhatamwitisile uYeesu mu nsi iya Yudeeya vhatahambombele uvhuvhiivhi. Havhili mundavhilaje, inga avhafinjile avha ku Yelusaleemu vhiitishe kuposheela ivwa kuvhaavwa vwe nkuvhatwalila.

³² Ilyo inga lyavhombeha vhwevhulo, inga uMulungu akasiime, ndiyinza ku luseshelo kuli imwe, intuuzye pooka niimwe.

³³ UMulungu we akuutupa uvhutehamu, avhanje niimwe mwenti! Amina.