VaLoma 10 - ULufingwi uLupwa

¹ Mwe vhiitisi vhamwitu, ulukasamo lwane ulupiti mu mwoyo waane ni mpuuto zyane kwa Mulungu, nkwanza kuuti, aVhaisilayeeli avhamwitu vhapokwe.

² Nkuhomeshezya kuuti, avhenevho vhali nu mute kumulondola uMulungu, ileelo vhatalimanyile idala lye uMulungu akwanza kuuti vhamulondolaje.

³ Avheene vhatálimanyile idala lye uMulungu akuvhavhaazya avhantu kuuti vhagolosu, vhahalondola idala ilyavho. Vháhaanile kuyikonzya ku vhwanalyoli uvhwa Mulungu.

⁴ Yeenya, uChilisiti álunjisiizye zyonti zye zikwanzilwa mu ndajizyo, inga wonti we akumwitiha uweene avhazilwaje kuuti mugolosu.

Wonti we akumwitiha uYeesu akupokwa

⁵ Izya muntu kuvhaazilwa kuuti mugolosu, uMoose ásimvile átili, “Umuntu we akuvhomba zye zikwanzilwa ni ndajizyo, aliivha nu vhulanzi kwi idala ilya kuzilandata indajizyo izyo.”

⁶ Ileelo izya muntu kuvhaazilwa kuuti mugolosu kwi idala ilya lwitiho, uVhusimbe uVhufinjile vhukuti, “Mutayivhuzilizyaje mu mooyo giinyu kuuti, ‘Wu naanu we angaazuvha ku mwanya?’” (Ukwo kwe kumuleeta uChilisiti pansi.)

⁷ “Poosye kuuti, ‘Wu naanu we angiiha kusogola ku vhuzimu?’” (Ukwo kwe kumuzyusya uChilisiti nu kumuleeta kufuma ku vhafwe.)

⁸ Ileelo uVhusimbe uVhufinjile vhukuti, “Izwi ilya Mulungu lili papiipi niiwe, lili mwi ilomu lyaho na mu mwoyo waaho.” Izwi ilyo lizwi lya kumwitiha uChilisiti lye tukukumusya

⁹ kuuti, inga wapemula ni ilomu lyaho weneewe kuuti, “UYeesu wu Mwene,” nu kwitiha mu mwoyo waaho kuuti uMulungu ámuzyusiizye, ukupokwa.

¹⁰ Yeenya, umuntu akwitiha nu mwoyo waakwe, pe akuvhaazilwa kuuti mugolosu, havhili akupemula ni ilomu lyakwe, pe akupokwa.

¹¹ UVhusimbe uVhufinjile vhukuti, “Umuntu wonti we akumwitiha, te ahasuupile naalumo.”

¹² UVhusimbe uvhwo vhukulolesya kuuti kutaliipo kusavhulanya, vhavhe Vhayuuda, poosye vhe te Vhayuuda. UMwene ali wooka, havhili wu Mwene uwa vhantu vhonti, woope mutesi nkaani ku vhonti vhe vhakumulaavha.

¹³ Havhili, izi zikuvhalilana nu Vhusimbe uVhufinjile vhwe vhukuti, “Umuntu wonti we alivhilishila kumulaavha uMwene, aliipokwa.”

¹⁴ Ileelo ishi vhangamulaavha vhuli we vhatamwitisile? Havhili vhangamwitiha vhuli we vhativuuye izwi lyakwe? Havhili, vhangiivwa vhuli ishisita kukumusya?

¹⁵ Havhili vhangakumusya vhuli, inga vhatatumiilwe? Izya kutumwa vhe vhakulumbiilila, uVhusimbe uVhufinjile vhukuti, “Kwinza nkaani kwinza ukwa vhantu vhe vhakulumbiilila Izwi iLyinza!”

¹⁶ Poosye vhwevhulo, te kuuti aVhaisilayeeli vhonti vhályitisile Izwi iLyinza. Yeenya, umukuvhwi uYisaayi átili, “We MWENE Mulungu, wu naanu we áyitisile izwi lye twálumbiliiye?”

¹⁷ Pe ishi, avhantu vhakuvha nu lwitiho inga vhiivwa izwi ilya Chilisiti, havhili vhakwivwa inga vhakulumbiililwa.

¹⁸ Poosye vhwevhulo, nkuvhuziilizya kuuti, vhuli, aVhaisilayeeli vhatívuuye? Nalyoli vhívuuye, mwe pe uVhusimbe uVhufinjile vhukuti, “Izwi lyavho lyívwisile mu nsi zyonti, na mazwi gaavho gáfisile ku vhusililishilo uvhwa nsi.”

¹⁹ Havhili nkuvhuziilizya kuuti, vhuli, aVhaisilayeeli lwe vhiivwa vhatámanyile? Vhámanyile, mwe pe ahavhaliilizyo aha Moose uMulungu átili, “Ndivhavhiiha kuvha nu mwone, ku vhantu vhe te Vhaisilayeeli, havhili ndivhaviisya nkaani, kuzya vhantu ivho vhe vhatamanyile.”

²⁰ Havhili, umukuvhwi uYisaayi akuyanga ku vhudandamazu akuti, “Avhantu vhe vhatahandondolaga, vhe vhandola. Havhili njilolesiizye kuli ivho, vhe vhatahavhuzilizyaga inongwa zyane.”

²¹ Poosye vhwevhulo, izya Vhaisilayeeli, uMulungu akuti, “Musanya wonti nkagolosyaga inyoovhe zyane kuvhagalusya avhantu vhe vhatakunshindiha, na vha madali.”