VaGalati 2 - ULufingwi uLupwa

UPaavhuli na vhatumwa avhamwavho

¹ Amaaha 14 lwe gatuuha, nkasogola havhili ku Yelusaleemu pooka nu Balinaaba, nkamunyatula nu Tiiti, nkasogola nawo.

² Násogooye ahavhaliilizyo iho, mwe pe uMulungu ándolesiizye kuuti nsogole. Lwe naafiha, nkatendama na vhalongozi kukwilu, nkavhavhuuzya Izwi iLyinza lye nkavhakumusizyaga vhe te Vhayuuda. Návhomvile vhwevhulo, inga imbombo yaane ye nkuyivhomba yitishilwe, yitahaavhe ya vhweleele.

³ Havhili poosye nu wamwitu uTiiti we te Muyuuda, vhatámuvijiliziizye kutahiililwa,

⁴ poosye inga vháliipo avhiitisi avhanji avha ilenga vhe vhahanzaga kuuti atahiililwe. Avhantu ivho vháyinjiziizye ku vhushevu kuvhupenza uvhusatushe vhwitu vhwe tupeliilwe nu Chilisiti uYeesu, inga vhatuvhiishe mu vhuzya uvhwa kulandata indajizyo izya Vhayuuda.

⁵ Avhantu ivho tutívwine navho inga hansi, inga imwe mujendeelele kuvha nu vhwanalyoli uvhwa Izwi iLyinza.

⁶ Ileelo avhalongozi vhaala avha shivhanza, vhe vhakushindikwa na vhantu, vhatáamile ni zinji injeni izya kumbuuzya. Nalyoli vhahashindikwaga nkaani, ileelo kuli ine izyo te shintu naashimo, mwe pe uMulungu atakwenya uvhumwamu uvhwa muntu lwe akumulonga.

⁷ Vhámanyile kuuti uMulungu ansonteleziizye kuvhalumbiilila Izwi iLyinza vhe te Vhayuuda, inza vwe amusonteleziizye uPeeteli ku Vhayuuda.

⁸ Yeenya, uMulungu we ámupiiye amaha uPeeteli kuvha mutumwa ku Vhayuuda, we niine ámpiiye amaha aga kusogola ku vhe te Vhayuuda.

⁹ Havhili uYaakobu nu Keefa nu Yoohani vhe vhakuloleha kuuti vhalongozi avhapiti, vhámanyile kuuti uMulungu ku vhwila vhwakwe, ámpiiye imbombo ino. Pe vhahatulema inyoovhe nu Balinaaba, kuvha shilolesyo isha vhuliilani. Twítinkiine kuuti iswe tukwanzilwa kuvhomba imbombo ku vhe te Vhayuuda, avheene ku Vhayuuda.

¹⁰ Vhátulaavile ishintu shooka, kuuti tukumbuhaje kuvhaavwa avhapiina, ishintu she poosye niine indi nu mute kushivhomba.

UPaavhuli akumupilila uKeefa

¹¹ Pisinda, uKeefa ahinza mu Antiyookiya kutuvuula, nkamupilila apazelu, mwe pe ávhomvile zye zitakwanzilwa.

¹² Yeenya, avhantu vhamo lwe vhashiili kwinza kufuma kwa Yaakobu, uKeefa ahalyanga na vhe te Vhayuuda. Ileelo lwe avhantu ivho vhaafiha, uKeefa ahayipaagula, ahaleha kulya navho, mwe pe áyogofile avhantu vhe vhahahomelezyaga kuuti avhiitisi vhonti vhatahiililwe.

¹³ Pe na Vhayuuda vhamo vhahanda kuvhomba inza vwe ahavhombaga uKeefa, poosye she vhámanyile kuuti vhakuvhomba izya shifumbo, woope uBalinaaba vhahamulongola havhiivhi, ahanda kuvhomba izya shifumbo izyo.

¹⁴ Pe lwe naalola kuuti vhatakuvhomba kulandatana nu vhwanalyoli uvhwa Izwi iLyinza, nkamuvhuuzya uKeefa apazelu pa vhantu vhonti nkati, “Pooka nu kuuti iwe we Muyuuda, ukulandata amaata aga vhantu vhe te Vhayuuda! Pe shooni she ukuvhavijiilizya avhantu vhe te Vhayuuda kulandata amaata aga Vhayuuda?”

Avhantu vhonti vhakupokwa kwi idala ilya kumwitiha uChilisiti

¹⁵ Nalyoli iswe twe Vhayuuda avha kupaapwa, havhili tutakuyilola kuuti twe vhatalamalandu inza vwe tukuvhalola avhantu vhe te Vhayuuda kuuti vhatalamalandu.

¹⁶ Ileelo tumanyile kuuti, umuntu atakuvhaazilwa kuuti mugolosu kwi idala ilya kulandata indajizyo izya Moose, nkandi kwi idala ilya kumwitiha uYeesu Chilisiti. Niiswe twámwitisile, inga tuvhaazilwe kuuti twe vhagolosu, te kwi idala ilya kulandata indajizyo, nkandi kwi idala ilya kumwitiha uYeesu. Nkuyanga vhwevhulo, mwe pe ataliipo umuntu we akuvhaazilwa kuuti mugolosu kwi idala ilya kulandata indajizyo.

¹⁷ Ishi, lwe tukulondola kuvhaazilwa kuuti twe vhagolosu kwi idala ilya Chilisiti, vhamo vhakuyanga kuuti tuli she twe vhatalamalandu. Vhuli, izi zikulolesya kuuti uChilisiti akutuvhiiha kuuti tuvhombaje uvhutalamalandu? Ndaali, te muumwo inga hansi!

¹⁸ Ileelo inga nkugaluha kwitiha uluvhaatiho ulwa hali ulwa kulandata indajizyo, uluvhaatiho luula lwe náluhaanile, ipo yikulolesya kuuti ine ne mutalamalandu.

¹⁹ Yeenya, nkazilandataga indajizyo izya Moose, ileelo ahavhaliilizyo iha, uvhulanzi vhwane uvhwa mu ndajizyo vhusizile, inga uvhulanzi vhwane vhuvhe mwa Mulungu.

²⁰ Ishi mfuuye pooka nu Chilisiti pa shihovhenkanyo, ileelo ne mulanzi ahavhaliilizyo iha, ileelo te ne mulanzi ine, nkandi uChilisiti we mulanzi muhati yaane. Uvhulanzi vhwe indi navhwo ahavhaliilizyo iha, indi navhwo kwi idala ilya lwitiho, ulwitiho ulwa kumwitiha uMwana wa Mulungu we ánkunzite, ahayifumwa kufwa, kumpoha.

²¹ Ntakwanza kuvhuhaana uvhwila uvhwa Mulungu. Yeenya, inga umuntu angavhaazilwa kuuti mugolosu kwi idala ilya kuzilandata indajizyo izya Moose, pe uChilisiti áfuuye vhweleele!