VaHebuli 5 - ULufingwi uLupwa

¹ Yeenya, umupuuti umupiti wonti akusaavhulwa kufuma ku vhantu kumuvhombela uMulungu pa luvhambo lwavho. Akuvhafumwizya kwa Mulungu ivipeelwa ni mpuutile zyavho kuzya vhutalamalandu.

² Uweene angavhafwila uvhwila avhamwavho vhe vhatakumanya na vhe vhakupuvha, mwe pe woope muyeyevhazu.

³ Uvhuyeyevhazu vhwakwe vhwe vhukupela kuuti, woope akwanzilwa kufumwa impuutile kuzya vhutalamalandu vhwakwe wuuyo, inza vwe akufumwa impuutile kuzya vhutalamalandu uvhwa vhamwavho.

⁴ Ataliipo umuntu we angayivhiiha wuuyo kuvha mupuuti umupiti, nkandi uMulungu we akumusaavhula inza vwe ámusavhuuye uAaloni.

⁵ Vhwevhulo, woope uChilisiti atáyilondoleeye wuuyo uvhushindamu uvhwa kuvha mupuuti umupiti, nkandi uMulungu we ámusavhuuye. Yeenya, uMulungu ámuvhuziizye átili, “Iwe we Mwana waane, ileelo ili navha ne Taata waaho.”

⁶ Havhili yisimviilwe pamo mu Vhusimbe uVhufinjile kuuti, “Iwe we mupuuti shiima, inza vwe uMelikizeedeki áamile.”

⁷ Lwe uYeesu ali mu nsi umu, ahamulaavhaga uMulungu nu kukuuta nkaani na mansozi, mwe pe ámanyile kuuti uMulungu ali na maha aga kumupoha ku vhufwe. Woope uMulungu ahiitiha impuuto zyakwe, mwe pe uYeesu ahamushindihaga.

⁸ Pooka nu kuuti uYeesu áamile Mwana wa Mulungu, ásambiliiye kumushindiha uMulungu kwi idala ilya mayimba ge gahamwagaga.

⁹ Kutuushila amayimba igo, uMulungu ahamupela kulunjisya zye ahanzaga. Pe kwi idala ilyo, uYeesu ahavha vhwandilo uvhwa vhuposhi uvhwa shiima ku vhonti vhe vhakumushindiha.

¹⁰ Havhili uMulungu ahamuvhiiha kuvha mupuuti umupiti inza vwe uMelikizeedeki áamile.

Insoshi kuzya kululeha ulwitiho

¹¹ Tuli nazyo inyinji izya kuyanga izya Yeesu kuvha mupuuti umupiti, ileelo shigomu kuvhalondovholela, mwe pe mwe vhagomu kuzimanya.

¹² Ahavhaliilizyo iha imwe mwaanziliilwe kuvha mwe vhasambiilizi ku vhamwinyu, ileelo imwe muli she mukwanza umuntu uwa kuvhasambiilizya insambiilizyo izya ku vhwandilo izya izwi ilya Mulungu. Muli inza avhaana avhacheeche vhe vhakwonka, vhakupootwa kulya ishaakulya ishigomu.

¹³ Yeenya, umuntu wonti we akulandila kwi izivha vhweleele, mwana umucheeche we atazimanyile ingolosu.

¹⁴ Ileelo avhantu vhe vhagomile vhe vhakulya ishaakulya ishigomu. Ivho vhe kwi idala ilya kuyiluvhaalizya, vhavheleleeye kuzimanyinsanya inyinza ni mbiivhi.