VaGalati 3 - ULufingwi uLupwa

Kumwitiha uYeesu pamo kuzilandata indajizyo izya Moose

¹ Mwe Vhagalaatiya, nalyoli mwe vhapukupuuku! Wu naanu we avhalozile? Návhalumbiliiye imwe, niimwe muhamanya ahinza inongwa izya Yeesu Chilisiti, vwe vhámuhomeleeye pa shihovhenkanyo.

² Zye nkwanza kumanya kuli imwe zye zino: Vhuli, mwáposheleeye uMupepo uMufinjile kwi idala ilya kulandata vwe zikwanza indajizyo, pamo kwi idala ilya kutejeelezya Izwi iLyinza ilya Yeesu nu kulyitiha?

³ Vhuli, imwe mwe vhapukupuuku inza vhwevhulo, kuuti mwátalisile zyonti ku maha aga Mupepo uMufinjile, ileelo ahavhaliilizyo iha mukwanza kumala ku maha aga muvhili?

⁴ Vhuli, amayimba gaala gonti ge gávhaazile, ga vhweleele? Ntakwitiha kuuti gáamile ga vhweleele!

⁵ Vhuli, uMulungu akuuvhapa uMupepo uMufinjile nu kuvhomba amafindango pahati yiinyu kwi idala ilya kulandata indajizyo, pamo kwi idala ilya kutejeelezya Izwi iLyinza ilya Yeesu nu kulyitiha?

⁶ Musivhililaje inongwa izya Aabulahamu. UVhusimbe uVhufinjile vhukuti, “UAabulahamu ámwitisile uMulungu, pe uMulungu ahamuvhaazya kuuti mugolosu.”

⁷ Ishi mumanye kuuti, avhantu vhe vhamwitisile uMulungu vhe vhaana vha Aabulahamu avha nalyoli!

⁸ Havhili uVhusimbe uVhufinjile vhwálolesiizye kufuma hali kuuti, vhe te Vhayuuda vhalivhaazilwa kuuti vhagolosu kwi idala ilya lwitiho lwavho. UMulungu we ámuvhuziizye uAabulahamu Izwi iLyinza ili kuuti, “Kutuushila ku kwaho avhantu avha mu nkolo zyonti vhalilootwa.”

⁹ Pe vhaala vhe vhakumwitiha uMulungu vhakulootwa, inza uAabulahamu we ámwitisile.

Tupokwilwe kufuma mu ntipo izya ndajizyo izya Moose

¹⁰ Ileelo vhonti vhe vhakusuuvhila kuvhomba zye zikwanzilwa ni ndajizyo, vhali mu ntipo. Nkuyanga vhwevhulo, mwe pe uVhusimbe uVhufinjile vhukuti, “Umuntu wonti we atakujendeelela kulandata zye zisimviilwe mwi ikalaata ilya ndajizyo, atifiilwe.”

¹¹ Nalyoli, ataliipo umuntu we akuvhaazilwa kuuti mugolosu kwi idala ilya kuzilandata indajizyo, mwe pe uVhusimbe uVhufinjile vhukuti, “Umuntu we akuvha nu vhulanzi, we wula we akuvhaazilwa kuuti mugolosu kwi idala ilya kumwitiha uMulungu.”

¹² Nalyoli indajizyo izya Moose zitakusuuvhila ulwitiho, nkandi imbombo, inza vwe uVhusimbe uVhufinjile vhukuti, “Umuntu we akuvhomba zye zikwanzilwa ni ndajizyo, aliivha nu vhulanzi kwi idala ilya kuzilandata indajizyo izyo.”

¹³ UChilisiti ahatupoha kufuma mu ntipo zye zili mu ndajizyo kwi idala ilya kuzinyatula intipo izyo ku zyitu, mwe pe uVhusimbe uVhufinjile vhukuti, “Wonti we ahomeliilwe pa shihovhenkanyo, atifiilwe.”

¹⁴ Izi zyávhombesile, inga uvhuloote vhwe ápeliilwe uAabulahamu, vhuvhafishile vhe te Vhayuuda, kwi idala ilya Chilisiti uYeesu. Ishi tukuposheela uMupepo uMufinjile, we uMulungu áfinzile kuutupa kwi idala ilya kumwitiha uYeesu Chilisiti.

