VaHebuli 8 - ULufingwi uLupwa

Umupuuti umupiti uwa lufingwi ulupwa

¹ Ipiti nkaani kuli izyo zye tukuyanga lye lino: Iswe tuli nawo umupuuti umupiti inza uyo, uweene atendiime uluvhazu ulwa nyoovhe iya kundiilo iya shitengo isha vhumwene isha Mulungu uwa Maha Gonti, pa vhushindamu uvhupiti nkaani ku mwanya.

² Ku mwanya ukwo, akuvhomba imbombo iya vhupuuti uvhupiti aPafinjile, kwe kuuti mwi Iheema liila ilya nalyoli lye te muntu álizenzile, nkandi wu MWENE uMulungu wuuyo.

³ Umupuuti umupiti wonti akusaavhulwa, inga amufumwizyaje uMulungu ivipeelwa ni mpuutile. Kuli izyo, umupuuti wiitu umupiti uyo, woope akwanzilwa avhe ni shintu isha kufumwa kwa Mulungu.

⁴ Inga uChilisiti ajendelelaje kulandila mu nsi umu, nkandi te mupuuti inga hansi, mwe pe mu nsi umu vhaliipo avhapuuti vhe vhakufumwa impuutile kulandatana ni ndajizyo izya Moose.

⁵ Avhapuuti ivho vhakumuvhombela uMulungu aPafinjile pe shiholanyo vhweleele isha Pafinjile apa ku mwanya. Ye nongwa uMoose lwe akuyisengaanya kuzenga Iheema ilya kumupuutila uMulungu, uMulungu ámusosile átili, “Yeenya, ukwanzilwa kuzenga vwonti kulandatana na zyonti zye nkulolesiizye mwi igamba uSinaayi.”

⁶ Ileelo uChilisiti apeliilwe imbombo iya vhupuuti ye nyinza nkaani kuluusya iya vhapuuti aVhayuuda. Uweene we akuvhakundanya avhantu nu Mulungu ku lufingwi lwe lwinza kuluusya luula lwe avheene vhahaluvhombelaga. Havhili ulufingwi ulwo luzengwilwe pa lwalo ulwinza nkaani kuluusya ulufingwi luula ulwa hali.

⁷ Inga ulufingwi ulwa kwanda lutavhanje ni ibada naalimo, nkandi kutánziliilwe kuvha nu lufingwi ulwa vhuvhili.

⁸ Ileelo uMulungu lwe aalola uvhuvhiivhi uvhwa vhantu vhaakwe ávhavhuziizye átili, “Yeenyi, ahavhaliilizyo hakwinza, he ndivhiiha ulufingwi ulupwa na vhantu avha Isilayeeli na vha Yuuda.

⁹ Ulufingwi ulupwa ulwo te luhaavhe inza luula ulwa hali lwe návhiisile na vhataata vhaavho, ahavhaliilizyo haala he návhalemile ni nyoovhe kuvhalongola kufuma mu nsi iya Miisili. Avheene vhatáamile vhatungamu kulandata ulufingwi lwane ulwa hali. Ye nongwa niine ntávhasajiiye.

¹⁰ Ulu lwe lufingwi ulupwa lwe ndiluvhiiha na vhantu avha Isilayeeli insiku izyo zye zikwinza. Ndivhiiha indajizyo zyane mu njeele zyavho, nu kuzisimba mu mooyo gaavho. Ndiivha ne Mulungu waavho, vhoope vhaliivha vhantu vhaane.

¹¹ Te ahaavhe umuntu wonti we alimusambilizyaga uwamwavho, poosye we alimusambilizyaga umujenzi waakwe kuuti, ‘Mumanye uMWENE uMulungu.’ Avhantu vhonti kufuma umunsi kufishila usongo, vhaliimanya ine.

¹² Ziliivha vhwevhulo, mwe pe ndivhaswila imbiivhi zyavho, te nkavhukumbushe havhili uvhutalamalandu vhwavho.”

¹³ UMulungu lwe akuti, “Ulufingwi ulu lupwa,” yikulolesya kuuti ulufingwi ulwa hali lukalifile. Havhili ishintu shonti she shikalifile nu kulala, shikuvha shipalamiiye kulovha.