VaGalati 5 - ULufingwi uLupwa

Mutahaavhe mwe vhazya havhili

¹ UChilisiti atusatuuye, inga tuvhe twe vhasatushe. Ishi musimpe ku maha, mutahiitishe kuvha mwe vhazya avha ndajizyo havhili.

² Tejeelezyi! Ine ne Paavhuli nkuvhavhuuzya izi! Inga mukwitiha kutahiililwa, kuzilandata indajizyo izya Moose, pe uChilisiti atali ni ilonka naalimo kuli imwe.

³ Nkuvhahomeshezya havhili avhantu vhonti vhe vhakwitiha kutahiililwa, kuuti vhakwanzilwa kuzilema indajizyo zyonti izya Moose.

⁴ Inga mukusuuvhila kuvha mwe vhagolosu kwi idala ilya kuzilandata indajizyo, pe muyilehiinye nu Chilisiti, muvhuhaanile uvhwila uvhwa Mulungu.

⁵ Ileelo iswe tukusuuvhila kuuti tupelwe kuvha twe vhagolosu. Kuvha vhwevhulo, tukuguliilila ku mwoyo wonti, kwi idala ilya maha aga Mupepo nu lwitiho.

⁶ Ishi inga tusopenkiine nu Chilisiti uYeesu, kutahiililwa, poosye kuvha ishisita kutahiililwa, kutali ni ilonka naalimo, she shikwanzilwa, lwitiho ulwa kumwitiha uChilisiti. Ulwitiho ulwo lukuloleha kwi idala ilya kumukunda uMulungu na vhantu vhonti.

⁷ Ku vhwandilo mwajendelelaga ahinza kumulandata uChilisiti! Ishi wu naanu we avhadinda kuvhulandata uvhwanalyoli?

⁸ We avhasonziizye kuvhomba izyo, te wu Mulungu we akuvhiita imwe.

⁹ Insambiilizyo nyinsi vhweleele izya ilenga zikuvhateezya avhinji, inza vwe avhantu vhakuyanga vhakuti, “Umulembo munsi vhweleele uwa kuluzizya, wukuluzya umunya wonti!”

¹⁰ Imwe mwe vhantu avha Mwene uYeesu. Nkuyanga ishisita amaganigani kuuti, te mulandate amazwi aga vhantu avhanji, nkandi kwe mulandate amazwi gaane. Havhili wonti we akuvhateezya imwe, nalyoli alilongwa, poosye avhe wu naanu.

¹¹ Vhamwitu, vhamo vhakuyanga vhakuti ine indi she nkukumusya kuuti, vhonti vhakwanzilwa kutahiililwa. Inga vwe nkuyanga vhwevhulo, shooni she indi she nkuyimvilwa? Inga vwe nkuyanga vhwevhulo, kukumusya kwane inongwa izya shihovhenkanyo isha Yeesu, nkandi kutakuvhaviisya.

¹² Nkusungwa kuuti avhantu ivho vhe vhakuvhapuvwa kuzya kutahiililwa, vhajendeelele poosye nu kuyipaasa!

¹³ Vhamwitu, imwe uMulungu avhiisite, inga muvhe mwe vhasatushe. Ileelo mutavhuvhombelaje uvhusatushe vhwinyu kuvhulandata uvhuntu vhwinyu uvhwa vhutalamalandu, nkandi kwi idala ilya shikunzi mwavwanaje.

¹⁴ Indajizyo zyonti izya Moose zili mu lulajizyo lwoka lwe lukuti, “Umukundaje umupalamani waaho inza vwe ukuyikunda weneewe.”

¹⁵ Ileelo inga mukulumana nu kuliizana inza ivihanu, muvhe minso, mutahinze mumalane.

Mu vhulanzi vhwitu tumusuvhilaje uMupepo uMufinjile

¹⁶ Ishi nkuvhavhuuzya kuuti, ulujendo lwinyu lulongolwaje nu Mupepo uMufinjile, pe te muhalandate havhili impapilo izya vhuntu vhwinyu uvhwa vhutalamalandu.

¹⁷ Yeenya, vwe uvhuntu uvhwa vhutalamalandu vhukupapamila, vikulwana nu Mupepo uMufinjile. Havhili vwe uMupepo uMufinjile akwanza, vikulwana nu vhuntu uvhwa vhutalamalandu. UMupepo uMufinjile atakwivwana nu vhuntu uvhwa vhutalamalandu, inga mutavhombaje zye mukwanza kuvhomba.

¹⁸ Ileelo inga mukulongolwa nu Mupepo, mutakuvha mwe vhazya avha ndajizyo.

¹⁹ Imbombo izya muntu we akulongolwa nu vhuntu uvhwa vhutalamalandu zili apazelu. Imbombo izyo zye zino: uvhulugusu nu vhuvhembu nu vhumalaaya.

²⁰ Izyamwavho zye zino: kupuuta iviholanyo nu vhulozi nu vhulugu ni ivho nu vhuzuvha nu mulaha nu lutumvanyo na madali nu kusugaana

²¹ nu mwone nu vhwashimwela nu vhupafu ni zinji zye zikuholana niizyo. Nkuvhavhuuzya havhili inza vwe návhavhuziizye kuuti, avhantu vhe vhakuvhomba izyo, te vhahinjile mu vhumwene uvhwa Mulungu.

²² Ileelo inga tukulongolwa nu Mupepo uMufinjile, tukuvha na mantonongwa iga: ishikunzi nu luseshelo nu vhutehamu nu vhujimbiilizu nu vhwinza nu vhutesi nu vhutungamu

²³ nu vhutonsu nu kuyikonzya. Lutaliipo ululajizyo lwe lukuhaana izyo!

²⁴ Avhantu vhe vhali mwa Chilisiti uYeesu, vhavhuhomeleeye pa shihovhenkanyo uvhuntu vhwavho uvhwa vhutalamalandu pooka ni nsiivho zyakwe imbiivhi ni mpapilo.

²⁵ UMupepo atupiiye uvhulanzi uvhupwa, pe ishi tulandataje uvhulongozi vhwakwe.

²⁶ Tutanzilizanyaaje, poosye kulolelana umwone, mwe pe tukuyitumvwa vhweleele.