VaLoma 11 - ULufingwi uLupwa

UMulungu atávhalesile avhantu vhaakwe, aVhaisilayeeli

¹ Ishi nkuvhuziilizya kuuti, vhuli, uMulungu ávhalesile avhantu vhaakwe aVhaisilayeeli? Ndaali, te muumwo inga hansi! Yeenya, ine neneene ne Mwisilayeeli, mfumile mu mavhanda aga Aabulahamu, mu nkolo iya Benjamiini.

² UMulungu atávhalesile avhantu vhaakwe vhe ávhasavhuuye she ashiili kuvhapela. Vhuli, mutamanyile vwe uVhusimbe uVhufinjile vhukuyanga izya mukuvhwi uEeliya, vwe ávhalonjeleeye aVhaisilayeeli kwa Mulungu?

³ Átili, “We MWENE Mulungu, avhantu ivha vhavhagozile avhakuvhwi vhaaho, nu kumongolanya ivifinjilo vwaho. Ishi nsyaye neeka, havhili niine vhuulo vhakwanza kungoga!”

⁴ Vhuli, uMulungu ámwamuuye uEeliya átili vhuli? Átili, “Njilesheeye avhantu 7,000 ku Isilayeeli ukwo vhe vhatakumupuuta uBaali.”

⁵ Niishi vwe zili ahavhaliilizyo iha, vhaliipo vhe vhasyaye vhe uMulungu avhasavhuuye ku vhwila vhwakwe.

⁶ Kuli izyo, mwe pe vhasavhuliilwe ku vhwila vhwa Mulungu, vhatakupokwa ku mbombo zye vhavhomvile. Mwe pe inga zyaamile mbombo zyavho zye vhavhomvile, pe uvhwila vhutangavha vhwila havhili.

⁷ Pe ishi, zili ishi: AVhaisilayeeli vhálondooye kuvhwaga uvhugolosu ileelo vhatávhwazile, nkandi vhaala vhe vhásavhuliilwe nu Mulungu vhe vhávhwazile. Vhe vhásyaye, ávhavhiisile kuuti vhavhe na mooyo amagomu.

⁸ Izyo zili inza vwe uVhusimbe uVhufinjile vhukuyanga vhukuti, “UMulungu ávhavhiisile kuuti vhapotwaje kusiivha mu mooyo gaavho, inga aminso gaavho gatalolaje, na makutwi gaavho gativwaje, vwe vhali kufishila ileelo ili.”

⁹ Woope umwene uDaavhudi átili, “Umulyo waavho wupelwe kuvha lwagulo ni ilivha, havhili wuvhe lipunulo nu kuvha lisunde ku kwavho.

¹⁰ Aminso gaavho gavhe ni shiisi, inga vhatalolaje zye vhakuvhomba, ni nsiizi zyavho zigunguvhale nziila ku mayimba aga nsiku zyonti.”

Kupokwa ku vhe te Vhayuuda

¹¹ Ishi, nkuvhuziilizya havhili kuuti, vhuli, aVhaisilayeeli vhápunuuye nu kugwa nziila? Ndaali! Te muumwo inga hansi! Ileelo kwi idala lyavho ilya kumuhaana uMuposhi, avhantu vhe te Vhaisilayeeli vháposheleeye uvhuposhi, inga aVhaisilayeeli vhavhalolele umwone.

¹² Ishi, inga avhantu vhe te Vhaisilayeeli vháposheleeye uvhwila uvhupiti nkaani kufumiilana na Vhaisilayeeli kumuhaana uMuposhi, pe ishi vhaliposheela ilonka ipiti nkaani lwe aVhaisilayeeli vhakugaluha nu kumwitiha uMuposhi.

¹³ Ishi nkuyanga niimwe mwe te mwe Vhayuuda. Mwe pe uMulungu ansavhuuye ine kuvha ne mutumwa wiinyu, ine nkuyimwamiha imbombo iyo ye uMulungu akuvhavhombela imwe kutuushila kuli ine.

¹⁴ Nkusuuvhila kuuti, pamo vhaala vhe tuli amavhanda gooka, kwe vhavhalolele umwone imwe ku ziila zye uMulungu akuvhavhombela, inga vhamo muli vhuuvho vhapokwe.

¹⁵ Ishi inga kuhaanwa ukwa Vhayuuda kwávhapeleeye vhe te Vhayuuda kwivwana nu Mulungu, pe ziliivha vhuli lwe aVhayuuda vhaposheelwa nu Mulungu? Nalyoli kuposheelwa kwavho kuliivha fwe kwe kuzyuha ukwa vhafwe.

¹⁶ Inga umuntu aafumwa uvhusu uvhutanzi uvhwa ikaati ilya ngana, uvhusu uvhwo na vhwonti vhwe vhusyaye vhukuvha vhufinjile. Havhili, inga umuntu aafumwa izi ilya ikwi ilya izayituuni, ni nsamba izya ikwi ilyo zikuvha mfinjile.

¹⁷ Ishi insamba zimo zyádiviilwe, niimwe mwe muli ngati nsamba izya ikwi ilya izayituuni ilya mwi ilaala, musopeliilwe kuliilana pooka ni nsamba zye zisyaye izya izayituuni ilya kuvhwalwa. Mukuposheela pooka uvhuloote vhwe vhukufuma mu mazi aga izayituuni ilyo lye livhwaliilwe.

