VaLoma 13 - ULufingwi uLupwa

Umushinzi ku vhalongozi

¹ Avhantu vhonti vhakwanzilwa kuvhashindiha avhalongozi avha silikaali. Mumanye kuuti uvhulongozi vhwonti vhukufuma kwa Mulungu, havhili avhalongozi vhonti vhavhisiilwe nu Mulungu.

² Kuli izyo, umuntu wonti we akulwana nu vhulongozi, akuvha akulwana nu Mulungu we avhuvhiisile. Avhantu vhe vhakuvhomba izyo, vhakuyileetela vhuuvho isunde.

³ Yeenya, umuntu we akuvhomba inyinza, atakumwogopa umupiti, nkandi we akuvhomba imbiivhi. Pe ishi, inga ukwanza utamwogopaje umupiti waaho, ukwanzilwa uvhombaje inyinza, woope kwe akutiimaje.

⁴ Nkuyanga vhwevhulo, mwe pe umupiti muvhomvi wa Mulungu, ni mbombo yaakwe ya kuvhaavwa imwe. Ileelo inga ukuvhomba imbiivhi, pe uvhe ni lyoga, mwe pe ali na maha aga kuukupa isunde. Kuvhomba isho, uweene akuvha akulunjisya uvhuhalazu uvhwa Mulungu ku vhavhomba mbiivhi.

⁵ Kuli izyo, mukwanzilwa kuvhashindiha avhalongozi, te kuuti, mwe pe mukwogopa uvhuhalazu uvhwa Mulungu, nkandi, mwe pe mumanyile mu mooyo giinyu kuuti hinza kuvhomba vhwevhulo.

⁶ Havhili mukusonka umusonko, mwe pe avhalongozi avha silikaali lwe vhakuvhomba imbombo ku mute, vhakumuvhombela wu Mulungu.

⁷ Pe ishi, muvhavhombelaje avhalongozi vhonti zye zikwanzilwa kuvhavhombela. Inga mukwanzilwa kusonka umusonko uwa mavhiila mu mavhiila, musonkaje, inga wumo akwanzilwa kumunyila, mumunyilaje, havhili inga wumo akwanzilwa kumushindiha, mumushindihaje.

Ishikunzi shikulunjisya indajizyo

⁸ Mutavhanje nu mulandu naawumo kwa muntu wonti, nkandi kuvhanje kwe kukundana, mwe pe we akumukunda uwamwavho akupela alunjisya vwe indajizyo zikuyanga.

⁹ Yeenya, indajizyo zikuti, “Utavhembuhaje, utagogaje, utiivhaje, havhili utanyonywaje ishintu isha wamwinyu.” Ileelo indajizyo izyo ni zyamwavho zili mu lulajizyo lwoka lwe lukuti, “Umukundaje umupalamani waaho inza vwe ukuyikunda weneewe.”

¹⁰ Umuntu we ali ni shikunzi, atangamuvhombela imbiivhi naazimo uwamwavho. Kuvhakunda avhanji kwe kulunjisya indajizyo zyonti.

¹¹ Mukwanzilwa kuvhomba izyo, mwe pe mumanyile kuuti ahavhaliilizyo aha kudaamula hafisile. Nkuyanga vhwevhulo, mwe pe ahavhaliilizyo aha vhuposhi vhwitu hapalamiiye kuluusya ahavhaliilizyo he twátalisile kumwitiha uMwene uYeesu.

¹² Uvhusiku vhwaakusila, kwapalamila kusha. Ishi tuzileshe imbombo izya mu shiisi, tuzwale ivilwilo ivwa mu vhuzelu.

¹³ Tuvhe nu lujendo ulwinza inza vwe yikwanzilwa ku vhantu vhe vhakulandila mu vhuzelu. Tutahaavhe twe vhapafu, poosye twe vhashimwela, poosye twe vhavhembu, poosye twe vhamalaaya, poosye twe vha ivho poosye twe vha mwone.

¹⁴ Mumuzwale uMwene uYeesu Chilisiti, kwe kuuti mulongolwaje nawo, mutahiitishe inga hansi kulongolwa nu vhuntu uvhwa vhutalamalandu, poosye impapilo zyakwe.