VaGalati 6 - ULufingwi uLupwa

Twavwanaje

¹ Vhamwitu, inga umuntu aagwa mu vhutalamalandu, imwe mwe mukulongolwa nu Mupepo mumusohaje ku vhutonsu vhwe vhukufuma kwa Mupepo, inga aleshe uvhutalamalandu vhwakwe. Havhili muvhanje minso, inga niimwe mutahinze mulingwe kululandata ulujendo lwakwe.

² Mwavwanaje mu ntamwo zyinyu. Kuvhomba vhwevhulo, kwe kulunjisya ululajizyo ulwa Chilisiti.

³ Ishi inga umuntu akuyilola kuuti mumwamu kuluusya avhanji, ileelo atali inza vhwevhulo, uyo akuyihopenkanya wuuyo weeka.

⁴ Ileelo mwenti mwenyelezyaje ulujendo lwinyu. Inga mukuvhomba inyinza, pe mungayitiima ku ziila zye muzivhomvile imwe vhweleele, ishisita kuholanya na zye avhanji vhavhomvile.

⁵ Nkuyanga vhwevhulo, mwe pe avhantu vhonti vhakwanzilwa kuvhuusya amaligo gaavho vhuuvho.

⁶ Umuntu we akusambiilila izwi ilya Mulungu, amugavhilaje umusambiilizi waakwe ivintu ivwinza vimo vwe akulonka.

⁷ Mutayihopenkanyaaje, ataliipo umuntu we angamuhopenkanya uMulungu. She umuntu akuvhwala, she aliivuna.

⁸ Yeenya, we akuvhulandata uvhuntu uvhwa vhutalamalandu, aliivuna uvhufwe. Ileelo we akumulandata uMupepo uMufinjile, aliivuna kufuma ku kwakwe uvhulanzi uvhwa shiima.

⁹ Ishi tutalitaje kuvhomba inyinza, mwe pe inga tukujimbiilila, tuliivuna inyinza, lwe ahavhaliilizyo haafiha.

¹⁰ Pe ishi, ahavhaliilizyo honti he tuli naho, tuvhavhombelaje inyinza avhantu vhonti, inkaani avhiitisi avhamwitu.

Insoshi izya vhusililishilo

¹¹ Yeenyi uvhusimbe vhwane uvhu vwe nsimvile vhwa vhupiti. Ishi nkuvhasimbila ni nyoovhe yaane neneene.

¹² Vhe vhakuvhavijiilizya imwe kutahiililwa, vhakuvhomba vhwevhulo, mwe pe vhakwanza kushindikwa na Vhayuuda, ku ziila zye zikuvhombwa mu muvhili. Vhakuvhomba vhwevhulo, inga gatahavhaaje amayimba ge gakufumiilana nu kulumbiilila uvhwanalyoli uvhwa shihovhenkanyo isha Chilisiti.

¹³ Havhili vhe vhakwanza kuuti avhiitisi vhonti vhatahiililwe, avheene vhatakuzilandata indajizyo zyonti. Vhakwanza kuuti imwe mutahiililwe, inga vhayitumvwizye amavhili giinyu kuuti avheene vhe vhavhavhiisile kuuti mwandushe.

¹⁴ Ileelo ine ntahaavhe ni shintu shonti isha kuyitumvwizya, injitumvwizyaje she shihovhenkanyo isha Mwene wiitu uYeesu Chilisiti. Kwi idala ilya shihovhenkanyo isho, imbombo izya vhantu avha mu nsi, zitali ni ilonka naalimo kuli ine, havhili zye nkulola zili ni ilonka, avhantu avha mu nsi vhakulola zitali ni ilonka.

¹⁵ Kutahiililwa, poosye kuvha ishisita kutahiililwa, vwonti vitali nu vhumwamu naavhumo, she shili nu vhumwamu, kwe kupelwa vhupwa nu Mulungu.

¹⁶ Vhonti vhe vhakulandila kuvhulandata uvhwanalyoli uvhwo, nalyoli vhantu vha Mulungu. UMulungu avhapanje uvhutehamu nu kuvhafwila uvhwila. Avheene vhe nalyoli vhantu vha Mulungu.

¹⁷ Ishi, nuumo atahantamwe havhili, mwe pe indi na mavhamba mu muvhili waane, inza vwe uYeesu áamile nago.

¹⁸ Vhamwitu, uMwene wiitu uYeesu Chilisiti avhafwilaje uvhwila. Amina.