VaLoma 12 - ULufingwi uLupwa

Kuyifumwa kumuvhombela uMulungu

¹ Ishi vhamwitu, mwe pe uMulungu ali nu vhwila kuli iswe, nkuvhalambiilizya kuuti muyifumwaje amavhili giinyu kuvha ngati mpuutile indanzi, imfinjile ye yikumuhondezya uMulungu. Yeenya, kuvhomba vhwevhulo lye lidala ilya nalyoli ilya kumupuuta.

² Mutalandataje amaata ge vhakuvhomba avhantu avha mu nsi ino, nkandi uMulungu we agagalulanye amooyo giinyu, muvhe ni nsiivho impwa. Ipo pe kuuti mulumanye ulukasamo ulwa Mulungu kuli imwe, kwe kuuti ishintu she shinza, she shikumuhondezya, havhili she shilunjisu.

³ Ishi, mwe pe uChilisiti ampiiye uvhwila kuuti mbe ne mutumwa waakwe, nkuvhavhuuzya mwenti kuuti, muleshe kuyilola kuuti muhondeeye kuluusya vwe muli. Muyilolaje kuuti, mwenti mupeliilwe ulwitiho lweluula nu Mulungu.

⁴ Inza vwe mumanyile umuvhili wuli ni vipelwa ivwinji, ileelo ivipelwa vwonti vitakuvhomba imbombo yooka.

⁵ Vwe tuli vhwevhulo niiswe. Twe vhinji, ileelo swenti twe vipelwa ivwa mu muvhili uwa Chilisiti, havhili twe vipelwa kwa muntu wooka wooka muli iswe.

⁶ Kuli izyo, tupeliilwe ivikunjilwa vwe vikusugaana, kulandatana nu vhwila vhwe tupeliilwe. We ali ni shikunjilwa isha vhukuvhwi, akuvhwaje kulandatana nu lwitiho lwakwe.

⁷ We ali ni shikunjilwa isha vhuvhombezi, avhombaje vhwevhulo, woope we ali ni shikunjilwa isha kusambiilizya, asambilizyaje.

⁸ We ali ni shikunjilwa isha kuvhasuvhaalizya avhanji, avhombaje vhwevhulo, woope umutesi ku vhantu, afumwaje ivintu ku mwoyo wonti. We ali ni shikunjilwa isha kuvhalongozya avhanji, avhombaje ku mute, woope we ali ni shikunjilwa isha kuvhafwila avhanji uvhwila, avhombaje vhwevhulo ku luseshelo.

Mukundanaje

⁹ Muvhakundaje avhamwinyu ishisita ishifumbo. Muzivitilwaje imbiivhi, muyikungulaje kuvhomba inyinza.

¹⁰ Mukundanaje inza avhanine vwe vhakukundana. Uvhashindihaje avhamwinyu kuluusya vwe ukuyishindiha weneewe.

¹¹ Mutavhanje mwe vhahata, mumuvhombelaje uMwene uYeesu ku mwoyo wonti.

¹² Museshelaje, mwe pe mukusuuvhila kuposheela inyinza kufuma kwa Mulungu. Mujimbililaje inga amayimba gakuvhinzila, havhili mumulaavhaje uMulungu ahavhaliilizyo honti.

¹³ Muvhavwaje avhafinjile ivintu vwe vhasovheliilwe, havhili muvhaposheelaje ahinza avhajeni mu nyumba zyinyu.

¹⁴ Muvhalavhilaje uvhuloote kwa Mulungu avhantu vhe vhakuvhayimvwa, mutavhalavhilaje kuuti vhatipwaje.

¹⁵ Museshelaje pooka na vhe vhakuseshela, mukuutaje pooka na vhe vhakukuuta.

¹⁶ Mwivwanaje ahinza na vhamwinyu. Mutayitumvwaje, muvhanje nu vhuliilani na vhantu vhe vhatakushindikwa, mutayilolaje kuuti muvhapoosite injeele.

¹⁷ Inga avhantu vhavhavhombela imbiivhi, mutalanduzyaje. Ahavhaliilizyo honti lwe mushiili kuvhavhombela avhanji ishintu shonti, musiivhaje suuti nu kuvhomba ziila zye zikuloleha nyinza ku vhantu vhonti.

¹⁸ Muvhombaje zyonti zye mungavhomba zye zikuvhavhiiha kuvha nu vhutehamu na vhantu vhonti.

¹⁹ Vhankundwa, mutalanduzyaje mweneemwe, mumuleshelaje uMulungu kuuti we avhombaje izyo. Nkuyanga izyo, mwe pe uMWENE uMulungu mu Vhusimbe uVhufinjile akuyanga akuti, “Kulanduzya mbombo yaane, ine ndilanduzya.”

²⁰ Havhili uVhusimbe uVhufinjile vhukuti, “Inga umulugu waaho ali ni nzala, umupanje ishaakulya. Havhili inga ali ni shinyooto, umupanje ishakumwela. Yeenya, inga wavhomba vhwevhulo, ukuvha ngati wamwoholela umwoto we wukwaha pi itwe lyakwe.”

²¹ Uvhuvhiivhi vhutakupootaje, nkandi uvhupootaje uvhuvhiivhi kwi idala ilya kuvhomba inyinza.