VaGalati 4 - ULufingwi uLupwa

¹ Ishi nkuyanga kuuti, we akupwana inga mwana, atakusugaana nu muzya ku ndajizyo, pooka nu kuuti ivwuma vwonti vwakwe.

² Ahavhaliilizyo iho honti he mwana, akulongolwa na vhasunzi na vhimiilizi, kufishila ahavhaliilizyo he havhisiilwe nu yise.

³ Niiswe vhwevhulo, lwe ashiili kwinza uChilisiti, twáli twe vhazya avha maata ge gakuvhalongola avhantu mu nsi.

⁴ Ileelo ahavhaliilizyo he hávhisiilwe lwe haafiha, uMulungu ahamusonteelezya uMwana waakwe mu nsi, ahavha muntu inza iswe, ahanda kulongolwa ni ndajizyo.

⁵ Ámusonteleziizye, inga avhatavhule vhe vháali vhazya avha ndajizyo izya Moose. Ávhomvile vhwevhulo, inga iswe swenti tuvhe twe vhaana vha Mulungu.

⁶ Ishi, mwe pe twe vhaana vhaakwe, uMulungu amusonteleziizye uMupepo uwa Mwana waakwe mu mooyo giitu, uMupepo we akutuvhiiha kuuti tumwitaje uMulungu tutinji, “Aba,” kwe kuuti, “Taata.”

⁷ Ishi iwe te we muzya havhili, nkandi we mwana waakwe. Mwe pe we mwana waakwe, pe iwe kwe uposheele uvhupwano vhwonti vhwe uMulungu avhavhishiiye avhaana vhaakwe.

UPaavhuli akuvhakwinkwina aVhagalaatiya

⁸ Hali, lwe mutámumanyile uMulungu, mwámile mwe vhazya avha vintu vwe te wu Mulungu.

⁹ Ileelo ishi, mumumanyile uMulungu, kwe kuuti woope avhamanyile imwe. Pe mungagaluha inza vhuli, mu maata ge gatali na maha, havhili gatangaavwa naashimo? Vhuli, mukwanza muvhe mwe vhazya avha maata iga havhili?

¹⁰ Muli she mukulema ivikulukuulu ivwa Vhayuuda? Yeenya, mukulema insiku na meezi na manda na maaha gamo, kuuti vikulukuulu ivwa kumushindiha uMulungu!

¹¹ Kulandatana niizyo, nkwogopa kuuti, imbombo ye mbayimbiiye imwe, yitahinze yivhe ya vhweleele!

¹² Vhamwitu, nkuvhalaavha muvhe inza ine, mwe pe ine te ne muzya uwa ndajizyo. Ine indi inza imwe vwe mwámile ku vhwandilo, mutáamile mwe vhazya avha ndajizyo. Lwe náali pooka niimwe, mutámbombeeye uvhuvhiivhi naavhumo.

¹³ Mumanyile kuuti uvhuvhinu vhwe náamile navhwo, vhwe vhwámpeleeye kuvha na havhaliilizyo aha kulumbiilila Izwi iLyinza kuli imwe ulwa kwanda.

¹⁴ Poosye vhwevhulo, ahavhaliilizyo iho mutánsufwizye, poosye kunkaana kuzya vhuyeyevhazu vhwane, poosye she zyáli ndingo kuli imwe. Ileelo mwámposheleeye ngati mukumuposheela wu havhizya uwa Mulungu, poosye ngati mukumuposheela wu Chilisiti uYeesu.

¹⁵ Mwámile nu luseshelo, ishi shintu vhuli she shivhaazile? Nkuyanga zya nalyoli, ahavhaliilizyo haala, nkandi mwítisile poosye nu kufwonkola aminso giinyu nu kumpa ine.

¹⁶ Vhuli, ileelo navha ne mulugu wiinyu, mwe pe nkuvhavhuuzya uvhwanalyoli?

