VaLoma 14 - ULufingwi uLupwa

Utamulongaje uwamwinyu

¹ Mumuposheelaje uwamwinyu we muyeyevhazu mu lwitiho, mutadalinkanaje nawo ku nsiivho zyakwe zye zikusugaana ni zyinyu.

² Yeenya, umuntu wumo kulandatana nu lwitiho lwakwe ali nu vhusatushe uvhwa kulya ivintu vwonti, ileelo uwamwavho we muyeyevhazu mu lwitiho, akulola kuuti akwanzilwa kulya zye nyanyi izya matundu.

³ We akulya ivintu vwonti atamusufwaje we akulya zye nyanyi izya matundu, woope we akulya zye nyanyi izya matundu, atamusufwaje we akulya ivintu vwonti, mwe pe uMulungu amuposheleeye uweene.

⁴ Ishi iwe we naanu we ungamulonga umuvhomvi uwa muntu uwunji? Umwene waakwe we amanyile inga umuvhomvi waakwe avhomvile ahinza, pamo avhomvile havhiivhi. Umuvhomvi uyo alivhombaga inza vwe yikwanzilwa, mwe pe uMwene uYeesu ali na maha aga kumuvhiiha kuuti avhombaje ahinza.

⁵ Umuntu wumo akulishindiha isiku limo kuluusya izinji, wumo akulola kuuti insiku zyonti ziholiine. Ishi umuntu wonti alandataje zye akulola kuuti nyinza mu mwoyo waakwe.

⁶ Umuntu we akulishindiha nkaani isiku limo kuluusya izinji, akuvhomba vhwevhulo kumuhondezya uMwene uYeesu. Woope we akulya ivintu vwonti, akuvhomba vhwevhulo kumuhondezya uMwene, mwe pe akumusalifwa uMulungu. Woope we akulya zye nyanyi izya matundu akuvhomba vhwevhulo kumuhondezya uMwene uYeesu, woope akumusalifwa uMulungu.

⁷ Mwe pe iswe ataliipo we akulandila kwi ilonka lyakwe, havhili ataliipo we akufwa kwi ilonka lyakwe wuuyo.

⁸ Inga tukulandila, tukulandila ku vhushindamu uvhwa Mwene, poosye inga tukufwa, tukufwa ku vhushindamu vhwakwe. Pe ishi, inga tukulandila, poosye inga tukufwa, tuli she tukuvha twe vhantu vha Mwene uYeesu.

⁹ Kuli izyo, uChilisiti áfuuye nu kuzyuha, inga avhe wu Mwene uwa vhantu vhonti, avhafwe na vhalanzi.

¹⁰ Ishi shooni she ukumulonga uwamwinyu? Havhili shooni she ukumusuufwa uwamwinyu? Yeenya, iswe swenti tuliyimiilila kulongwa pilongolela ilya Mulungu.

¹¹ Kuli izyo, yisimviilwe mu Vhusimbe uVhufinjile kuuti, “UMWENE uMulungu akuyanga akuti, ‘Nalyoli avhantu vhonti vhalisugamila pilongolela lyane, nu kupemula ni mili zyavho kuuti ine ne Mulungu.’”

¹² Kuli izyo, umuntu wonti muli iswe alilondovhola wuuyo inongwa zyakwe pilongolela lya Mulungu.

We agomile mu lwitiho atamupunuzyaje ula we atagomile

¹³ Ishi, tuleshe kulongana, poosye kuvhomba lyonti lye lingamupelela uwamwitu kupunula, poosye kuvhomba uvhutalamalandu.

¹⁴ Imanyile, havhili uMwene uYeesu andolesiizye apazelu uvhwanalyoli kuuti, shitaliipo ishaakulya shimo she shihombezu, nkandi inga umuntu aalola kuuti ishaakulya shimo shihombezu, pe ishaakulya isho shikuvha shihombezu ku kwakwe.

¹⁵ Inga iwe ukumuleetela uwamwinyu uvhuswimiilizu ku shaakulya she ukulya, nalyoli ipo ukuvha utali ni shikunzi kwa wamwinyu uyo. Pe ishi, utahiitishe inga hansi kuuti, kwi idala ilya shaakulya shaaho umuteezye umuntu we uChilisiti ahamufwila!

¹⁶ Pe ishi, utahaaleshe ishintu she ukushilola kuuti shinza, shivhe shikuyangwa na vhanji kuuti shivhiivhi.

¹⁷ Yeenya, uvhumwene uvhwa Mulungu vhutakuloleha mu vwe tukulya poosye kumwela, nkandi vhukuloleha mu lujendo lwitu ulwa vhugolosu nu vhutehamu nu luseshelo lwe lukufuma kwa Mupepo uMufinjile.

¹⁸ We akumuvhombela uChilisiti inza vhwevhulo, akumuhondezya uMulungu, havhili akwitishilwa na vhantu.

¹⁹ Pe ishi, ahavhaliilizyo honti tuvhe nu mute uwa kuvhomba zye zikuleeta uvhutehamu, na zye zikwavwa kuzengana mu lwitiho.

²⁰ Utananganyaaje imbombo ya Mulungu kuzya shaakulya. Ivwakulya vwonti vwinza kulya, ileelo havhiivhi kwa muntu kulya shonti she shingamupelela umuntu uwunji kuuti avhombe uvhutalamalandu.

²¹ Hinza kuleha kuvhomba zye zingamupelela uwamwinyu kuuti apunule, yivhe kwe kulya inyama, poosye kumwela ipele, poosye ishinji shonti shiila.

²² Insiivho zye uli nazyo ku vwakulya, zivhe zyaho weeka nu Mulungu. Alosiitwe umuntu we akuyilola kuuti atakuvhomba uvhutalamalandu, lwe akuvhomba zye akuzilola kuuti ngolosu.

²³ Ileelo we ali na maganigani ni shaakulya shimo, havhili akulya shenesho, akuvhomba uvhutalamalandu, mwe pe atakuvhomba kulandatana nu lwitiho lwakwe kwa Chilisiti. Nkuyanga vhwevhulo, mwe pe ishintu shonti she ukuvhomba inga shitakufuma mu lwitiho lwaho kwa Chilisiti, vhutalamalandu.