Indajizyo nu lufingwi

¹⁵ Vhamwitu, nkwanza injanje ku shiholanyo isha kufuma mu vhulanzi vhwitu. Musivhiilile izya lufingwi ulwa vhantu vhavhili. Inga ulufingwi lwavhombeha pilongolela ilya vhantu, ataliipo uwa kuluhaana, poosye kwonjezya inongwa izinji.

¹⁶ Ileelo uMulungu áfinzile kwa Aabulahamu utaata wiitu, uweene pooka nu muntu uwa mu mpaapo zyakwe. UVhusimbe uVhufinjile vhutakuti, “Na vhantu avha mu mpaapo zyakwe,” kwe kuuti avhantu avhinji, ileelo vhukuti, “Nu muntu uwa mu mpaapo zyakwe,” kwe kuuti ali wooka, uyo we wu Chilisiti.

¹⁷ Zye nkwanza kuyanga zye zino: UMulungu ávhiisile ulufingwi lwakwe amaaha 430, lwe indajizyo izya Moose zishiili kuvha. Kuli izyo, indajizyo izyo zitangeefwa ulufingwi ulwo kuuti lutahaavhe na maha.

¹⁸ Inga uMulungu akuuvhapa avhantu uvhupwano vhwakwe kwi idala ilya kulandata indajizyo, pe uvhupwano vhutangasuuvhila havhili ulufingwi ulwa Mulungu. Ileelo kwe kwi idala ilya lufingwi, uMulungu ámupiiye uAabulahamu.

¹⁹ Ishi indajizyo zili ni mbombo vhuli? Zyónjeziilwe mu lufingwi lwe ahavhaliilizyo ahatali hatuuha, kulolesya kuuti avhantu vhali nu vhutalamalandu, kufishila lwe ayinza umuntu ula uwa mu mpaapo izya Aabulahamu, we uMulungu áfinzile. UMulungu ámupiiye indajizyo uMoose kutuushila ku vhahavhizya, nu Moose ahavha pahati kuvhakundanya avhantu nu Mulungu.

²⁰ We akukundanya akwanzilwa inga imbazu zivhili zikuvhiiha ulufingwi. Ileelo uMulungu ali wooka, poosye vhwevhulo, uweene ávhiisile ulufingwi nu Aabulahamu ishisita kuvha we akukundanya.

Imbombo iya ndajizyo

²¹ Vhuli, indajizyo zitakuvhalilana na zye áfinzile uMulungu? Ndaali, te muumwo inga hansi! Yeenya, inga zyaaliipo indajizyo zye zingaavhapa avhantu uvhulanzi, pe nkandi tukuvhaazilwa kuuti twe vhagolosu kwi idala ilya ndajizyo.

²² Ileelo te vwe zili. UVhusimbe uVhufinjile vhukuti, avhantu vhonti vhakulongolwa na maha aga vhutalamalandu. Avhiitisi vheeka vhweleele vhe vhakuvhombelwa ziila zye uMulungu áfinzile, mwe pe vhakumwitiha uYeesu Chilisiti.

²³ Lwe ulwitiho ulwa kumwitiha uChilisiti lushiili kwinza, indajizyo zyátuvhiisile kuvha twe vhazya, tuhagulililaga kuloleha ukwa lwitiho ulwo.

²⁴ Pe ishi, indajizyo izyo zihatulongozyaga ngati musunzi wiitu, kufishila lwe uChilisiti ayinza, inga kwi idala ilya kumwitiha uweene, tuvhaazilwe kuuti twe vhagolosu.

²⁵ Ileelo, mwe pe ulwitiho luula lufisile, iswe tutakulongolwa havhili ni ndajizyo zye zili ngati musunzi.

²⁶ Kwi idala ilya lwitiho, imwe mwenti mwe vhaana vha Mulungu, mwe pe musopenkiine nu Chilisiti uYeesu.

²⁷ Imwe mwenti mwe mwozeliilwe, musopenkiine nu Chilisiti, muli ngati mumuzwaye uChilisiti.

²⁸ Ishi pe kutaliipo kusugaana uMuyuuda na we te Muyuuda, nu muzya nu musatushe, nu mwanaavuli nu mwantanda, mwe pe mwenti muli ishintu shooka mwa Chilisiti uYeesu.

²⁹ Ishi, mwe pe mwe vhantu vha Chilisiti, pe mwe vha mu mpaapo izya Aabulahamu, mulipwana vwe uMulungu áfinzile.