VaHebuli 9 - ULufingwi uLupwa

Imbaatiho izya lufingwi ulwa kwanda

¹ Ulufingwi ulwa kwanda lwáli na pafinjile apa kumupuutila uMulungu mu nsi umu, havhili lwáli ni mbaatiho izya kushilongozya ishipuuto isho.

² Apafinjile ipo pázengwilwe Iheema ilya kumupuutila uMulungu. Iheema ilyo lyámile ni vwumba vivhili. Ishumba ishitanzi sháamile ni shisajishilo isha nyaale ni meeza iya kuvhiishila amakaati amafinjile. Pa shumba ishitanzi isho vhahapiitaga vhahatinji aPafinjile.

³ Mwi Iheema ilyo mwámile umwenda umupiti we wápituliinye ishumba ishitanzi ni sha vhuvhili. Ishumba isha vhuvhili vhahashiitaga vhahatinji aPafinjile pa Pafinjile.

⁴ Mu shumba isho mwámile ishifinjilo isha sahaabu isha kusushizizya ivintu vwe vikununshila. Havhili mwámile imbogooso iya lufingwi ye vháyipasile isahaabu imbazu zyonti. Mu mbogooso umwo mwámile uluvhiga ulwa sahaabu, lwe lwámile ni mana. Havhili mwámile indoogo iya Aaloni ye yáduguuye amatundu na mavhwe gavhili ge gásimviilwe indajizyo 10 izya lufingwi.

⁵ Pamwanya pa mbogooso iyo, páamile iviholanyo vivhili ivwa vhakeluubi vhe vipelwa ivwa ku mwanya vwe vili ni vwapa, vwope vikulolesya uvhushindamu uvhwa Mulungu. Ivwapa vwavho vwágwinshiiye pe uMulungu ahaswililaga avhantu uvhutalamalandu vhwavho. Ileelo ahavhaliilizyo iha tutangalondovhola ahinza zyonti izyo vwe zili.

⁶ Lwe ivintu vwonti vwagombwa nu kuvivhiiha pe vikwanzilwa, avhapuuti vhahanda kwinjila insiku zyonti mu shumba ishitanzi isho nu kuvhomba imbombo yaavho iya vhupuuti.

⁷ Ileelo umupuuti umupiti weeka we ahitishilwaga kwinjila ishumba isha vhuvhili, woope ahinjilaga lwoka vhweleele ku mwaha. Havhili ahanzilwaga kwinjila na mavhanda aga shihanu she shivholiilwe nu kumufumwizya uMulungu. Ahavhombaga vhwevhulo, kuzya vhutalamalandu vhwakwe wuuyo nu vhwa vhantu avhanji vhonti vhwe vhahavhombaga ishisita kumanya.

⁸ Kulandatana ni mbaatiho izyo, uMupepo uMufinjile akutulolesya apazelu kuuti Iheema ilyo ilya hali lwe likuvhomba imbombo, idala ilya kwinjila aPafinjile pa Pafinjile litíguliilwe ku vhantu vhonti.

⁹ Imbombo zyonti zye zihavhombehaga mwi Iheema liila, shiholanyo isha mbombo izya havhaliilizyo iha. Nkuyanga vhwevhulo, mwe pe ivipeelwa ni mpuutile zye vhakumufumwizya uMulungu vitangazelufwa amooyo aga vhantu vhe vhakumupuuta uMulungu.

¹⁰ Yeenya, imbaatiho izya vwakulya ni vwakumwela, ni zya kuyizelufwa ukwa mavhiila mu mavhiila, zitangaavwa naashimo umwoyo uwa muntu. Imbombo iya mbaatiho izyo yásizile lwe uMulungu aleeta imbaatiho impwa.

¹¹ Ileelo uChilisiti ayinzile nu kuvha mupuuti umupiti uwa nyinza zyonti zye zyinzile. Uweene we akuvhomba imbombo mwi Iheema liila lye limwamu havhili lye lilunjisu kuluusya itanzi. Iheema ilyo litázengwilwe na vhantu, kwe kuuti te Liheema ilya mu nsi umu.

¹² Uweene áyinjiiye lwoka vhweleele aPafinjile pa Pafinjile. Atínjiiye na mavhanda aga saawe poosye aga ngwada, nkandi áyinjiiye na mavhanda gaakwe wuuyo, inga tuposheele uvhutavhuzi uvhwa shiima.

¹³ Kulandatana nu lufingwi ulwa hali, avhapuuti vhahavhasansilaga avhantu vhe vháali vhahandamanu amavhanda aga saawe na ga nkambaku ni ilota ilya ngwada ye vhayilunguliziizye, inga vhagazelufwe ge mavhili gaavho vhweleele.

