VaEfeso 1 - ULufingwi uLupwa

Umulaamu

¹ Ukalaata uno nsimvile neene ne Paavhuli ne mutumwa uwa Chilisiti uYeesu. Násavhuliilwe kuvha ne mutumwa ku lukasamo ulwa Mulungu. Nkuvhasimbila imwe mwe mukutendama mu nkaaya iya Hefeeso, mwe vhafinjile avhatungamu avha Chilisiti uYeesu.

² UTaata wiitu uMulungu nu Mwene uYeesu Chilisiti vhavhafwilaje uvhwila nu kuuvhapa uvhutehamu.

UMulungu ashindikwaje ku lukasamo lwakwe ulwa kuvhapoha avhantu

³ Ashindikwaje uMulungu, uTaata uwa Mwene wiitu uYeesu Chilisiti! Uweene atuloosite nu vhuloote vhwonti uvhwa ku mwanya. Uvhuloote uvhwo tukuvhuposheela kwi idala ilya kusopenkana nu Chilisiti.

⁴ Lwe uMulungu ashiili kupela insi, átusavhuuye kuuti tuvhe swe vhantu vhaakwe kwi idala ilya kusopenkana kwitu nu Chilisiti. Ávhomvile vhwevhulo, inga tuvhe swe vhafinjile ishisita ulukwinkwino pilongolela lyakwe. Mwe pe átukunzite,

⁵ uMulungu álongoleeye kwamula kutuvhiiha kuvha swe vhaana vhaakwe kutuushila kwa Yeesu Chilisiti. Ávhomvile vhwevhulo, kulandatana nu lukasamo lwakwe na vwe yámuhondeziizye,

⁶ inga swenti tumutiime uMulungu ku vhwila vhwakwe uvhwa kusukumizya. Uvhwila uvhwo átufwiliiye kutuushila kwa Mwana waakwe unkundwa.

⁷ Kutuushila uMwana waakwe uyo kufwa pa shihovhenkanyo, tutavhuliilwe, kwe kuuti tuswiliilwe uvhutalamalandu vhwitu. Izi zivhombesile kulandatana nu vhupiti uvhwa vhwila vhwakwe

⁸ vhwe átufwiliiye nkaani. UMulungu átupiiye uvhwila uvhwo ku vhushindamu uvhwa njeele vhwonti na ku vhumanyi.

⁹ Ahatumanyisya ulukasamo lwakwe ulwa vhuzigizigi, lwe ákasiime kulandatana na vwe yikumuhondezya. Ulukasamo ulwo ásivhiliiye kululolesya kutuushila kwa Mwana waakwe uyo,

¹⁰ nu lukasamo lwakwe lwe luno: Kuuti inga zyonti zyasila na havhaliilizyo he ahasaavhula haafiha, alivivhungaaniha pooka ivipelwa vwonti, vwe vili ku mwanya na vwe vili pa nsi. Woope uMwana waakwe we aliivha mupiti uwa vipelwa ivwo.

¹¹ Ivintu vwonti vikuvhombeha kulandatana nu lukasamo nu vhwamuzi uvhwa Mulungu. Woope uMulungu kufuma hali átusavhuuye iswe swe Vhayuuda, kuuti tuvhe swe vhaana vhaakwe kwi idala ilya kusopenkana nu Chilisiti.

¹² Ávhomvile vhwevhulo, inga ku zyitu iswe swe vhatanzi kumusuuvhila uChilisiti, uMulungu ashindikwaje ku vhushindamu vhwakwe.

¹³ Niimwe vhweleele mwe te mwe Vhayuuda, mwívuuye izwi ilya nalyoli, kwe kuuti Izwi iLyinza ilya kuvhapoha. Lwe mwivwa muhamwitiha uChilisiti, woope uMulungu ahavhalemezanya ni shilemezanyo kulolesya kuuti mwe vhaakwe. Ishilemezanyo isho, wu Mupepo uMufinjile we áfinzile kuutupa.

¹⁴ UMulungu átupiiye uMupepo waakwe avhe shintu isha kuyipinjiha, kutuhomeshezya kuposheela uvhupwano vhwakwe, kufishila pe alitutavhula iswe swe vhantu vhaakwe. Avhomvile vhwevhulo, inga atimwaje ku vhushindamu vhwakwe!

UPaavhuli akuvhalaavhila aVhahefeeso

¹⁵ Kuli izyo, lwe niivwa kuuti mukumwitiha uMwene uYeesu nu kuvhakunda avhafinjile vhonti,

¹⁶ ntalesile kumusalifwa uMulungu ku zyinyu, poosye kuleha kuvhalaavhila.

¹⁷ Nkulaavha kuuti, uMulungu uwa Mwene wiitu uYeesu Chilisiti we wu Taata uwa Vhushindamu, aavhape uvhushindamu uvhwa njeele nu kuvhalolesya vwe ali, inga mumumanye ahinza nkaani.

¹⁸ Havhili nkulaavha avhigulile aminso aga mu mwoyo, inga mumanye ahinza shiila she avhitiiye kuuti muposheele, pe muvhe nu lusuuvhilo ulwa nalyoli. Ishintu isho vhudumbwe uvhwa vhupwano uvhwa vhushindamu vhwe áfinzile kuuvhapa avhafinjile.

¹⁹ Havhili mumanye amaha gaakwe amasisya aga kusukumizya. Amaha igo gakuvhomba imbombo kuli iswe swe tumwitisile uYeesu. Agenego, she shooka na maha gaakwe amapiti

²⁰ ge uMulungu ámuzyusiziizye uChilisiti nu kumuvhiiha uluvhazu ulwa nyoovhe yaakwe iya kundiilo, pa vhushindamu uvhupiti nkaani ku mwanya.

²¹ Ishi uChilisiti ali na maha amasisya kuluusya ivipelwa vwonti vwe vili nu vhupiti, poosye amaha, poosye uvhumwene, poosye vwe vikukonzya. Te kuuti ali na maha amasisya ku havhaliilizyo hanaaha vhweleele, ali na maha amasisya poosye na ku havhaliilizyo he hakwinza.

²² UMulungu ahaamupa amaha aga kukonzya ivintu vwonti, nu kumuvhiiha mu shivhanza kuuti avhe mupiti ku vintu vwonti inza itwe mu muvhili,

²³ mwe pe shoope ishivhanza shili inza umuvhili ku kwakwe. Havhili vhulunjisu vhwakwe, uweene we akuvilunjisya ivintu vwonti ponti.