VaEfeso 5 - ULufingwi uLupwa

Ulujendo lwe luhondeeye ku vhalandati avha Yeesu

¹ Ishi mulandataje ishiholanyo isha Mulungu, mwe pe mwe vhaana vhaakwe mwe avhakunzite nkaani.

² Mukundanaje ahavhaliilizyo honti, inza vwe uChilisiti ahatukunda nu kufwa ku zyitu. Ahayifumwa inza impuutile iya mununsi umwinza ye yikumuhondezya uMulungu.

³ Vhatavhatahaje ku nongwa izya vhulugusu nu vhuvhembu vhwonti, poosye kupapila ivintu, mwe pe inongwa izyo zitakwanzilwa kuvhombwa na vhafinjile.

⁴ Havhili mutayangaje amazwi aga nsoni na ga vhupukupuuku, poosye aga mfuuzyo, nkandi mumusalifwaje uMulungu ahavhaliilizyo honti.

⁵ Yikwanzilwa mumanye kuuti umuvhembu nu mulugusu na we akupapamila ivintu te vhahapwane uvhumwene uvhwa Chilisiti nu Mulungu. We akupapamila ivintu we wooka na we akupuuta iviholanyo.

⁶ Mutahiitishe umuntu wonti kuvhahopenkanya ku mazwi aga shaaha, mwe pe uMulungu aliivhapa isunde ipiti avhantu vhe vhatakumushindiha ku mbiivhi zyonti zye navhavhuuzya.

⁷ Pe ishi, mutavhiihaje uvhuliilani na vhantu vhe vhakuvhomba zyenezyo.

Kulandila ukwa vhiitisi kuvhanje inza uvhuzelu

⁸ Hali imwe mwámile mu shiisi, ileelo kufuma pe mwásopenkiine nu Mwene uYeesu, muhavha mu vhuzelu. Pe ishi, mulandilaje inza avhantu vhe vhali mu vhuzelu.

⁹ Nkuyanga vhwevhulo, mwe pe avhantu vhe vhali mu vhuzelu vhakuvhomba inyinza ni ngolosu ni zya nalyoli ahavhaliilizyo honti.

¹⁰ Mulondolaje zye zikumuhondezya uMwene uYeesu.

¹¹ Mutavhanje nu vhuliilani na vhantu vhe vhakuvhomba imbiivhi izya mu shiisi, nkandi muzivumbulaje apazelu zyenezyo.

¹² Nalyoli zya nsoni poosye nu kuziyanga zye avhantu ivho vhakuzivhomba kukwilu.

¹³ Ileelo inga zyavha mu vhuzelu, zililoleha apazelu, mwe pe uvhuzelu vhulizihozya.

¹⁴ Inga uvhuzelu vhukushilamila ishintu she shili mu shiisi, shitakusyala sheshiila, shoope shikuvha nu vhuzelu. Izi zye zikuvhavhiiha avhasimvi avha nyimbo kuyanga kuuti, “Damuula iwe, we uli inza we akaasite utulo! Uzyushe iwe, we uli inza umuntu we afuuye. Pe woope uChilisiti kwe akuhozye.”

¹⁵ Pe ishi, muvhanje minso vwe mukulandila, mutalandilaje inza avhapukupuuku, nkandi ku vhushindamu uvhwa njeele.

¹⁶ Mutatezyaje ahavhaliilizyo shaaha, mwe pe izi nsiku imbiivhi.

¹⁷ Mutavhanje mwe vhapukupuuku, yikwanzilwa mulondolaje ziila zye uMwene uYeesu akwanza muzivhombaje.

¹⁸ Havhili mutaholwaje, mwe pe uvhwashimwela vhukunanganya uvhulanzi uvhwa muntu. Ileelo mukwanzilwa mwizule uMupepo uwa Mulungu.

¹⁹ Pe musuvhalizanyaaje ku zabuuli ni nyimbo izya kumutiima uMulungu ni nyimbo zye zikufuma kwa Mupepo uMufinjile. Havhili mumwimbilaje uMwene uYeesu ku mwoyo wonti.

²⁰ Mumusalifwaje uTaata uMulungu ahavhaliilizyo honti mu zyonti, mwi izina ilya Mwene wiitu uYeesu Chilisiti.

²¹ Havhili mushindinkanaje, mwe pe mukumushindiha uChilisiti.

Umuntu nu mushi waakwe vwe vhakwanzilwa kulandila

²² Mwe vhantanda, mukwanzilwa muvhashindihaje avhalume vhiinyu, inza vwe mukumushindiha uMwene uYeesu.

²³ Nkuyanga vhwevhulo, mwe pe umwanaavuli we mupiti uwa mushi waakwe inza vwe uChilisiti woope Mupiti uwa shivhanza, havhili we Muposhi uwa muvhili waakwe, kwe kuuti ishivhanza isho.

²⁴ Pe ishi, mwe vhantanda mukwanzilwa muvhashindihaje avhalume vhiinyu mu zyonti, inza vwe ishivhanza shikumushindiha uChilisiti.

²⁵ Niimwe mwe vhanaavuli, muvhakundaje avhashi vhiinyu inza vwe uChilisiti áshikunzite ishivhanza shaakwe, ahayifumwa nu kufwa kuzya shenesho.

²⁶ Áyifumwizye kufwa, inga ashizelufwe ishivhanza, áshoziizye na minzi nu kushizelufwa kwi izwi lyakwe.

²⁷ Ávhomvile vhwevhulo, inga ayileetele ishivhanza she shizelufile, ishisita amabada poosye amankunya, poosye uvhuvhiivhi vhwonti inza uvhwo. Aliyileetela ishivhanza she shifinjile, havhili ishisita ulukwinkwino.

²⁸ Inza vwe uYeesu ashikunzite ishivhanza shaakwe, vhoope avhanaavuli vhakwanzilwa vhavhakundaje avhashi vhaavho inza vwe vhakugakunda amavhili gaavho. We akumukunda umushi waakwe, akuyikunda wuuyo.

²⁹ Ataliipo we akuyiviitilwa wuuyo weeka, ileelo umuntu wonti akuyiliisya nu kuyisunjiilila. Vhwevhulo, uChilisiti woope vwe akushivhombela ishivhanza,

³⁰ mwe pe ku kwakwe iswe tuli inza ivipelwa ivwa mu muvhili waakwe.

³¹ “Kuli izyo, umwanaavuli alimuleha uyise nu nyina nu kusopenkana nu mushi waakwe, vhoope vhavhili vhaliivha umuvhili wooka.”

³² Amazwi iga gali nu vhuzigizigi uvhupiti, ileelo ine nkuyanga kuuti gakulolesya izya Chilisiti ni shivhanza.

³³ Ileelo niimwe vhweleele nkuvhavhuuzya mwenti kuuti, umwanaavuli akwanzilwa kumukunda umushi waakwe inza vwe akuyikunda wuuyo, woope umwantanda akwanzilwa kumushindiha umulume waakwe.