VaHebuli 3 - ULufingwi uLupwa

UYeesu mupiti kuluusya uMoose

¹ Ishi vhamwitu, imwe mwe vhafinjile, mwe uMulungu avhiisite inza iswe, mumwenyelezyaje nkaani uYeesu we mutumwa havhili mupuuti wiitu umupiti mu lwitiho lwitu.

² Uweene áamile mutungamu kwa Mulungu we ámusavhuuye, inza uMoose woope vwe áamile mutungamu ku vhantu vhonti avha mu nyumba ya Mulungu, kwe kuuti aVhaisilayeeli.

³ Ileelo uYeesu akwanzilwa kupeelwa uvhushindamu nkaani kuluusya uMoose inza umuzenzi uwa nyumba vwe akupeelwa uvhushindamu kuluusya inyumba yiiyo.

⁴ Yeenya, inyumba yonti yikuzengwa nu muntu, ileelo uMulungu we akuvizenga ivintu vwonti.

⁵ UMoose áamile mutungamu ku vhantu vhonti avha mu nyumba iya Mulungu. Imbombo yaakwe ku vhantu ivho yáamile ya kuhomeshezya ziila zye uMulungu ákasiime kuyanga pilongolela.

⁶ Ileelo uChilisiti uweene Mwana uMutungamu, havhili mwimiilizi uwa vhantu avha mu nyumba iya Mulungu. Niiswe twe vhantu vhaakwe, inga tukujendeelela kuvha nu vhudandamazu vhwitu nu kusimpa mu ziila zye tukuzisuuvhila.

Insoshi ku vhe vhatakwitiha

⁷ Ishi inza vwe uMupepo uMufinjile akuyanga akuti, “Ileelo inga mwivwa izwi ilya Mulungu,

⁸ mutahagavhiishe amooyo giinyu kuvha magomu inza vwe avhataata vhiinyu vhásambusile ahavhaliilizyo haala he vhahamulingaga ku luugwa.

⁹ Ukwo avhataata vhiinyu vhándinzile nu kumpima, pooka nu kuuti vházivhwenyi imbombo zyane ku maaha 40.

¹⁰ Kuli izyo, návhavitiliilwe avhantu avha havhaliilizyo iho, náyanzile nátili, ‘Avhantu ivha amooyo gaavho mavhiivhi insiku zyonti, vhantu vhe vhatakwanza kugalandata amadala gaane.’

¹¹ Kuli izyo, návisiitwe nu kulapa, náyanzile nátili, ‘Nalyoli avhantu ivha te vhahinjile pa lutuuzyo lwe mbasenganiziinye.’”

¹² Vhamwitu, muvhe minso, muli imwe atahaavhe umuntu uwa mwoyo umuvhiivhi we atakwitiha, uyo akuyilehaanya nu Mulungu uMulanzi.

¹³ Ileelo mugomanyaaje mwenti insiku zyonti, kwe kuuti insiku zyonti zye tukuzyita tukuti, “Ileelo,” inga umuntu wonti atahinze ahopenkanywe nu vhutalamalandu, nu kuvha nu mwoyo umugomu kwa Mulungu.

¹⁴ Inga tuli nu mute kumusuuvhila uMulungu kufishila ku vhusililishilo, inza vwe twítisile kufuma ku vhwandilo, pe tuli nu vhuliilani nu Chilisiti.

¹⁵ Mukumbushe uVhusimbe uVhufinjile vhwe vhukuyanga vhukuti, “Ileelo inga mwivwa izwi ilya Mulungu, mutahagavhiishe amooyo giinyu kuvha magomu, inza vwe avhataata vhiinyu vhásambusile.”

¹⁶ Ishi vhe vha naanu vhe vhásambusile lwe vhiivwa izwi ilya Mulungu? Vhuli, te vhe vhala vhe vhálongoliilwe nu Moose kufuma mu nsi iya Miisili?

¹⁷ Havhili ishi vhe vha naanu vhe vhámuvisiizye uMulungu amaaha 40? Vhuli, te vhe vhala vhe vhávhomvile uvhutalamalandu nu kufwa mu luugwa?

¹⁸ Havhili ishi vhe vha naanu vhe uMulungu álafile átili te vhahinjile pa lutuuzyo lwakwe, lwe avhasenganiziinye? Vhuli, te vhe vhala vhe vháhaanile kumushindiha?

¹⁹ Ishi tumanyile kuuti avhantu ivho vháposiitwe kwinjila pa lutuuzyo ulwo, mwe pe vhatámwitisile uMulungu.