VaEfeso 2 - ULufingwi uLupwa

¹ Hali, imwe mwámile mwe vhafwe, mwe pe muhashilanyaaga indajizyo izya Mulungu nu kuvhomba uvhutalamalandu.

² Muhalandataga ulujendo uluvhiivhi inza avhantu avhanji avha mu nsi umu. Havhili muhamushindihaga uMwene uMuvhiivhi, uweene we akuzikonzya impepo inkandamanu kumwanya, na havhaliilizyo iha akuvhomba imbombo muhati izya vhantu vhe vhasambusile kwa Mulungu.

³ Nalyoli niiswe swenti tuhalandilaga inza avheene. Tuhavhulandataga uvhuntu vhwitu uvhwa vhutalamalandu, kwe kuuti tuhazivhombaga zyonti zye uvhuntu vhwitu uvhwa vhutalamalandu vhuhasiivhaga nu kwanza. Mwe pe twápafwilwe nu vhuntu uvhwa vhutalamalandu inza avhanji, iswe swenti tuhasogolaga kwi isunde ipiti ilya Mulungu kuzya vhutalamalandu vhwitu.

⁴ Ileelo uMulungu ali nu vhwila nkaani ni shikunzi shaakwe shipiti,

⁵ ahaatupa uvhulanzi pooka nu Chilisiti. Ávhomvile vhwevhulo, lwe twámile swe vhafwe, mwe pe twámile swe vhatalamalandu. Kwe ku vhwila vhwakwe, uMulungu avhaposile.

⁶ Átuzyusiizye pooka nu Chilisiti, inga tuhakonzye pooka nawo ku mwanya. Ávhomvile ili kwi idala ilya kusopenkana nu Chilisiti uYeesu.

⁷ UMulungu ávhomvile inongwa zyonti izyo, inga ahavhaliilizyo he hakwinza alolesye kwonti uvhwila vhwakwe uvhupiti kuli iswe, havhili vhwe vhukusukumizya. Akuvhulolesya uvhwila uvhwo ku vhwinza vhwakwe vhwe akutulolesya kutuushila kwa Chilisiti uYeesu.

⁸ Kwe ku vhwila vhwakwe uMulungu avhaposile kwi idala ilya kumwitiha uChilisiti. Nalyoli, uvhuposhi uvhwo vhutakufumiilana niimwe, shipeelwa isha vhweleele kufuma kwa Mulungu.

⁹ Mutahapeelwa uvhuposhi ku mbombo zyinyu inyinza, inga nuumo atahinze ayitumvwe.

¹⁰ Iswe swe vipelwa ivipwa ivwa Mulungu. Uweene atupezile vhupwa kwi idala ilya kusopenkana nu Chilisiti uYeesu, inga tuvhombe imbombo inyinza. Imbombo izyo uMulungu ázisengiinye kufuma hali, inga iswe tuzivhombaje.

UMulungu avhasopenkiinye aVhayuuda na vhe te Vhayuuda kutuushila kwa Chilisiti

¹¹ Pe ishi, imwe mwe mutapafwilwe mu shifumo isha Vhayuuda, aVhayuuda vhahavhasufwaga imwe kuvhiita kuuti mutatahiliilwe. Ileelo kutahiili ukwo mbombo ye yikuvhombwa na vhantu vhweleele. Imwe mukumbushe vwe mwámile hali,

¹² ahavhaliilizyo iho mutámumanyile uChilisiti. Mwámile inza avhajeni, kwe kuuti mutáamile pooka na Vhaisilayeeli, vhe vhantu vha Mulungu. Avheene uMulungu ávhafwiliiye uvhwila kulandatana na zye áfinzile, ileelo imwe mutáliipo. Havhili muhatendamaga mu nsi ishisita ulusuuvhilo, poosye kumumanya uMulungu.

¹³ Mwámile ukutali nu Mulungu, ileelo ishi avhaleesite papiipi kutuushila uvhufwe uvhwa Chilisiti uYeesu pa shihovhenkanyo, mwe pe musopenkiine nawo.

¹⁴ Ishi, uChilisiti wuuyo we atuvhiisile kuvha nu lwivwano. Atusopenkiinye iswe swe Vhayuuda niimwe mwe te mwe Vhayuuda, kwi idala ilya kwefwa uvhulugu vhwe vhwátuvhiisile kuuti tuvitanaje. Áyefwizye uvhulugu uvhwo, kwi idala ilya kufwa, kwe kwéfwizye indajizyo zye zihatulehanyaaga.

¹⁵ Indajizyo izya Vhayuuda zili ni nkomeelezyo inyinji, ileelo uChilisiti ázyefwizye. Ávhomvile isho, inga swe Vhayuuda niimwe mwe te mwe Vhayuuda tuvhe impuga yooka, kwi idala ilya kusopenkana nu weene. Isho vwe ávhomvile kutuvhiiha kuvha nu lwivwano.

¹⁶ Kwi idala ilya kufwa pa shihovhenkanyo, áyefwizye uvhulugu uvhwa Vhayuuda na vhe te Vhayuuda nu kuvhavhiiha impuga yooka. Havhili ahavhakundanya vhonti nu Mulungu.

¹⁷ Áyinzile kulumbiilila Izwi iLyinza ilya kuleeta ulwivwano kuli imwe mwe te mwe Vhayuuda mwe mwámile ukutali nu Mulungu na kuli iswe swe Vhayuuda swe twámile papiipi nawo.

¹⁸ Izyo zye twávhombeliilwe nu Chilisiti, zikutuvhiiha iswe swe Vhayuuda niimwe mwe te mwe Vhayuuda kumupalamila uTaata kwi idala ilya Mupepo wooka wewuula.

¹⁹ Pe ishi, imwe mwe vhantu mwe te mwe Vhayuuda, te mwe vhajeni havhili. Mwe vhaana vha Mulungu, havhili mwe vhahaaya pooka na vhafinjile vhaakwe.

²⁰ Muli inza amavhwe ge vhazenjeeye inyumba. Vhoope avhatumwa na vhakuvhwi vhali inza ulwalo ulwa nyumba iyo. Havhili uChilisiti uYeesu we ali inza ivhwe ipiti ilya pa shipembe isha nyumba iyo.

²¹ Kwa weene kwe tusopenkiine pooka nu kugoma inza vwe ivhwe ipiti ilyo liyisopenkiinye inyumba yonti nu kuyivhiiha kuuti yigome. Akutuvhiiha kuvha swe Nyumba iMfinjile kutuushila kwa Mwene uYeesu.

²² Ishi, kwi idala ilya kusopenkana nu weene, niimwe mwe te mwe Vhayuuda mukuzengwa pa lwalo ulwa nyumba ye uMulungu akutendama. UMulungu akutendama mu nyumba iyo, kwi idala ilya Mupepo waakwe.