¹⁸ Kuli izyo, imwe mutazisufwaje insamba zye zidiviilwe. Havhili mutayitumvwaje, mwe pe te mazi ge gakuvhasuuvhila imwe, nkandi imwe mwe mukugasuuvhila amazi.

¹⁹ Lumo ungati, “Insamba zidiviilwe inga ine insopeelwe.”

²⁰ Izyo zya nalyoli. Insamba izyo zyádiviilwe, mwe pe zitítisile, ileelo iwe uli inza vhwevhulo kufumiilana nu lwitiho lwaho. Pe ishi, utayitumvwaje, nkandi uvhanje minso.

²¹ Nkuyanga vhwevhulo, mwe pe inga uMulungu atávhafwiliiye uvhwila aVhayuuda, vhe nsamba izya izayituuni ilya kuvhwalwa, pe nalyoli atalikufwila uvhwila niiwe.

²² Yeenya, uMulungu vwe ali uvhutonsu havhili vwe ali uvhuhali. Uweene muhali ku vhaala vhe vhatakumushindiha, ileelo kuli iwe, mutonsu inga ukujendeelela kumushindiha. Ileelo poosye niiwe inga waaleha kuvhomba vhwevhulo, uliidibwa.

²³ Vhoope aVhayuuda inga vhagalusya umwoyo, vhamwitiha uMulungu, vhalisopeelwa havhili mwi ikwi, mwe pe uMulungu ali na maha aga kuvhasopeela havhili.

²⁴ Nkuyanga vhwevhulo, mwe pe imwe mwe nsamba izya izayituuni ilya mwi ilaala, mudiviilwe nu kusopeelwa pe padiviilwe mwi izayituuni ilya kuvhwalwa lye te shifumo shiinyu. Ishi pe yitaliivha shitonsu nkaani insamba izya izayituuni ilya kuvhwalwa kusopeelwa havhili mwi izayituuni ilyo lye lye shifumo isha nsamba izyo.

Uvhwila uvhwa Mulungu ku vhantu vhonti

²⁵ Mwe vhamwitu, nkwanza kuuti muzimanye insiivho izya Mulungu izya kukwilu, inga muleshe kuyitumvwa kuuti muli ni njeele. AVhayuuda kuhaana kwavho kwitiha, te kwa havhaliilizyo honti, kuliisila lwe uvhwinji uvhwa vhantu vhe te Vhayuuda vhe vhakumwitiha uChilisiti vhwalunjiha.

²⁶ Ipo pe aVhaisilayeeli vhonti vhaliipokwa. Izi zikuvhalilana nu Vhusimbe uVhufinjile, vhwe vhukuti, “UMuposhi aliifuma ku Sayuuni, alivhwefwa uvhuvhiivhi kufuma ku luho ulwa Yaakobu.

²⁷ Ulu lwe lufingwi lwane navho, ahavhaliilizyo he ndivhaswila uvhutalamalandu vhwavho.”

²⁸ AVhayuuda vhalugu vha Mulungu, mwe pe vhalihaanile Izwi iLyinza. Ilyo litwaliiye kuuti Izwi iLyinza lyinze kuli imwe mwe te mwe Vhayuuda. Ileelo poosye vhwevhulo, uMulungu ali she avhakunzite aVhayuuda, mwe pe ávhasavhuuye avhataata vhaavho nu kuvhiiha ulufingwi navho.

²⁹ Akujendeelela kuvhakunda, mwe pe uMulungu atakwandula insiivho zyakwe kuli ivho vhe avhiisite nu kuuvhapa ivipeelwa.

³⁰ Hali imwe mutahamushindihaga uMulungu, ileelo ishi muposheleeye uvhwila, kwi idala ilya Vhaisilayeeli kuleha kumushindiha.

³¹ Yeenya, vhwevhulo, ishi vhatakumushindiha, inga imwe muposheele uvhwila uvhwa Mulungu, pe pisinda vhoope vhaposheele uvhwila inza imwe.

³² Mwe pe avhantu vhonti vhahaanile kumushindiha uMulungu, pe woope avhavhiisile inza avhakungwa. Avhomvile vhwevhulo, inga avhafwile uvhwila vhonti.

UMulungu ashindikwaje

³³ Yeenya, uvhushindamu uvhwa Mulungu vwe vhuli uvhupiti! Havhili yeenya uvhushindamu uvhwa njeele nu vhumanyinsanyi vhwakwe vwe vhuli uvhupiti! Naawumo we angavhupenza uvhulonzi vhwakwe, poosye kugamanya amadala aga mbombo zyakwe! Izi zikuvhalilana nu Vhusimbe uVhufinjile vhwe vhukuti,

³⁴ “Ataliipo umuntu we angazimanya zye uMWENE uMulungu akusiivha, havhili naawumo uwa kumwavwa insiivho.”

³⁵ “Wu naanu we atalisile kuumupa uMulungu ishintu, she woope uMulungu akwanzilwa amulipe?”

³⁶ Ivintu vwonti vifumile ku kwakwe wuuyo. Havhili ku maha gaakwe vikujendeelela kuvha, vwonti viliipo, inga vilolesye uvhushindamu vhwakwe. UMulungu ashindikwaje shiima! Amina.