VaEfeso 4 - ULufingwi uLupwa

Avhalandati avha Yeesu vhakwanzilwa kuvha shintu shooka

¹ Ishi ine ne nkunziilwe mu jeela kuzya Mwene uYeesu, nkuvhalambiilizya kuuti muvhe nu lujendo lwe lukuvhalilana nu lwito lwinyu ulwa vhushindamu kwa Mulungu.

² Muvhanje nu vhwahayiisye, havhili muvhanje mwe vhatonsu ku zyonti. Mujimbililanaje nu kuswilana ku shikunzi.

³ Muyikungulaje kuvhusunjiilila uvhuliilani vhwe mupeliilwe nu Mupepo uMufinjile. Uvhuliilani uvhwo muvhusunjililaje kwi idala ilya kulandila ku vhutehamu.

⁴ Iswe swenti tusopenkiine inza ivipelwa ivwa mu muvhili wooka, havhili tuli nu Mupepo uMufinjile wooka. Vhwevhulo, uMulungu átwisite nu kutuvhiishila ulusuuvhilo lwoka ulwa lwito lwitu.

⁵ Tuli nu Mwene wooka nu lwitiho lwoka nu lwozyo lwoka.

⁶ Tuli nu Mulungu wooka, woope we wu Taata wiitu swenti. Uweene akuvhakonzya vhonti, akuvhomba vhwevhulo, kutuushila mu vhonti, havhili uweene ali mu vhonti.

⁷ Ileelo muli iswe uChilisiti ahatuloota ivikunjilwa ivipiti swenti, kulandatana na vwe uweene ahanzaga kufumwa.

⁸ Ye nongwa uVhusimbe uVhufinjile vhukuti, “Lwe aazuvha ku mwanya, ásogooye na vhagomwa avhinji, ahaavhapa avhantu vhaakwe ivipeelwa.”

⁹ Ishi amazwi ge gakuti, “Lwe aazuvha ku mwanya,” kwe kuuti vhuli? Kwe kuuti, ku vhwandilo áyiisile mu nsi umu.

¹⁰ Uweene we áyiisile mu nsi umu we ázuvile nu kupeelwa uvhupiti ku mwanya, inga alunjisye zyonti.

¹¹ Uweene ávhaloosite avhantu ivikunjilwa. Vhamo ávhasavhuuye kuuti vhavhe vhatumwa, avhamwavho vhavhe vhakuvhwi, avhamwavho vhavhe vhalumbiilizi, avhamwavho vhoope vhavhe vhadiimi havhili vhasambiilizi avha vhantu.

¹² Imbombo yaavho ivho vhonti kwe kuvhasengaanya nu kuvhagomwa avhafinjile kuvhomba imbombo yaakwe. Vhakwanzilwa kuvhomba imbombo iya Mulungu, inga umuvhili uwa Chilisiti wuzengwe, kwe kuuti ishivhanza.

¹³ Ishivhanza shizengwe, kufishila pe ulwitiho lwitu swenti lwavha lwoka na pe twamumanya uMwana wa Mulungu, kwe kuuti, kufishila pe twakula nu kugoma nu kuvhufishila uvhulunjisu uvhupiti inza uvhwa Chilisiti.

¹⁴ Pe te tuhaavhe inza avhaana, vhe vhali inza ivhooti lye amavhilingwa ni nkungu vikulipempenusya uku nuukwo. Kwe kuuti, avhasambiilizi avha ilenga te vhahatulunzaanye ku vhushevu ni ilenga lyavho.

¹⁵ Ileelo tulilandata uvhwanalyoli ku shikunzi, inga tukule nu kufishila kuvha inza uChilisiti ku zyonti. Uweene kuli iswe ali inza itwe mu muvhili.

¹⁶ Mu muvhili, inkole zisopenkiinye ivipelwa vwonti. Inga ivipelwa vwonti vikuvhomba imbombo yaakwe, pe umuvhili wonti wukukula nu kuzengwa ahinza. Isho vwe niiswe swenti tusopenkiine kwa Chilisiti. Ishi inga swenti tukuvhomba imbombo ye uweene atupiiye, pe kwe tugome nu kukundana nkaani.

Avhalandati avha Chilisiti vhakwanzilwa kuvha nu lujendo ulwinza

¹⁷ Ishi vhamwitu, nkuvhasoha nu kuvhahomeelezya ku maha aga Mwene uYeesu. Kwandila ishi, mutalandilaje fwe vhantu vhe vhatakumwitiha uMulungu, avheene insiivho zyavho zya shaaha.

¹⁸ Havhili vha mu shiisi, vhatamanyile uvhwanalyoli uvhwa Mulungu. Avhantu ivho vhali ukutali nu vhulanzi vhwe uMulungu akuuvhapa avhantu vhaakwe, mwe pe vhatamanyile amadala gaakwe, kufumiilana nu vhugomu uvhwa mooyo gaavho.

¹⁹ Vhatakulola insoni, imbombo yaavho kwe kuvhomba uvhumalaaya nu vhuvhembu uvhwa mavhiila mu mavhiila. Vhakunyonywa nkaani kuvhomba izyo.

²⁰ Ileelo imwe mutásambiliiye vhwevhulo izya Chilisiti,

²¹ we vhwandilo uvhwa vhwanalyoli vhwonti. Nalyoli nkwitiha kuuti, mwívuuye ahinza inongwa ni nsambiilizyo zyakwe.

²² Mwásambiliiye kuleha ulujendo lwinyu uluvhiivhi nu kuzuula amooyo giinyu aga vhutalamalandu vhwe mwáli navhwo. Impapilo zyinyu zye zikuvhahopenkanya zikuvhananganya amooyo giinyu.

²³ Havhili mwásambiliiye kuuti mugalulanye insiivho zyinyu zivhe impwa.

²⁴ Muzwale amooyo amapwa, ge gápeziilwe ku shiholanyo isha Mulungu. Gaholiine nawo mu vhugolosu na mu vhufinjile uvhwa nalyoli.

²⁵ Ishi muleshe kuluma ilenga. Umuntu wonti yikwanzilwa amuvhuzyaje uwamwavho izya nalyoli, mwe pe swenti tuli pooka mwa Chilisiti inza ivipelwa ivwa mu muvhili wooka.

²⁶ Inga mwaviitwa, mutavhombaje uvhutalamalandu. Havhili izuvha litaswanje she muli nu mulaha.

²⁷ Mutahasheele muumupe uMukwalanzi uvhuzilo.

²⁸ Umwivha aleshe kwivha, avhombaje imbombo ye nyinza, inga avwagaje ivintu ivwa kumwavwa uweene nu kuvhagavhila avhamwavho vhe vhasovheliilwe.

²⁹ Mutayangaje amazwi amavhiivhi, muyangaje amazwi aga kuvhazenga avhamwinyu kulandatana na vwe yikwanzilwa, inga vhe vhakutejeelezya vhalyagaje ilonka.

³⁰ Mutamuvhiihaje uMupepo uMufinjile kuuti aswimililwaje. Uweene shilemezanyo isha kulolesya kuuti, mwe vhantu vha Mulungu, havhili akuhomeshezya kuuti isiku liliyinza lye uMulungu alivhatavhula imwe.

³¹ Ishi muleshe kuvhavhwa amooyo, nu kuvha nu vhuhalazu nu mulaha nu kudalinkana nu kusamulana poosye kuvhombelana imbiivhi izyamwavho zyonti,

³² nkandi mufwilanaje uvhwila nu kuvha nu mwoyo umwinza. Muswilanaje inza vwe uMulungu ahavhaswila kutuushila kwa Chilisiti.