¹⁴ Ileelo amavhanda aga Chilisiti gali na maha amapiti kuluusya aga vihanu ivwo! Uweene ku maha aga Mupepo uwa shiima, áyifumwizye kwa Mulungu kuvha mpuutile ye yilunjisile. Amavhanda gaakwe ge gakutuzelufwa na mooyo giitu kufumiilana ni mbombo zye zikuleeta uvhufwe, inga tumuvhombelaje uMulungu uMulanzi.

¹⁵ Kuli izyo, uYeesu we akuvhakundanya avhantu nu Mulungu mu lufingwi ulupwa, inga avhantu vhe uMulungu avhasavhuuye vhaposheele uvhulanzi uvhwa shiima vhwe áfinzile kuuvhapa. Izi zikuvhombeha vhwevhulo, mwe pe uYeesu áfuuye, inga avhatavhule avhantu kufuma mu vhutalamalandu vhwavho vhwe vhávhomvile ahavhaliilizyo aha lufingwi ulwa hali.

¹⁶ Inga umuntu aaleha indajizyo izya kupwana ivintu vwakwe, indajizyo izyo zikuvhomba imbombo inga kwavha uvhwahoome kuuti umuntu uyo afuuye.

¹⁷ Ziila zye alajiziizye zikuvha na maha inga umuntu we alajiziizye aafwa, ileelo zitakuvha na maha inga hansi inga umuntu uyo ali she mupuuma.

¹⁸ Ye nongwa poosye ulufingwi ulwa hali lutávhisiilwe ishisita amavhanda aga vihanu.

¹⁹ Lwe uMoose aamala kuvhaazya indajizyo zyonti izya Mulungu pilongolela ilya vhantu vhonti inza vwe yihanzilwaga, ahanyatula amavhanda aga ngwada na ga saawe, ahasangaanya na minzi. Lwe avhomba vhwevhulo, ahasansila amavhanda igo pi ikalaata ilya ndajizyo na ku vhantu vhonti kwi idala ilya pamba ye yáali nu muhoola uwa mafwomfwo. Ipamba iyo yápinyiilwe ku lusamba ulwa ikwi lye vhahatinji ihiisopo.

²⁰ Pe uMoose ahayanga ahati, “Iga mavhanda ge gakuhomeshezya ulufingwi ulwa Mulungu lwe ávhalajiziizye kuuti mululandataje.”

²¹ Vhwevhulo, uMoose ahasansila amavhanda Iheema ilya Mulungu ni vintu vwonti vwe vihavhombelwaga ahavhaliilizyo aha kumupuuta uMulungu.

²² Kulandatana ni ndajizyo izya Moose, amavhanda ge gakuvizelufwa ivintu vwonti. Havhili ishisita amavhanda, uMulungu atakuswila avhantu uvhutalamalandu vhwavho.

Kuyifumwa ukwa Chilisiti

²³ Iheema ni vintu vwonti vwe avhapuuti vhahavhombelaga kumupuutila uMulungu, vwáli shiholanyo isha vintu vwe vili ku mwanya. Iheema ni vintu ivwo vhahavizelufwaga kwi idala ilya mavhanda aga vihanu, ileelo ivintu ivwa ku mwanya vikwanzilwa kuvizelufwa ni mpuutile ye nyinza kuluusya amavhanda igo aga vihanu.

²⁴ UChilisiti atínjiiye aPafinjile pa Pafinjile pe pazengwilwe na vhantu, pe shiholanyo isha apa ku mwanya. Áyinjiiye aPafinjile pa Pafinjile apa ku mwanya kwe ahavhaliilizyo iha akutulaavhila pilongolela ilya Mulungu.

²⁵ Umupuuti umupiti uwa Vhayuuda ahinjilaga aPafinjile pa Pafinjile amaaha gonti na mavhanda aga vihanu. Ileelo uChilisiti atínjiiye ku mwanya, inga ayifumwe kuvha mpuutile ulwinji, áyifumwizye lwoka vhweleele.

²⁶ Inga uChilisiti ahanzilwaga kuyifumwa kuvha mpuutile ulwinji, inza vwe umupuuti umupiti ahafumwaga impuutile ulwinji, pe nkandi ahanzilwaga kuyimvilwa ulwinji kufuma pe uMulungu ápezile insi. Ileelo uweene amanda iga aga vhusililishilo, ayinzile nu kuyifumwa kuvha mpuutile lwoka vhweleele, inga atuzelufwe uvhutalamalandu vhwitu.

²⁷ Inza vwe avhantu vhonti vhakufwa lwoka vhweleele, havhili lwe vhaafwa, uMulungu akuvhalonga,

²⁸ vhwevhulo, uMulungu ámufumwizye uChilisiti, inga afwe nu kuvha mpuutile ye yilunjisile lwoka vhweleele, inga uMulungu avhaswile avhantu avhinji uvhutalamalandu vhwavho. Havhili uChilisiti aliyinza ulwa vhuvhili. Te ahinze, inga uMulungu avhaswile avhantu uvhutalamalandu, nkandi aliyinza kuvhapoha avhantu vhe vhakumuguliilila.