VaHebuli 1 - ULufingwi uLupwa

UMulungu akuyanga niiswe kutuushila kwa Mwana waakwe

¹ Hali, uMulungu ahayangaga na vhataata vhiitu kutuushila ku vhakuvhwi. Ahavhombaga vhwevhulo ulwinji na ku madala aga mavhiila mu mavhiila.

² Ileelo insiku izi izya vhusililishilo, uMulungu ayanzile niiswe kutuushila kwa Mwana waakwe. Ámusavhuuye uMwana uyo kuuti we apwane ivintu vwonti, nu kutuushila ku kwakwe uMulungu ápezile imwanya ni nsi na vwonti vwe vili muumwo.

³ UMwana uyo akulolesya vwe uMulungu akunyengʼenyela ku vhushindamu, havhili uweene shiholanyo isha nalyoli isha vwe uMulungu ali. Havhili uMwana uyo akuvivhiiha ivintu vwonti kuuti vijendeelele kuvha inza vwe vili, kwi izwi lyakwe ilya maha. Lwe avhazelufwa avhantu uvhutalamalandu, ásogooye kutendama uluvhazu ulwa nyoovhe iya kundiilo iya Mulungu uwa Maha Gonti, pa vhushindamu uvhupiti nkaani ku mwanya.

UYeesu mupiti kuluusya avhahavhizya

⁴ UMulungu ámuvhiisile uMwana waakwe kuvha mupiti kuluusya avhahavhizya, inza vwe ámupiiye izina ipiti kuluusya ilya vhahavhizya.

⁵ Yeenya, ataliipo uhavhizya nuumo we uMulungu ámuvhuziizye inza vwe ámuvhuziizye uMwana átili, “Iwe we Mwana waane, ileelo ili navha ne Taata waaho.” Havhili ataliipo uhavhizya nuumo we uMulungu ámuvhuziizye inza vwe áyanzile átili, “Kwe mbe ne Taata waakwe, woope kwe avhe Mwana waane.”

⁶ Havhili uMulungu lwe akumuleeta uMwana waakwe imozi mu nsi, áyanzile átili, “Avhahavhizya vhonti avha Mulungu vhamupuute uMwana uyo.”

⁷ Havhili uMulungu lwe akuyanga izya vhahavhizya, átili, “Avhahavhizya vhaane nkuvhapela kuvha nkungu, vhoope avhavhomvi vhaane, nkuvhapela kuvha miilo ga mwoto.”

⁸ Ileelo lwe akuyanga izya Mwana waakwe, átili, “We Mulungu, uvhumwene vhwaho vhuliivha vhwa shiima, havhili ulivhakonzyaga avhantu ku vhugolosu.

⁹ Iwe ukusungwa uvhugolosu, nu kuvhuviitilwa uvhuvhiivhi. Kuli izyo, uMulungu, uMulungu waaho, akupasile amafuta aga kuvha nu luseshelo kukuvhiiha kuvha we mupiti kuluusya avhamwinyu.”

¹⁰ Havhili uMulungu akumuvhuuzya uMwana waakwe kuuti, “Iwe Mwene we wápezile insi ku vhwandilo, havhili we wápezile ni mwanya weneewe.

¹¹ Pooka niizyo, izyo zyonti ziliilovha, ziliilala inza amenda, ileelo iwe kwe uvhanje amanda gonti.

¹² Iwe ulizipinta inza inkanzu, ziliyandulwa inza umwenda umukaali. Ileelo iwe utakwanduha, uvhulanzi vhwaho te vhuhaasile.”

¹³ Yeenya, ataliipo uhavhizya nuumo we uMulungu ámuvhuziizye inza vwe ámuvhuziizye uMwana átili, “Tendaama ku luvhazu lwane ulwa kundiilo pa vhushindamu uvhupiti nkaani, kufishila pe navhavhiiha avhalugu vhaaho pansi pa vinama vwaho.”

¹⁴ Pe ishi, avhahavhizya shintu vhuli? Avhahavhizya mpepo vhweleele zye zikumuvhombela uMulungu. Uweene akuzisonteelezya kuvhavhombela vhaala vhe vhaliipokwa.