VaEfeso 3 - ULufingwi uLupwa

Imbombo iya Paavhuli ku vhe te Vhayuuda

¹ Kuli izyo, ine ne Paavhuli ne nkunziilwe mu jeela kuzya kuvhomba imbombo iya Chilisiti uYeesu kuli imwe mwe te mwe Vhayuuda, nkuvhalaavhila imwe.

² Nalyoli nkwitiha kuuti, mwivuuye kuuti uMulungu ambiisile kuvha ne muvhomvi waakwe uwa kulumbiilila uvhwila vhwakwe kuli imwe.

³ Inza vwe mbasimbiiye, uMulungu ámanyisiizye uvhuzigizigi vhwakwe kwi idala ilya kundoleshela.

⁴ Inga mwavhaazya zye mbasimbiiye izyo, kwe mulole vwe imanyile ulukasamo ulwa vhuzigizigi kuzya Chilisiti.

⁵ Amanda gonti aga hali, uMulungu atávhamanyisiizye avhantu uvhuzigizigi uvhwo. Ileelo pisinda ahavhamanyisya avhafinjile vhaakwe avhatumwa na vhakuvhwi, kwi idala ilya Mupepo waakwe.

⁶ Uvhuzigizigi uvhwo vhwe vhuno: Kwi idala ilya kulyitiha Izwi iLyinza, vhonti vhe te Vhayuuda na Vhayuuda vhakupwana pooka uvhumwene uvhwa Mulungu. Vhakuvha pooka inza ivipelwa ivwa mu muvhili. Kwe kuuti, kutuushila kwa Chilisiti uYeesu vhakuposheela pooka ulufingwi lwe uMulungu áfinzile kuvhaloota aVhayuuda.

⁷ UMulungu ku vhwila vhwakwe, ánsavhuuye kuvha ne muvhomvi uwa kulumbiilila Izwi iLyinza. Ámfwiliiye uvhwila uvhwo, kulandatana na maha gaakwe amasisya,

⁸ poosye she ine ntáhondeeye kuluusya avhafinjile vhonti. Ahampa imbombo kuuti ndumbililaje ku vhe te Vhayuuda uvhudumbwe uvhwa kusukumizya havhili vhwe vhutali ni shipimilo uvhwa Chilisiti.

⁹ UMulungu we Mupezi uwa vintu vwonti, ánsavhuuye kuuti mbalolesye avhantu vhonti ulukasamo lwakwe ulwa vhuzigizigi vwe lukuvhombeha. Ulukasamo ulwo, áluzyisile kukwilu amanda gonti aga hali.

¹⁰ UMulungu ali nu vhushindamu uvhwa njeele mu zyonti zye akuvhomba. Pe akuvhalolesya avhantu ulukasamo lwakwe, inga kutuushila ku vhantu vhe vhakumwitiha uChilisiti, avhamanyisye vhe vhakukonzya na vhe vhali na maha mu nsi ye yitakuloleha pa minso amazelu, uvhushindamu uvhwa njeele uvhwo.

¹¹ Ulwo lwe lwáli lukasamo ulwa Mulungu kufuma amanda gonti aga hali. Álulunjisiizye kutuushila imbombo ye uMwene wiitu uChilisiti uYeesu áyivhomvile.

¹² Kwi idala ilya kusopenkana nu Chilisiti uYeesu nu kumwitiha uweene, tuli nu vhudandamazu uvhwa kupalamila pilongolela ilya Mulungu ishisita ilyoga.

¹³ Ishi nkulaavha mutahavunzishe amooyo kuzya mayimba ge nkuyimba ku zyinyu. Amayimba igo gakuvhaleetela uvhushindamu shiima shiima.

UPaavhuli akuvhalaavhila avhiitisi avha ku Hefeeso

¹⁴ Pe inga nasivhiilila ulukasamo ulwa Taata ulwo, nkusugamila pilongolela lyakwe nu kuvhalaavhila imwe.

¹⁵ Uweene we vhwandilo uvhwa vhulanzi ku vipelwa vwonti ivwa ku mwanya na ku vhantu vhonti avha mu nsi.

¹⁶ Nkulaavha kuuti, kutuushila kwa Mupepo waakwe, aavhape amaha mu mooyo kulandatana nu vhushindamu vhwakwe uvhwa kusukumizya.

¹⁷ Havhili nkuvhalaavhila kuuti, kwi idala ilya lwitiho, uChilisiti atendamaje mu mooyo giinyu. Ipo pe ishikunzi shaakwe, shiliivha shivhapiiye amaha aga kusimpa inza ikwi lye lyisiizye nkaani amazi gaakwe pansi, poosye inza inyumba ye yizengwilwe pa lwalo ulugomu.

¹⁸ UMulungu aavhape imwe pooka na vhafinjile vhaakwe vhonti amaha amasisya aga kumanyinsanya vwe uChilisiti atukunzite. Uweene atukunzite ku shikunzi isha kusukumizya, havhili she shitali ni shipimilo.

¹⁹ Nkulaavha kuuti, mumanye vwe ishikunzi isha Chilisiti shili uvhupiti, isheene shikuluusya uvhumanyinsanyi vhwinyu. Pe kwe muvhe mwe vhalunjisu inza uMulungu.

²⁰ UMulungu ashindikwaje kuzya maha gaakwe amasisya aga kusukumizya! Nalyoli ali na maha amasisya aga kutuvhombela impiti nkaani kuluusya zye tukulaavha nu kusiivha! Ali na maha amasisya aga kutuvhombela zyenezyo kulandatana na maha gaakwe amasisya ge gakuvhomba imbombo muhati mu mooyo giitu.

²¹ UMulungu ashindikwaje na vhantu avha mu manda gonti shiima shiima ku vhupiti vhwakwe vhwe vhukuloleha ku shivhanza shaakwe na kwa Chilisiti uYeesu! Amina.