VaHebuli 2 - ULufingwi uLupwa

Mutavhusufwaje uvhuposhi uvhwa Mulungu

¹ Pe ishi, ziila zye tuzyivuuye, tukwanzilwa kuzilema, inga tutahinze tuzileshe nu kuzilandata izinji zye zitakwanzilwa.

² Yeenya, izwi lye avhahavhizya vhávhavhuziizye avhataata vhiitu lyánziliilwe kulilandata. Avhantu vhonti vhe vhálilesile nu kuhaana kulilandata vhápeliilwe isunde kulandatana ni mbiivhi zyavho.

³ Pe ishi, iswe tungaapona inza vhuli kupeelwa isunde, inga tutakuvhusaajila uvhuposhi uvhupiti inza uvhu? UMwene uYeesu wuuyo we átalisile kuvhukumusya uvhuposhi uvhwo, na vhantu vhe vhámwivuuye vhe vhátuhomesheziizye kuuti vhwáli vhwa nalyoli.

⁴ UMulungu woope ávhuhomesheziizye uvhuposhi uvhwo kwi idala ilya kulolesya ivilolesyo ni zya kusukumizya na maha aga mavhiila mu mavhiila, nu kuuvhapa avhantu ivho ivikunjilwa ivwa Mupepo uMufinjile kulandatana nu lukasamo lwakwe.

UYeesu áyisiizye nu kuvha muntu

⁵ Tumanyile kuuti uMulungu atavhapiiye avhahavhizya amaha aga kuyikonzya insi impwa ye yikwinza, ye tukuyanga inongwa zyakwe.

⁶ Ileelo yisimviilwe mu Vhusimbe uVhufinjile nu kuhomeshezya kuuti, “We Mulungu, umuntu wu naanu we iwe ukumukumbuha? Havhili umwana wa muntu wu naanu we iwe ukumusaajila?

⁷ Wámuvhiisile umuntu kuvha munsi kuluusya avhahavhizya ku havhaliilizyo hansi. Ileelo ishi umupiiye uvhushindamu nu mushinzi,

⁸ nu kumuvhiiha kuuti avikonzyaje ivintu vwonti.” Kuli izyo, uMulungu ámuvhiisile umuntu kuuti avikonzyaje ivintu vwonti. Shitáliipo ishintu naashimo she umuntu atahashikonzyaga. Ileelo ahavhaliilizyo iha tutakumulola umuntu, lwe akuvikonzya ivintu vwonti ivwo.

⁹ Ileelo tukumulola uYeesu, we uMulungu ámuvhiisile kuvha munsi kuluusya avhahavhizya ku havhaliilizyo hansi. Uyo we uMulungu amupiiye uvhushindamu nu mushinzi umupiti kufumiilana nu kuyimba nu kufwa kwakwe. UMulungu ávhomvile vhwevhulo, inga kwi idala ilya vhwila vhwakwe, uYeesu afwe kuzya kuvhapoha avhantu vhonti.

¹⁰ Yámuhondeziizye uMulungu we ávipezile ivintu vwonti, nu kuvivhiiha inza vwe vili, kumutemwa kuvha mulongozi uweene we vhwandilo uvhwa vhuposhi kwi idala ilya mayimba. Ávhomvile vhwevhulo, inga uYeesu avhinjizye avhiitisi avhinji mu vhushindamu vhwakwe.

¹¹ UYeesu pooka na vhaala vhe akuvhazelufwa uvhutalamalandu vhwavho, uTaata waavho ali wooka. Kuli izyo, uYeesu atakulola insoni kuvhiita kuuti vhajenzi vhaakwe.

¹² Akuti, “We Mulungu, ndizikumusya imbombo zyaho impiti ku vhajenzi vhaane, ndiyimba inyimbo izya kukutiima pa mpuga iya vhantu vhaaho.”

¹³ Havhili akuti, “Ndimusuuvhila uMulungu.” Havhili akuti, “Ine indi ipa pooka na vhaana vhe uMulungu ampiiye.”

¹⁴ Mwe pe avhaana ivho vhali na mavhili na mavhanda, woope uYeesu áyinzile nu muvhili na mavhanda inza avheene. Ávhomvile vhwevhulo, inga kwi idala ilya vhufwe vhwakwe agapoote amaha aga Mukwalanzi we ali na maha aga kuleeta uvhufwe.

¹⁵ Havhili ávhomvile vhwevhulo, inga avhavhiishe kuvha vhasatushe avhantu vhonti vhe vháali vhazya mu vhulanzi vhwavho vhwonti kuzya kwogopa uvhufwe.

¹⁶ Ilyo likulolesya apazelu kuuti uYeesu atínzile kuvhaavwa avhahavhizya, nkandi avhantu avha mu mpaapo izya Aabulahamu.

¹⁷ Ilyo lye lyámupezile kuuti aholane na vhajenzi vhaakwe ku zyonti, inga avhe mupuuti umupiti we ali nu vhwila havhili mutungamu kumuvhombela uMulungu, inga afumwe impuutile iya kuvhaswila avhantu uvhutalamalandu vhwavho.

¹⁸ Mwe pe uweene áyimviliilwe nu kulingwa, angavhaavwa vhe vhakulingwa.