VaHebuli 13 - ULufingwi uLupwa

Vwe yikwanzilwa kumuhondezya uMulungu

¹ Ishi mujendeelele kukundana inza avhanine vwe vhakukundana.

² Havhili mujendeelele kuvhaposheela avhajeni mu nyumba zyinyu, mwe pe kwi idala ilyo, vhamo vhávhaposheleeye avhahavhizya ishisita kumanya.

³ Muvhakumbuhaje avhantu vhe vhakunziilwe mu jeela, muvhanje ngati mukunziilwe pooka navho. Havhili muvhakumbuhaje vhaala vhe vhakuyimvilwa, muvhanje ngati mukuyimvilwa pooka navho.

⁴ Uvhusendelo vhukwanzilwa vhushindikwaje na vhantu vhonti, havhili umulume nu mushi vhatavhombaje uvhulugusu nu vhuvhembu, mwe pe uMulungu alivhalonga avhantu vhonti vhe vhakuvhomba uvhulugusu nu vhuvhembu.

⁵ Mutavhanje nu lupapilo ulwa mpiiya, nkandi amooyo giinyu gitihaje kuuti vikwiliiye vwe muli navwo. Nkuvhavhuuzya vhwevhulo, mwe pe uMulungu áyanzile átili, “Te nkakuleshe, poosye kukuluvwa naalumo.”

⁶ Ye nongwa tukuyanga ishisita ilyoga kuuti, “UMWENE uMulungu we akunaavwa ine, ntakwogopa naashimo. Umuntu angambomba ishooni?”

⁷ Muvhakumbuhaje avhalongozi vhaala vhe vhahavhasambilizyaga izwi ilya Mulungu. Mulusivhililaje ulujendo lwavho ulwinza, lwe vháali nalwo mu vhulanzi vhwavho nu kululandata ulwitiho lwavho.

⁸ UYeesu Chilisiti atakwanduha. Uweene ali inza vwe áali ku vhwandilo, ahavhaliilizyo iha na shiima.

⁹ Mutalandataje insambiilizyo injeni izya mavhiila mu mavhiila. Yeenya, amaha aga mu mooyo giinyu gakufuma mu vhwila uvhwa Mulungu, gatakufuma mu ndajizyo izya vwakulya zye zitangavhaavwa naashimo vhaala vhe vhakuzilandata.

¹⁰ Tuli ni shifinjilo she avhapuuti vhe vhakumuvhombela uMulungu mwi Iheema, vhatakwitishilwa kulya impuutile zye zili pa shifinjilo isho.

¹¹ Kulandatana ni ndajizyo izya Moose, umupuuti umupiti ahanyatulaga amavhanda aga vihanu nu kusogola kufumwa aPafinjile pa Pafinjile kuzya vhutalamalandu uvhwa vhantu. Inyama izya vihanu ivwo, ahazinyatulaga nu kuzipemba panzi pi ilinga.

¹² Ye nongwa uYeesu woope áyimviliilwe nu kumugoga panzi iya shikwilo ishipiti isha nkaaya iya Yelusaleemu, inga avhazelufwe avhantu uvhutalamalandu vhwavho kwi idala ilya mavhanda gaakwe.

¹³ Kuli izyo, niiswe tumulandate panzi iya shikwilo isho nu kujimbiilila kulola insoni inza uweene vwe ájimbiliiye.

¹⁴ Tuvhombe vhwevhulo, mwe pe mu nsi umu tutali ni nkaaya iya shiima, nkandi tukuguliilila kusogola kwinjila mu nkaaya iya ku mwanya insiku zye zikwinza.

¹⁵ Kwi idala ilya Yeesu tujendeelele kumutiima uMulungu, mwe pe amazwi giitu aga kulitiima izina lyakwe gakuholana ni mpuutile zye tukumufumwizya.

¹⁶ Mujendeelele kuvhomba inyinza nu kuvhaavwa avhamwinyu ivintu vwe muli navwo, mwe pe kuvhomba vhwevhulo, ye mpuutile ye yikumuhondezya uMulungu.

¹⁷ Muvhashindihaje avhalongozi vhiinyu nu kuyiisya ku kwavho, mwe pe vhe vhakuvhasunga ahavhaliilizyo honti ishisita kulita. Havhili vhalilondovhola pilongolela ilya Mulungu izya mbombo yaavho. Kuli izyo, muvhashindihaje, inga vhavhombaje imbombo yaavho ku luseshelo. Inga mutakuvhashindiha, kwe vhavhombaje imbombo ku vhuswimiilizu ni mbombo yaavho iyo yitangavha ni ilonka kuli imwe.

¹⁸ Mujendeelele kutulaavhila. Tuli nu vhwanalyoli kuuti amooyo giitu gatakutulonga naashimo, mwe pe tuli nu mute kuvhomba izya nalyoli ku vhantu vhonti.

¹⁹ Nkuvhalambiilizya kuuti mundavhilaje, inga uMulungu angalusye naluvhiilo kuli imwe.

Amazwi aga vhusililishilo

²⁰ UMulungu uwa vhutehamu ámuzyusiizye uMwene wiitu uYeesu, uMudiimi uMupiti uwa ngʼonzi, uweene we áyiisite amavhanda gaakwe pa shihovhenkanyo ge gakuhomeshezya ulufingwi ulwa shiima.

²¹ Havhili uMulungu ajendeelele kuuvhapa amaha aga kuvhomba zye uweene akasiime, avhombe mu mooyo giinyu kwi idala ilya Yeesu Chilisiti zye zikuhondela pilongolela lyakwe. Uweene ashindikwaje shiima shiima! Amina.

²² Mwe vhamwitu, nkuvhalambiilizya nkaani kuuti mugalandataje amazwi amansi iga aga kuvhasuvhaalizya ge mbasimbiiye mwa kalaata uno.

²³ Nkwanza mumanye kuuti uwamwitu uTiimoti vhamufumwizye mu jeela. Inga ayinza naluvhiilo ipa, kwe ninze nawo kuli imwe, inga tuvhalamushe.

²⁴ Muvhalamushe avhalongozi vhonti na vhafinjile vhonti vhe muli navho ukwo. Avhiitisi avha mu nsi iya Itaaliya vhakuvhalamuha.

²⁵ UMulungu avhafwilaje uvhwila imwe mwenti.