¹⁷ Avhantu avhanji ivho vhakukanyila, inga vhavhaaje imwe, ileelo zye vhakwanza te nyinza. Vhakwanza vhavhalehaanye imwe niine, inga muvhashindihaje avheene.

¹⁸ Hinza shiima kuvha nu mute kuvhomba inyinza, kutavhanje vhweleele lwe indi pooka niimwe.

¹⁹ Vhaana vhaane, inza vwe umwantanda we ali pa vhumwamu akuyiivwa uvhuvhaavi lwe ahavhaliilizyo aha kupaapa haafiha, vwe zyáli niine. Niishi indi she nkuyiivwa uvhuvhaavi nkaani ku zyinyu. Kwe njendeelele kuyiivwa uvhuvhaavi kufishila lwe ulujendo ulwa Chilisiti lwaloleha mu lujendo lwinyu.

²⁰ Indi nu mwoyo nkaani uwa kuvha pooka niimwe ahavhaliilizyo iha, inga mbavhuuzye ku hayanjile he mungaamanya ahinza zye nkuvhavhuuzya. Lwe indi ukutali, indi na maganigani kuuti zye nkuyanga mutangazimanya ahinza.

Ishiholanyo isha Haajili nu Saala

²¹ Mumbuuzye imwe mwe mukusungwa kulongolwa ni ndajizyo izya Moose, vhuli, mukwivwa vwe zikuyanga indajizyo?

²² Yisimviilwe mu Vhusimbe uVhufinjile kuuti, uAabulahamu áamile na vhaana vhavhili, wooka kwa mwantanda we áamile muzya we vhahatinji uHaajili, uwamwavho kwa mwantanda we áamile musatushe we vhahatinji uSaala.

²³ Umwana ula uwa mwantanda we áamile muzya, ápafwilwe ku lukasamo ulwa vhantu. Ileelo umwana uwa mwantanda we áamile musatushe, ápafwilwe kulandatana nu lufingwi ulwa Mulungu.

²⁴ Inongwa izyo shiholanyo. Avhantanda ivha vhavhili vhali inza ulufingwi ulwa hali nu lufingwi ulupwa. Ulwa hali lwe lula lwe lwávhombesile pi igamba uSinaayi, luholiine nu Haajili, avhaana vhaakwe vhakupaapwa mu vhuzya.

²⁵ UHaajili ali inza igamba uSinaayi lye lili ku Alaabiya, havhili ali inza inkaaya iya Yelusaleemu ye yili mu nsi, mwe pe avhantu avha mu nkaaya iyo vhali mu vhuzya uvhwa ndajizyo zye vhápeliilwe pi igamba uSinaayi.

²⁶ Ileelo ulwamwavho luholiine nu Saala we ali inza inkaaya iya Yelusaleemu iya ku mwanya. Inkaaya iyo, nsatushe, havhili ye nkaaya yiitu.

²⁷ Yeenya, yisimviilwe mu Vhusimbe uVhufinjile kuuti, “Seshelaaga iwe, we mugumba we utakupaapa, zumaaga ahalanga ku luseshelo iwe we utahavha nu mwana, mwe pe avhaana avha mwantanda ula, we umulume amulesile, vhinji kuluusya avhaana avha we ali nu mulume.”

²⁸ Pe ishi, vhamwitu, imwe mwe vhaana vha Mulungu kufumiilana nu lufingwi lwakwe, inza uYisaaka.

²⁹ Ileelo insiku ziila, umwana we ápafwilwe nu mwantanda we áamile muzya, ámuleteeye amayimba umwana we ápafwilwe ku maha aga Mupepo uMufinjile. Vwe zili vhwevhulo poosye niishi.

³⁰ Ileelo uVhusimbe uVhufinjile vhukuti vhuli? Vhukuti, “Umushimbizye umwantanda umuzya pooka nu mwana waakwe, mwe pe umwana uwa muzya, atakuposheela uvhupwano pooka nu mwana uwa mwantanda umusatushe.”

³¹ Vwe zili vhamwitu, iswe te swe vhaana avha muzya, swe vha maayi wiitu umusatushe.